"إنتمائي"

(3)💛

✨رواية إنتمائي"روايات كلوفر✨
..
الحلقة (3)
..
إنتماء طبست راسها : لالا
عوّن وهو يشوف للأرض مع ضحكه ع الجنب : هه توقعت
إنتماء شافتله : شن توقعت ؟
عوّن شافلها : هيا خلاص خشي معاهم جوا
إنتماء شافتله بدقه وبعدم فهم وبرمت بتمشي للإستراحه
اما عوّن فَ تنهد وخذا فنجان القهوه يشرب وسارح في الخيل🐎
..
Klo0ver novels
..
خشت إنتماء وشافت باتها يحكي بتليفون ويقول : تبي تجي بكره ؟
فَ عرفت انه يحكي مع إياد وانه خلاص مش ح تطلع من باب الإستراحه (حوش المزرعه) تنهدت بقلة حيله وشافت لأمها وعمتها واختها لقتنهن مزالن يشربن في قهوتهن قعمزت جنبهن
انوار بإبتسامه : شلتي لِ عوّن قهوته ؟
إنتماء ردتلها الإبتسامه : شلتها له ❤
انوار : كويس وتسلم يدك ع القهوه جت ع الطلب بدون م نطلب
إنتماء : صحتين عميمه 💕☕
انوار : اشربي قهوتك
قاطعتهم احلام : لالا إنتماء م تشربش في القهوه
إيلاف وهي تشرب : م تحبهاش عكسي انا
شوي وجا عوّن وحط سفرة القهوه ووجه لأمه الكلام : كنها قهوتك اليوم ؟ امي عارفتني نحبها مرّه انا وهذي حلوه وخفيفه
إنتماء طبست راسها
انوار تحشمت من ولدها : هذي القهوه يلي نحبوها كلنا وبعدين إنتماء شن عرفها بقهوتك
عوّن شاف لِ إنتماء وبعدها لأمه : حصل خير (ومشا لِ باته وعمه )
..
Klo0ver_novels
..
ومر الوقت للوقت يلي كانوا ينظموا ويوتوا في حاجات للشوايات ✨
وإنتماء وإيلاف في عالم اخر مع مُعين وعقله لصغير 😂💛
عوّن كان يجهز للشوي ويشوفلهم كل شوي
وع الأنجيله كان في طاوله كبيره عليها احلام وانوار واحمد وجواد وصوت ضحكاتهم يلي معبيه المكان ❤️
بعد شوي :-
احلام تضبح : إنتماء يا إيلاف تعالن ساعدن خيكن في الشواء وانتن م تبنش تكبرن زي الصغار 🤦🏻‍♀️
عوّن انزعج من كلمة خيكن وقال في خاطره معقوله معتبريني خوها ؟ نسوا كلامهم زمان لما كانوا يقولوا إنتماء لِ عوّن وعوّن لِ إنتماء ؟ ييييه ي عوّن كلام قديم هذا من يذكره غيرك ،
قاطع حبل افكاره إنتماء وهي تقوله ببراءة : شن تبيني ندير 😇
عوّن شافلها وبعد تفكير دام ثواني قال : تعالي معايا للمخزن نجيبوا الشوايه
إنتماء شيرت ع الشوايه : وهذي شنو ؟
عوّن (هالبنت الغبيه) : هذي كبيره خليها للحم ونجيبوا لصغيره للخضره
إنتماء بإقتناع : اها تمام
إيلاف بمقاطعه : نجي معاكم ؟
عوّن : لالا .. ءء قصدي لو جيتي انتِ ح يلحقك مُعين وهك فَ لذلك خليكِ
إيلاف : امم باه وان شاء الله يطلعلكم فار في المخزن ويصكر عليكم باب المخزن بعدك المخزن بعيد شوي يعني عيطوا م تعيطوا م نسمعوكم
عوّن ابتسم وفي خاطره يقول يا ريت ❤️
اما إنتماء بخوف : جديات في فار في المخزن ؟
إيلاف بتخويف : فار كبيير اخرى
عوّن بتفنيصه لِ إيلاف : خلاص عاد بطلي كذب
إيلاف ضحكت ومشيّت مع مُعين 😂💛
..
