"إنتمائي"

(7)💛

✨رواية إنتمائي"روايات كلوفر✨
..
الحلقة(7)
..
عيوني حطيتهن ع إياد وحاولت نبين عادي وم نبينش التوتر يلي انا فيه ...
ردت ماما ع عمو جواد وخشت للمطبخ ونا قلبي يبي يطلع ، قعمزت إيلاف جنبي وسألتها بهدوء : شن مسجلته ؟
إيلاف : ليش تسألي ؟
إنتماء بتنرفز : قولي بلا قصقصه
إيلاف : ع اساس انتِ م تقصقيش توا ؟
إنتماء بصوت عالي : إيلاف م تحرقيش دمي
انتبهلهن إياد : هييي انتِ وهي نقصن اصواتكن م فيش إحترام للموجودين بكل ؟
إيلاف بخوف : هذي إنتماء
إنتماء صبت ورقت لدارها وهي فكره تشيلها وفكره تجيبها لكن الحاجه الوحيده يلي تردد فيها هي ليش رنيت عليه كله منك ي عوّن كنت متريحه بلاك شن جابك ليا 💔
بعد مرور وقت سمعت امها تنادي للغداء تريحت شوي انه لتوا م صار شي ولو انه صار م كانش الوضع ح يكون هادي لتوا ؟
نزلت ع دروج ولقيت إيلاف تشيل في السفره وحطتها في دار المعيشه وقالتلي انلحقلها سفرة العصير يلي موتيتها في المطبخ لحقتها لها وقعمزنا سمينا بسم الله وبدينا انتغدوا
..
Klo0ver_novels
..
عند عائلة جواد ✨
كان الكل مقعمز ع طاولة الأكل ويتغدوا
جواد : عوّني شن في جديد ؟
عوّن ياكل : م في شي عندي إجتماع نهاية الأسبوع والباقي شغل عادي
جواد : ربي يعاونك
عوّن: آجمعين ( والتفت ع مُعين ) هيا كول بيش تكبرلي بسرعه
جواد شاف لأنوار : كنك ساكته ؟
انوار شافت لجواد بعدها لعوّن : اليوم لقيت ثلاث مكالمات من احلام ع صبح انفجعت
جواد : ان شاء الله خير كنها ؟
عوّن يتابع يسمعلهم بدون م يشوفلهم وكان ياكل
انوار وعينها ع عوّن عشان تشوف ردة فعله : لالا طلعت إنتماء
عوّن رفع راسه طول لما سمع اسمها لانه عارف انها مستحيل خوها يخليها تمسك تيليفون وشاف لأمه : وكنها إنتماء رانه عليك ؟
أنوار بعد م تأكدت : امم لالا شي غير ناسيه اكسسوارتها في المزرعه تسأل فيا عليها
جواد : باهي كيف حالهم ؟
انوار : بخير الحمدلله يسلموا عليكم .
..
Klo0ver_novels
..
عند احمد بعد م كملوا غداهم وجابوا عالة الشاهي يلي قدام ام العيله احلام 💛✨
إياد وفي يده عود الأسنان : كنه عمي جواد ران عليك
إنتماء قلبها يدق بقوه من الخوف
احلام وهي تصب في شاهي : مش جواد أنوار لها فتره واخذه شفرة جواد ومعش غيرت اسمها
احمد وهو ياخذ منها في الطاسه : اها وكنها ؟
احلام : لا شي تسأل
ومرّ الوقت وكملت إنتماء حوسة المطبخ لقت خوها وباتها مقيلين
وهي راقيه ع دروج لقت امها
احلام : تعالي ي إنتماء نبيك في داري
إنتماء م تسألونيش ع شعوري وقتها تمنيت الارض تنشق وتبلعني
..
Klo0ver_novels
..
في دار عوّن طق الباب مرتين
عوّن: تفضل
انوار : بترقد ؟
عوّن : لالا بنتريح شوي
انوار خشت وصكرت الباب ومدتله تيليفونها : اقرا المسج هذا
عوّن خذا منها التيليفون
...
احلام : تبي تحكيلي شن في بيناتكم ولا نقولها لخوكِ يتفاهم معاكِ ؟
إنتماء تبكي : يا ماما والله م في حاجه وهذي اول مره نحاول نحكي معاه
احلام بصوت عالي : كيف م في شي ؟ وشن بيأكدلي انها اول مره تحاولي تكلميه ؟
إنتماء وهي تبكي تحاول تهدي امها : ي ماما خلاص وطي صوتك والله يسمعنا إياد يقتلني ي ماما 💔
احلام : تي انا بنقولها له اصلاً يعرف كيف يطلع منك الكلام
...
