عشق ناضج وعشق مجنون

- ٢٥ -

تم النشر بتاريخ ٢٨ أغسطس ٢٠٢٠

 - الفصل الخامس والعشرون - 

"تفتكر زمانهم اتصالحو؟" سألته جيهان وهما يجلسان بشرفة غرفتهما 

"هتغلبوا شوية وهو هيتحايل عليها وهيرجعوا سمنة على عسل، متقلقيش.." أخبرها بثقة 

"ده إيه الثقة الجامدة دي كلها؟" رفعت احدى حاجباها في استفسار 

"صهيب بيحب لينا اوي، أنا متأكد من ده علشان عمري ما شوفته زي ما شوفته وأنا بس بجيب سيرتها قدامه، ولينا كمان بتحبه جداً، قريت ده بسهولة اوي في عينيها، وكل اللي حصل كان مجرد سوء تفاهم وهيعدي أكيد"

"لا أنا مش فاهمة حاجة، بلاش الألغاز دي واحكيلي، إيه اللي كان سوء تفاهم بالظبط؟" ضيقت ما بين حاجبيها في استفسار

"مفيش، هو ساعة ما الولد ده جالهم وعمل اللي عمله صهيب قالها هنروح، وهي فهمته غلط، صهيب كان متأكد إن حد زاقق الولد وكان بيفكر إنما هي افتكرت إنه صدقه، وكل واحد فيهم صمم على موقفه، لا هو شرحلها ولا هي ادته فرصة، يعني من الآخر مفيش تفاهم" أخبرها متحدثاً بهدوء لتتنهد جيهان في حيرة وزمت شفتاها وصمتت في تفكير للحظات مطولة 

"إيه! استغربتي من اللي حصل؟" 

"مش استغربت، أنا كنت أصلاً متوقعة إن مشاكل كتيرة ما بينهم هتحصل لأن همّ الاتنين مفيش تفاهم ما بينهم، لينا لسه صغيرة أوي وكمان صهيب صغير وأول مرة يكون في علاقة، الاتنين لازم في مرحلة هيتضغط على أعصابهم ويحسوا بالتشويش ومش هيعرفوا يتفاهموا" 

"هياخدوا وقت شكلهم كده لغاية ما يفهموا بعض ولغاية ما عنينا تطلع معاهم" نظر لها مازحاً لتلين شفتاها بإبتسامة رقيقة 

"أنا خايفة أوي على لينا" همست ثم شردت ليُربت أمجد على يدها بطمأنينة لتنظر هي له بعد أن شردت

"متقلقيش، كل الموضوع إن الاتنين لسه مفهموش يعني إيه تفاهم، يعني إيه هدوء وازاي يتصرفوا في المواضيع بعقل ومناقشة، عارفة.. أنا حاولت افهم صهيب يعني إيه يتعامل مع بنت، خصوصاً زي لينا في سنها الصغير، آه الحب موجود بس مبادئ التفاهم عندهم همّ الاتنين مش موجودة، يعني مثلاً آخر موقف ده زي اللي حصل ما بينهم ، صهيب أتصرف بعقله الذكوري من غير ما يفهم ويحسب حساب لينا فهمت إيه، الراجل مننا لما بيتعرض لموقف مخطرش على باله أو أتعرضله قبل كده أو حتى مشكلة بيحس إنه عايز يسكت، ويفضل يفكر في حلول، مبيبقاش عايز حلول من حد وبيبقى عايز يوصل للحل بنفسه، حتى المساعدة قليل أوي لما الراجل بيطلبها إلا إذا كان على درجة كبيرة من الوعي والفهم أو إذا قدامه مثل أعلى وقريب أوي ليه علشان ياخد برأيه ومشورته"

"وليه محكاش ليك على طول واتكلم معاك في الموضوع؟ عايز تفهمني يعني إنه مش شايفك قدوته!" سألته بملامح متعجبة بينما ابتسم لها وازاد من قوة ملامسته ليدها