"إنتمائي"

(12)💛

✨رواية إنتمائي"روايات كلوفر ✨
..
الحلقة(12)
..
وعيت الصبح وانا مستغربه مزال محد خش وهزبني ولا ضربني ؟، معقول ماما عطتني فرصه ثانيه ؟
نزلت ولقيت عيت خالتو 😭💛 ، حبايبي واحشيني بكل ،
سلمت ع خالتو نعيمه بالأحضان والبوسات وبنتها نغم يلي كانت بطبعها نسخه من إيلاف ، اما عيالها كانوا شباب وفي المربوعه ( حكيت عليهم في مقدمة الروايه ) لما شفتهم عيت خالتو نسيت كل المشكله يلي كانت صايره معايا ، بس فطنت لماما يلي كانت اتعامل معايا بطريقه اخييه بكل 🔥، وشويه شويه لاحظت انه حتى بابا معاملته معايا أشر ، او بشكل أوضح مَ كانش يتعامل معايا بس نضراته ليا يالطييييف 🔥.
وفي العشيه سمعت انه عمو جواد وعوّن في المربوعه طرت من الفرحه ، ورقيت لداري وأنا نشوف للشنطه والمصيبه يلي فيها ، شوي وينفتح الباب بالقوه ، ياربي عظامي رقدن ، طلعن إيلاف ونغم جايتهن حالة الضحك يحكن شوي ويضحكن وأنا زي الأطرش في الزفه مش فاهمه شي 😂.
..
Klo0ver_novels
..
في المربوعه.
أحمد : بس يلي درته أنت ياعوّن عمري مَ توقعته منك.
عوّن: بنتكم ونبيها حلال ياعمي ، كنت نستنا فيها تكمل قرايتها وانجيها لولا اني علمت انكم تبوا تعطوها لحد غريب.
جواد : وأنا مش ح نلقا زي إنتماء مرا لولدي بكل ، ساد انها بنت خوي الغالي.
أحمد طبس راسه : سامحني ياخوي البنت جا حد قبلك وطلبها وعطيته كلمه.
جواد : كيف هكِ معقوله تعطيها لواحد غريب وترفضني أنا ؟
أحمد : لا مش غريب يلي طلبها ، حتى هو من الأقارب.
عوّن ماسك أعصابه : مَ يصيرش منه كلامك هذا ياعمي.
أحمد: ها كلامك انت يلي يصير منه ياعوّن ، قال سبحانه (ولا تواعدوهنّ سراً وآتوا البيوت من ابوابها).
جا عوّن يبي يحكي قاطعه باته : ومَ تنساش انه الإنسان يخطئ عادي والمهم انه توا جا يصلح في خطأه.
..
توضيح : هذا كله صار وإياد مش عالم بشي كان برا الحوش ، لأنه أكيد لو كان عالم بشي راه حلقه مليانه أكشن ولا ؟ 😂
..
Klo0ver_novels
..
وقت صلاة العشاء
كنت في داري نصلي وبعد سلمت قريت آية الكرسي لأنه يقولوا بعد نقروها بعد كل صلاة يقعد مابينك وبين الجنه غير الموت ، (ننصحكم بيها).
خشت عليا إيلاف وعيونها يلمعن ، حضنتني وقالت افتكيتي من صاحب خونا
إنتماء : وووه واخيراً كنت عارفه انه عوّن مش ح يسيبني ، بس من قالك ؟
إيلاف : بابا قالها لماما قال انه صاحب إياد مَ صارش منه لأنه جا حد اقرب والأقربون أحق
إنتماء تبي اطير من الفرحه : تمام انزلي انضم الدار وننزل حتى أنا.
إيلاف صبت : تمام
صكرت وراها الباب
وطلعت يلي في الشنطه ولقيت رقمه مخزن فيه ، إي يلي في الشنطه تليفون بس كيف وصل لشنطتي م تسألونيش لأنه هذا نفس السؤال يلي في بالي ، ورنيت عليه وقلبي يخبط ، يماما ع الشعور 😭💛.