عوّن بعصبيه : تي للييشش يا امممي قوليلي بس لييشش تقولي فييهها لهاا ؟
أنوار : اها نقولها لها نقوللها تلم بنتها وتفكنا من مصايبها مع خوها
عوّن مسح ع وجه بتوتر : امي البنت انا نبيها ، توا ترني عليها تواا وتقوليلها انه إنتماء م لهاش علاقه بالموضوع وانا يلي طلبت منها
انوار : شنو تبيها عوّن انت انكلبت ولا شنو ؟ البنت هذي لو تقعد اخر بنت في الدنيا مانك واخذها ، انت نسيت شن دار خوها في المزرعه ؟ وانا مش مستعده نخسر واحد من عيالي من جديد بسبب شخص متهور مريض ؟
..
احلام وعيونها دموع : كيف هنت عليك ي إنتماء اديري حاجه زي هكِ من ورايا ، كلمتني تقولي افطنلي لبنتك ولميها ؟ انا يلي نقول إنتماء غير عن البنات إنتماء الهاديه الرازنه اتوطيلي راسي ؟
إنتماء منهاره وتبوس في راس امها : خلاص ي ماما حقك عليا والله م عاد نكلمه ولا نحكي معاه المهم انتِ تسامحيني
احلام تمسح في دموعها : نعطيكِ اخر فرصه ي إنتماء ومش ح نحكي شي لحد لكن لو...
قاطع عليهم صوت التيليفون
احلام : هذا عوّن
إنتماء قلبها دق وعيونها دموع
احلام ردت : ايواه ؟
عوّن : اهلاً عمتي كيف حالك ؟
احلام : من ربي بخير
عوّن فهم انها واجعها الموقف : اسمعِ ي عمتي بنتك انا رايدها بالحلال عطيني الضي الخضر بكره هذ نجيب هلي ونطلبها والفرح م يقعد إلا نهاية الشهر وانتِ عارفتني ي عمتي مش غريب عليك ويلي تبيها حاضر
احلام: اسمع عوّن انا م نبش منك إلا انك تبعد عن بنتي وانت عارف م عندناش بنت تطلع من غير م تكمل قرايتها فَ ياريت تنسا انه صار بينكم كلام سوا ع تيليفون ولا في المزرعه واكيد انت فاهم قصدي كويس
عوّن يحاول يكون هادي : م يصير شي هكِ ، باهي عندي لكِ راي احسن انجي توا خطوبه بس والفرح ع مهله لعند تكمل قرايتها وانا نرجاها عمري كله ❤️.
احلام شافت لِ إنتماء يلي كانت مطبسه راسها ودموعها ينزلن وترجف
احلام : انا والله لو لقيتها مكلمه غيرك كنت مسحت بيها لوطا وحرشت فيها خوها وهو قتلها ومانكش غابي في عمايل خوها لكن لاني عارفتك راجل وتخاف ع بناتي من لما كانن صغار ح نخلي الموضوع بيناتنا ، لكن اعذرني إنتماء مش لك يا عوّن
عوّن: تي ككييف بس مش لياا ي عمتي نقولك يلي تبيها انا حاااضر نجي نطلب ؟ نكلم باتها نكلم خوها انا مستعد عادي
احلام: يلي عندي قلته هيا سلام
وقفلت الخط
إنتماء بعد سمعته كيف مُصر عليا وانا كيف استسلمت بسرعه حسيت بغصه وزدت بكيت بعبره ولما قالتله إنتماء مش لكِ عوّن حسيت بأبشع شعور مُمكن لأي حد يحس بيه ومتأكده نفس الشعور حس بيه هو 💔
احلام : عارفه وحاسه بيك ي بنتي لكن انا نبي مصلحتك فوتي الطريق هذا خيرلك وكل شي في الدنيا هذا نصيب ولو انه عوّن من نصيبك صدقيني لا انا لا امه لا خوك نقدروا نبعدوكم عن بعض ، لكن موضوع التيليفون هذا لا ولا ولا ومية لا
إنتماء مسحت دموعي يلي ينزلن : حاضر يلي تبيه ي ماما
احلام تنهدت : الله يسامحك يا إياد خليت البنت ادير كل شي من ورانا
..
كلوفر : مُمكن لو انه الأهل عطوا كامل الحرية والثقه لبنتهم مع المراقبه ركزوا هاه مع المُراقبه كانن بنات واجد ما غلطنش اغلاط ندمن عليها ولو انه كل ام صاحبت بنتها م كاننش البنات دارن حاجات غبيه من ورا امهاتهن وبرضوه في العكس في يلي معطي كامل الحُريه لبنته بدون مُراقبه وقاعدات دايرات العار ع الأنستا وصفحاتهن مليانه صورهن وحاجات غلط لدرجة انه اي حد يجي يتفرج اول شي يخطر في باله ( وين هلهن ؟ ) وربي يهدي الجميع 💛✔️
..