Klo0ver_novels
..
قدام المخزن
عوّن التفت : كنك وقفتي ؟
إنتماء بخوف : خش بروحك انا نستنا هنا
عوّن : امم بااه لكن افطني في كلاب هنا
إنتماء عيطت ومسكت في كتفه : خلاص خلاص بنخش معاك
عوّن ضحك : هبله وخوافه 😂
إنتماء بشك : تكذب عليا صاح ؟ ☹️
عوّن شافلها بتمعّن وابتسم : لا م نكذبش عليك في كلاب بس مربوطات ❤️
إنتماء تنهدت براحه وقالت بعد تردد : خيي يبي يجي بكره عوّن
عوّن طبس راسه وتنهد : عارف هذا ليش كلمتك هنا قبل ما يجي
إنتماء بإستغراب : ليش كلمتني هنا ؟
عوّن رفع راسه وحط عينه في عينها وقال : إنتماء ترجيني لعند نرتب اموري ونجي نطلبك ؟ ، ولا انا عليش نسأل انتِ ح ترجيني برضاك ولا غصباً عنك ح ترجيني هذا امر سااد إنتمااء ساااااادني حرمااان سااد انحرمت منك كل هالسنين
إنتماء مصدومه وفاتحه عيونها ع وسعهن وم تكلمتش ولا حرف مكتفيه بأنها تسمع وتشوف بس
عوّن انسند ع باب المخزن : احكي احكي م تقعديش ساكته احكي يلي عندك
إنتماء بتردد ويدين يرجفن وقلب يخبط من الموقف يلي عمرها م كانت تفكر يصير معاها : وءءء وإياد ؟ ( لما قالت اسم خوها عيونها تملوا دموع من الخوف )
..
كلوفر : الدموع م لهاش علاقه بالحزن والكئابه الدموع عباره عن إمتلاء من شي معيّن من الفرح من الحزن من الخوف من الحماس ، الدموع إمتلاء يا جماعة ❤️✨
..
عون تنهد بصوت : تعرفي إياد هذا ؟ إياد هذا اكبر عدو ليا إياد هو يلي وقف بيني وبينك وخلاكي اتلاقي بيا وم تعرفينيش
إنتماء مسحت دموعها بكف يدها : لا عوّن ، انا م نسيتكش عشان م نعرفكش ، (وضحكت من بين دموعها ) ع الاقل م نسيتش الشكلاطات يلي كنت تعطي فيهن ليا ❤️
عوّن ابتسم وشافلها : وضروري كنت ناكل منهن فمين قبل م نعطيهن لكِ ❤️
إنتماء : وكنت نسأل في روحي عن السر هذا ليش كنت ضروري تفتحها وتاكل منها
عوّن رد شاف للأرض : م نعرفش بس مُمكن كنت نبي نشترك معاك في حاجه ❤️✨
إيلاف من بعيد تضبح : هياا عاد كان تصنعوا فيها الشوايه راكم مكملين من امبدري
عوّن ضحك عليها : عليك لسان فيها ( ورفع الشوايه و أشر لِ إنتماء : هيا قدامي ❤️
..
Klo0ver_novels
..
كان شعورهم لا يوصف وخاصتاً عوّن يلي تريح بعد ما طلع يلي داسه في قلبه سنين وسنين وزياده اخرى انه إنتماء مش ناسيته ومتذكرته ❤️
اما إنتماء شعورها ملخبط بين راحه لِ عوّن وخوف من إياد وخايفه من الايام الجايه شن ح يمشيهن مع إياد
..
كلوفر : لو تركزوا شوي ح تشوفوا موضوع طارحته في الرواية مخفي بين السطور .
حاولوا تحزروه في التعليقات 💛
زي ما وعدتكم أنه رواياتي ح تكون غير وح تكون هادفه ومن جزء عميق في الواقع الليبي وان شاء الله نكون عند حُسن ظنكم .
..
#رواية_إنتمائي ...يتبع
..
klo0ver_novels 💛
..