عوّن: احسن وحده.
إنتماء: احسن واحد.
عوّن: كيف حالك حبيبي ؟
إنتماء: طايره من الفرحه ، بس شنو في صوتك مش عاجبني ؟
عوّن: دوم طايره من الفرحه ياربي.
إنتماء: عوّن احكي شنو في ؟
عوّن: شن نحكيلك بس ؟ باتك صكر راسه مَ يبش يعطيكي ليا ، واقسم بالله أنا وباتي حاولنا معاه وصلنا فيه للتجداي ومَ باش يغير رايه ، تي والله لولا انه باتي قاله ماشي نستأذنوا منك بنطلعوا ، راه لعند توا قاعد معاه ونجدا فيه ع خاطرك ، لكن شن اندييييير 💔🔥.
إنتماء مصدومه وتبكي : كيف هكِ ياعوّن ؟ ، توا إيلاف رقت وقالت هلي رفضوه صاحب إياد ، أكيد بابا غير رايه بعد طلعتوا ولا يعاقب فينا أكيد.
عوّن: تي شنو هو لعب عيال ؟ تي جيناه نحنَ رجاله م بيناش بصاره في المواضيع هذينا افهمممي.
إنتماء ساكته وصوت شهقاتها بس مسموع
عوّن: الله يربحك مَ تكسريلي ظهري اسكتي معش تبكي ، تي نحنَ لبعضنا لو كان شنو ، وحتى لو اضطرينا نهربوا.
إنتماء زادت تبكي ع الحال يلي وصلوله💔🔥.
عوّن يغير في الجو : خلاص عاد اهدي شنو البنت البكايه يلي حبيتها أنا ، توا احكيلي شن جو المفاجئه يلي في شنطتك ؟
إنتماء ابتسمت ومسحت دموعها : هذي مفاجعه مش مفاجئه ، كيف بس ؟
عوّن ضحك: كيف م حطيتيلي الشكلاطه ع سريري 😂🔥
إنتماء ابتسمت : ربي يخليك ليا يا أحن واحد.
عوّن ابتسم : ويخليكِ ليا #إنتمائي❤🔥
..
وبعد هالمكالمه نزلت ولقيت خالتو وماما يشربن في شاهي في الصاله ، شكلهم تعشوا وما كلمونيش ، كمدتها وطلعت للجنان شفت إيلاف ونغم ع الدرجاحه ضميت إيديه ع صدري كان الجو مصقع ، شفت للسماء كانت مغيمه غمضت عيوني وانا في أُمنيه وحده في قلبي ندعي بيها ليل نهار ، دعيت بيها ربي وانا مغمضه عيوني ووجهي للسماء ولما فتحتهن نزلت مني دمعه مسحتها وابتسمت وقلت بصوت شبه مسموع ، ربي كريم مش ح ينسانا 💛 ، وخشيت للمطبخ لقيته مقلوب ياربي شنو هذا ، شنو هالحوسه ، تنهدت بقلة حيله ورفعت كمامي بنبدا نغسل المواعين مع خشت أيهم ولد خالتو ، متغير لدرجة ماعرفتاش ، ولأننا تعودنا من نحنَ وصغار مع بعضنا فَ م نلبسش في حجاب قدامه ولا نتحشم منه بس اكتفيت بأني حطيت البارنوص ع راسي وابتسمت : اهلين ايهم .
أيهم ابتسم : يا اهلاً بِ بنت الخاله ، شن الجو ؟
إنتماء : الحمدلله بخير ، وانت كيف حالك ؟
أيهم : تمام التمام ، وين يابت كبرانه وحليانه زي م توقعت
إنتماء انحرجت : تسلم ، وحتى انت متغير مشاء الله.