عند عوّن :
أنوار مصبيه جنب السرير : شن حصلت بعد كلمتها ؟ اساساً شن متوقع تقولك ؟ ، مرحبتين بيك تفضل ؟ ي ولدي حاجه امك مش راضيه عليها م تفكرش انه ح يصير منها تمامم ؟ وتوا ح نخليك اتريح وتمسح الموضوع من راسك نهائي .
عوّن كان مقعمز ع سرير رفع راسه وشاف لأمه : شن شايفه في إنتماء لعند مش عاجبتك ؟
انوار : البنت كويسه ومشاءالله عليها لكن خوها مريييض ي وليدي افهم خوها مشاكله واجدات و..
عوّن صبا : باااههييي شن ذذننببهااا هي ؟؟؟ خوهااا واااحدد مش تمامم هييي شن ددخللهااا ننحنَ انا وياااهااا شدخخخلنا ؟؟شن ذنبنا ي امي ؟
..
Klo0ver_novels
..
في يوم جديد 💛✨
وع طاوله الفطور في حوش جواد ☕🌸

مُعين : بابا قالي عوّن نتيجتي بكره
جواد : مشاءالله اكيد ناجح هاه ؟
مُعين ضحك : اهاا وعوّن قالي انه يبي يديرلي حفله كبيره مش صاح عوّن ؟
عوّن يشرب في القهوه : صااح غير انجح بس
انوار تراقب في عوّن: كول حاجه خيرلك من القهوه
عوّن شافلها وبعدها صبا : الحمدلله ، باتي تبي حاجه ؟
جواد: سلامتك بس
مُعين: انا نبي سيارة تحكم عن بُعد عوّن ، يلي عندي خربت ☹️
عوّن وهو طالع : م في شي لعند تطلع نتيجتك ( وطلع وصكر الباب )
جواد التفت ع انوار : كنه جوا شين عوّن اليوم ؟ وبالأخص معاكِ انتِ ؟
أنوار : لا تهيالك بس هو جوا شين من الشغل بس متراكم وصبح عوّن م يحبش يحكي في الصبح انت عارف
جواد: لا حتى امس من بعد العصر انقلب
انوار صبت تلم في الطاوله : جواد كنك م تكبرش الموضوع الإنسان بطبيعته مزاجه متقلب والحياة فيها ضغوطات يعني م تزيدش عليه ولا عليا بالأسئله لو سمحت ( وخشت للمطبخ وفي يدها كم صحن )
مُعين شاف لباته : تلعب بلاي ستيشن ؟
جواد ضحك : هي دفني للصاله والله هالمره ح نفوز عليك مش زي كل مره
مُعين يضحك ويدف في باته : ح نشوفوا من يفوز ي بابا
..
Klo0ver_novels
..
في حوش احمد ✨
فتحت عيوني وشفت الساعه يلي جنبي كانت واحد الظهر تنهدت بتعب وتذكرت يلي صار امس ليش في الحوش هذا م عنديش اي راي؟ ليش إياد هو المتحكم ؟ مُمكن لأن هو راجل وانا بنت ! باهي مَ انا لما نمشي قريب من داره نسمع فيه يحكي مع بنات ؟ وصبيت بعد التفكير هذا يلي بدون فايده ومش ح يغير من الحقيقه ولا شي.
..
إياد في المطبخ مع امه : أمي في شخص متقدم لبنتك
أحلام سيبت المغرف يلي كانت تحرك بيه والتفتت : متقدم لبنتي ؟ لالا بناتي صغار ومزلت نبيهن يكملن قرايتهن .
إياد : مَ يصير شي يا أمي انا عطيته كلمه وجايينكم نهاية الأسبوع يشوفوا البنت ويتفقوا معاكم ، ها شن قلتي ؟
أحلام :...
..
جواد يضحك : العب كويس ي وليد
مُعين قريب يبكي : ي بابا خليني نفوز 😭
انوار تمسح في يدها : قتلك جواد
جواد وهو يلعب وبدون م يلتفتلها : نعم ؟
انوار : اممم شن رايك نخطبوا لعوّن ؟
جواد شافلها:...
...يتبع✨
..
كلوفر : اسفه ع التأخير في الحلقه بس والله ظروف وانتوا عارفين نجهزوا للإمتحانات وهكِ.
يلا قولولي شن رايكم في الحلقه ؟ حاولت نخليها طويلة بِقدر المستطاع 💛 + توقعاتكم للحلقة الجايه ؟ 🌸✔️
..
Klo0ver_novels 💛
..