ويامحاسن الصدف

السابعه عشر

لايك قبل ماتقرا وكومنت بعد ما تقرا... قراءه ممتعه🍃
#ويامحاسن_الصدف
الحلقه :السابعه عشر
بقلم :فاطمه سالم الورفلي
.................................
......................
عند زينب :
اني طبست راسي... ونزلت... قدمت كم خطوه.. تبعدت بيها عنه... وبدون ما نحس  .. هربت... هربت قعدت نجري... بخوف... نجري بوجع... بضعف... بتعب... ونسمع في صوته وراي ويعيط... واني نجري... وخايفه نطيح... نجري بقوه... بقوة مش موزونه... خايفه نطيح ويشدني  .. نطيح ويقتلني.. قعدت نجري.. ونبكي... وحاسه بيه يجري وراي... خايفه يلحق عليا.... و .....لعند حسيت صوت الحركه يبعد... يبطئ... يتلاشى... لعند اختفى... وقفت... ومن قوه سرعتي لما وقفت... طحت... حسيت روحي مهزوزه... مهزومه... ضعيفه... مكسوره... مقهوره...مهمومه... شبحت لسماء وتنهدت... وقلت "يارب "... وانهمرت بالدموع... معاش قدرت نتحمل... معاش عرفت اصلا شن نقول... معاش قدرت نتحمل حتى نحكي على الوجع... ولا على قهري... اصلا ما عرفتش... وما قدرتش.. ما تحملتش حتى نحكي... لان مش عارفه كيف نوصف حالتي... متغربه... يتيمه... ولا مخنوقه ولا مقهوره! ولا مكسوره... مهمومه ولا شنو ولا شنو...ركعت واني نبكي....يا الله يا رحمان يارحيم ارحمني... يالله يا رحمان يا رحيم... ارحمني... ارحمني...يتبع

.....
..........
عند قتيبه :
قتيبه سكت... و ولع السياره

سندس :انا قلت افتحلي باش تفهم انتي

قتيبه قعد ساكت... ويطلع من شارع يخش لي شارع...

سندس :نتصل بي البوليس ونقوله شنوا لي تعملو فيه... ولا تهبطوني

سالمه خافت :شن شن... مالا نسيتي انك معانا يا للا ... من الاول قبل ما نجي لي ليبيا متفقين وعلى شروط

سندس :انا كلمني السي رحيل... على اساس انه عمليه تحويل حصوة... مش موضوع تجاره اعضاء

سالمه :المهم خديتي فلوس يعني تعتبري في جريمه... واصلا سكوتك على الجريمه هو بروحه اكبر جريمه يا للا

سندس تبكي :حسبي الله ونعم الوكيل فيكم كلكم... مافيش رحمه في قلوبكم... علاش تعملو هكا علاش... تقتلو وتاجرو بلاعضاء على خاطر وسخ الدنيا

سالمه ضحكت :وسخ الدنيا سكتي لما خديتيه... ترا ما ديريش روحك واو

سندس تمسح في دموعها:هبطوني توا هبطوني... الله لا يسامحكم لا دنيا لا اخرة

قتيبه تنهد : خلاص يا سندس...قتلك سالمه ترا اتصلي بي رحيل

سالمه فتحت تليفونها... واتصلت بي رحيل...

سالمه :ايوه انت وين توا

رحيل :قريب من فندق هيفين .... في الحوازه... في جربه رفعتها

سالمه شهقت:لعند غادي!.... اللطف ياربي اللطف... باهي باهي هي وين توا

رحيل زفر :هربت مني... نبي ندخلها للحوازه... ختلتني وهربت