قاطع علينا أيوب ولد خالتو الثاني يلي أصغر مني بسنه او اثنين (شوفوا المقدمه 🙂😂)
أيوب يصفر : اووو بنت خالتي الشينه مع خو العازه في المطبخ شديروا ياسخيفين الأدب.
أيهم: تحشم يارا
إنتماء ضحكت : مزلت م درت عقل ؟
أيوب : لا مزلت نستنا فيك اديريلي 😂
إنتماء ضحكت: شنجوك يا بارد ليك وحشه ؟
أيوب : جووي سمحح بعد شفت إيلاف اخخخ طرطوفه الفرخه 😭🔥
أيهم دقه ع ظهره : اطلع اطلع تو يجينا إياد يطرطفنا اطراف صغيره 🙂🔥.
ضحكوا مع بعضهم وطلعوا وانا ابتسمت عليهم يجننوا عيت خالتو جوهم سمح وينحبوا نعتبر فيهم خوتي والله 💛
..
بعد نص ساعه كنت مكمله المطبخ وطلعت للدرجاحه لقيت إيلاف ونغم جايبات زريعه ومزالن يحكن ، م يبطلنش دوه بكل ، طلعت هدرزت معاهن شويه ورقيت لأنه وحشني 💛🔥.
..
صكرت باب الدار وطلعت التليفون قعمزت ع سرير ورنيت عليه رد من ثالث رنه وقال : احسن وحده
إنتماء ضحكت: احسن واحد 💛🔥
عوّن : تي عنشكلك كنك طولتي عليا ؟
إنتماء: اي صاح م قلتلكش عندنا ضيوف نحنَ
عوّن عقد حواجبه : من ؟
إنتماء: عيت خالتو لهم يومين عندنا
عوّن : وفروخهم حتى هما ؟
إنتماء عقدت حواجبها : اي فروخ ؟
عوّن : واضح سؤالي ، ايهم والفرخ الآخر عندكم ؟
إنتماء م عجبهاش أسلوبه : عوّن مش هكِ م تحكيش ع عيال خالتو هكِ
عوّن : تي جاوبي ازح ؟
إنتماء : اي عندنا ، شن المشكله هما كيف خوتي راه
عوّن عصب : خوتك في عينك الجو هذا مَ يمشيش معايا انا ؟
إنتماء: شن في عوّن ليش انقلبت هكِ ؟
عوّن: تي انا من لما كنا صغار مَ نقبلهم ولا نطيقهم ، اسمعي يابنت الناس هنَّ كلمتين ، طلعه عليهم مَ نبش كثرة دوه معاهم مَ نبش فاهمه ؟
إنتماء لوت وجهه : تمام
عوّن اتكا : ايوااه خلينا متفقين
إنتماء ساكته
عوّن : نحكي أنا ؟
إنتماء : نسمع فيك
عوّن : شن في ؟ ليش لاويه وجهك ؟
إنتماء : لا سلامتك
عوّن : جو شين هذا ، الا انتِ والوجه السمح هذا مفروض مَ يزعلش بكل 💛
إنتماء ابتسمت : مش زعلانه
عوّن ابتسم : ايواه هك نبيك
وفجاءه ينفتح الباب وانا عزقت التليفون من الخوف .
إيلاف : شن عزقتي ؟ شن هذا بتاع من ؟
إنتماء صكرت الباب : ءء خ خخشي نفهمك
إيلاف : احكي حي علينا شن تلبزي انتِ بس حي كان يشوفه إياد ولا ناسيه انه بين فتره وفتره يفتش في دارنا ؟
إنتماء: الله يربحك اسكتي والله مَ انا يلي جبته قعمزي بس نفهمك
إيلاف خذت التليفون : من يلي ع الخط ؟
إنتماء خذت منها التليفون وضغطت ع الحمرا : ردي بالك تطلع منك حتى لِ نغم ؟
إيلاف : احكي رقدتيلي عظامي
..
