مدمرة كياني⁦❤️⁩😙( باللهجة الجزائرية⁦🇩🇿⁩)

الحلقة 18🙏

الويكاند ناضت صباح حبطت عند يماها: صباح الخير ماما
صوفي : صباح النور لليان راهي جاية خالتك و وليدها فؤاد عندنا اليوم.  سمعت لليان واش قالت يماها تبدلو الملامح تاعها و طلعت للشمبرة تاعها: لليان اتفكري واش قال أسر حاربي على لي تحبيه و خليه ملكك خلاص دوك ندوش و نوجد روحي
دوشت جبدت شعرها و لبست جبة و قعدة مع يماها يستناو فيهم يجو ......
واحد الساعة après جاو فتحتلهم الباب صوفي و رحبت بيهم :مرحبا بكم جوزو
سلمت لليان على خالتها و راح يسلم عليها فؤاد رماتلو يدها و خمست معاه معجبوش الحال
فؤاد: الله يبارك كنت داير مرتي شابة مي ماشي لهاد الدرجة .حقرتلو و دخلت معا يماها و خالتها
خديجة: واش راكي لليان
لليان: الحمد لله خالتو و انت
خديجة"و الله غير الحمد لله يا بنتي راكي تشوفي الكبر و انت واش راكي ديري
لليان: نخدم
فؤاد: حنا معندناش المرة لي تخدم  و هي مزوجة كاين راجل يصرف عليها
لليان شافت من و من و قالت بتبهليل: وين راك تشوف راجلي زعما الحمد لله و مانيش ناوية عندي بزااف بروجيات في راسي قبل الزواج ان شاء الله
فؤاد: بالاك الدنيا دور و غمزلها
صوفي: ان شاء الله يجي مكتوبها
خديجة: ان شاء الله. كملو قصرو و جلو خارجين فؤاد : تحبي ولا متحبيش انا هو مكتوبك بب غلقت الباب في وجهو رفدت خملت و طلعت لبيتها تبكي تبكي حى رقدت .
اسر جوز الويكاند تاعو مع الخدمة
نور و لوجين ولاو يخرجو بزاااف و عرفها و عجباتو بزاااف و كل يوم يزيد يعشقها اكتر