في الصبح ع الفطور:
طرحنا في الجنان وكان صغير مش جنان فخم كان بسيط ، وقعمزنا نحنَ البنات وماما وخالتو اما بابا كان طالع والشباب نوم ، فطرنا وخالتو وماما كانن يحكن لشي وكأنهن يحكن ع فرح وخالتو كل شوي تقولي عروستنا ، مَ دورتش لأن أكيد علموا بأنه عوّن تقدملي 💛 ، كملنا فطور وضمينا الحوش والمطبخ سريع انا والبنات وبعدها وعوا الشباب وبحكم انه إياد معاهم فَ مقدروش يخشوا حتى شويه 😂🔥 ، وتيتلهم الفطور وشاله إياد للمربوعه ، وطلعت للصاله مع ماما وخالتو والبنات.
نعيمه : لا خلاص نحنَ السبب يلي جينا عشانه انه مرايفين والسبب الأهم تميناه معاكم.
أحلام : والله مَ شبعنا منكم
إيلاف ونغم حاضنات بعض ويحكن كأنهن يقولن ح نرايفوا ع بعضنا.
نعيمه: ان شاء الله ح نزوروكم اخرى توا خلاص لازم نمشوا أيهم الإجازه يلي خذاها يومين كملت .
أحلام : ع الأقل اقعدوا لعند الغداء
نعيمه : والله ياريت لكن ورانا طريق طويله لازم نطلعوا بدري
..
klo0ver_novels
..
ومرّ الوقت ومشوا عيت خالتو وردت حياتنا كيف ماكانت ، سيبوا مكانهم فاضي.
..
كنت في داري نقرا في كتاب لأن عوّن كان وقت شغله م قدرتش نرن عليه ، خشت إيلاف وقالت : إنتماء ماما وبابا يبوكِ في الصاله لوطه.
إنتماء بإستغراب : يممي كنهم؟
إيلاف : نعرفش
إنتماء بِ عباطه : معصبين ؟
إيلاف بصوت واطي وعباطه شر مني : ملامحهم مش مفهمومه مش معصبين بس مش رايقين
إنتماء زمطت ريقها ونزلت
أحمد وهو يشوف للأرض : قعمزي
إنتماء قعمزت
احلام : تقريباً واصلك موضوع العريس الجديد؟
إنتماء خافت لأنها كانت فاهمه الموضوع غلط في غلط وتحساب انهم عرفوا انه عندها تليفون : ءءء لالا ، ش ششنو ؟
أحمد : أيهم ولد خالتك متقدملك وانا عطيته وبدون نقاش ، من بكره بتبدي في بتاتك وتوتي كل شي ، نهاية الأسبوع بيجوا الرجاله ويتموا فيك ، والعرس بعد شهر وكان كثر بعد شهرين.
احلام : اكيد مش ح نلقا خير من ولد اختي راجل لبنتي.
إنتماء كنت في دوامه كنت نسمع وكل خبر ينزل عليا احر من يلي قبله ، مَ قدرتش حتى انقول لا ، بِ أي وجه بنقول لا ؟ ، اكتفيت اني نسكت ونسمعلهم وقلبي يرجف من الصدمه ، ورددت في داخلي ياربي 💔🔥....يتبع✨
..
كلوفر : معش مزال ع الحلقه الآخيره ، توقعاتكم للروايه بِصفه عامه وتقييمكم لها ؟
وخليني نقوللكم اني فرحت لما شفت ناس مش ليبيين يتابعوا في الروايه وشباب مش بس بنات يدزولي في كلام دعم ويستنوا في الحلقات بالرغم اني مَ نفتحش فيهن المسجات بس تأكدوا اني نشوف فيهن ونفرح بيهن بجد ، شكراً لكل حد دعمني حتى بِ لايك ولا كلمه ، شكراً بجد 💛
وانا مستفقده وحده ديمه اتقولي انحبها الروايه واتقولي اخرى ح تقعد في عقلي ومن الكلام السمح هذ وينها مختفيه ☹💛؟
..
Klo0ver_novels 💛
..