ناضت دوشت لبست سروال جين و تريكو بريك مع باسكات بيضة دارت كوتشفال ماكياج هادي و خرجت صباح بكري على العادة راحت للبحر قعدت تم تشكيلو همها حتى صونا التليفون تاعها لقاتو رقم غريب مرفدتش مي قعد يعاود حتى رفدت: شكون؟
فؤاد: صباح النور مرتي العزيزة
لليان: مانيش مرتك و واش تسحق من عندي
فؤاد: منسحق والو نسحقك نتي تكوني تاعي يا لليان نديرلك جنة فوق الارض لي تقوليها تحضرلك انت اقبلي برك
لليان: اسمعني مليح انا ماشي مرتك و ماراحش نكون مرتك عندي واحد في حياتي اخطيني دوك
فؤاد: يا تقبلي يا تكرهي حياتك
لليان: هه راك تهددني
فؤاد: نتي وصلتيني لهاد النقطة و كوبا
لليان: اوووووف اوف اوووف منك يا لليان فرغت قلبها بالبكاء حتى مسحت وجهها و دارت و هاد الشي المل تحت  انظار اسر لي كان جايز شافها حبس طونوبيلتو و يدا يشوف فيها راحت تقطع و هي غايسة تشوف مضبب حتى تسمع صوت طونوبيل فرينات ساك . شافها اسر قلبو رعش و عيط: لليااان كان راح يحبط مي تراجع
حبس مول الطونوبيل و حبط: راكي مليحة؟؟؟؟
دارتلو لليان ايه براسها
****: تحبي نوصلك
لليان: اه لالا يعطيك الصحة و راحت ركب طونوبيلتو و راح ركبت طاكسي و راحت للشركة وصلت دخلت لي سانيتار غسلت وجهها و راحت لخدمتها اما هو استناها حتى دخلت باش دخل جاز على البيرو تاعها مالقاهاش دخل لبيروه و خلا الباب مفتوح حتى يشوفها دخلت للبيروها حطت يدها في المكتب و شدت راسها و نحات و بدات تخدم .......
طبطبت و دخلت: موسيو أسر هاوليك الملف لي طلبتو مني . شدو عليها و خرجت
اسر: مور هاد الحزن و البكاء حكاية طويلة الا منفهمك يا لليان مسألة وقت برك.
صونا تيليفون تاعها لقاتو هو: واش تسحق مني واششش
فؤاد: راكي تقيسيني بهدرتك هادي المهم واش رايك نتلاقاو اليوم
لليان و قد طفح بها الكيل خبطت البيرو و رمات الكاس لي كان قدامها للحيط: قتلك اخطيني متفهمش اخطيني نموت و منتزوجش بواحد كيما نتا افهم و رمات التليفون. كبس على يدو حتى ولات بيضة كان داخل عندها كي سمع صوت التكسار حتى  سمعها و تفكر هدرة مروة كي كانت تحكي معاها في التليفون ولا البيرو كمل خدمتو و خرج راح للدار وصل قال للخدامة: مروة راهي هنا
الخدامة : في بيتها موسيو . و طلع طبطب و دخل: مروة جيت نهدر معاك
مروة: oui bien-sûr .قعد قدامها و قاللها: هاديك المرة سمعتك تقولي لليان ادا متحبيهش متتزوجيعش و متقبليش الخطبة و اليوم صدفة سمعتها في التليفون تقول اخطيني و انا نموت و منتزوجش بواحد كيما نتا جاني الفضول نعرف شكون.
شافت مروة في عينيه يبان ماشي فضول يبان مقلق مهدرتش و قاتلو: وليد  خالتها حاب يخطبها و هي ماشي قابلة . هادا واش قاتلي
اسر: عيطيلها دوك و افهمي منها لانو ماكانتش مليحة
مروة و بدأت تشك : اوكي حكمت التليفون و عيطتلها اسر: ديري haute parleur
مروة: مي...
اسر:ديري .دارت حتى رفدت لليان:الو
مروة: الو لليان واش راكي
لليان: مليحة
مروة: مي صوتك ميقولش هكدا
لليان و بدأت تبكي: عييت و الله غير عييت يعيط و يهدد و يقول انت مرتي وكي قوتلو لالا هه علابالك واش قالي قالي يا تتزوجيني يا نكرهلك حياتك بزاف علابالي ماراحش يخطيني راح نروح خلاص
مروة: وين تروحي
لليان: راح ندي ماما و نسافر
مروة: و راح تقبل
لليان: مقبلتش نروح وحدي نروح لازم .سمعها اسر ناض خرج و خبط الباب سمعت لليان الخبطة: واش هادا
مروة: والو الريح خبط الباب ايا مالا ريحي شوية و كي تتكالماي نهدرو
لليان: ان شاء الله و كوبات.
أسر يحكي:
كنت رايح للشركة شفتها واقفة قدام البحر كيفاش منعرفهاش و انا نميز وقفتها بين ميات وحدة شفتها محسيت غير روحي نحبس الطونوبيل و نشوف  فيها حتى جاها تليفون باين تقلقت قعدت شوية حتى مسحت دموعها و راحت تمشي و تقطع طريق حتى يجي واحد بجري و هي غايسة انا قلبي قريب حبس لتم جامي خفت على واحد كيما خفت عليها دوك حتى حبس السيد و خرج ليها هدر معاها و انا تقلقت و راح راحت هي للشركة و انا دخلت موراها خدمت واحد ساعة و هي حاطة راسها حبيت نخرجها شوية طلبت ملف مع اني منحتاجوش جابتو و خرجت مخلاتليش حتى المجال باش نهدر بعد شي تلات ساعات نسمع فيها تعيط و تضرب الكاس مع الحيط رحت ليها وصلت قدام  الباب و نسمعها تهدر هكاك (مع فؤاد ) رجعت للمكتب تاعي خدمت و رحت للدار  فهمت من مروة انو وليد خالتها حاب يخطبها و هي ماشي قابلة طلبت من مروة تعيطلها عيطتلها و سمعت صوتها الباكي قلبي وجعني شديت روحي بسيف حتى نسمعها تقول نسافر و ادا مقبلتش ماما نهرب انا لتم طرف العقل طارلي خرجت و خبطت الباب مورايا رحت لداري قعدت نخمم فاي حاجة ممكن نخليها بيها قريبة عليا و بعيدة عليه حتى لقيت فكرة وحدة لازم نفذها مي لازملي طريقة مليحة باش نشرحالها

نهاية البارت فوت و كومنت للدعم البنات و اعطوني رايكم في البارت تاع اليوم في ميزكم واش هي الفكرة تاع اسر لي راح يشرحها لليان 👅🧡
نحبكومممم❤❤نسحقكم نخلطو الحالة بلي فوت و لي كومنتار هيا هيا الحكاية مازالها في الاول الاحدات تاع الصح راهم بداو يظهرو😂💕💕💕