"إنتمائي"

(1)💛

✨رواية إنتمائي "روايات كلوفر✨
..
الحلقه (1)..
..
الساعه 10:30 مساءً
إياد يشرب في الشاهي:بس مش معقوله هكي راه؟؟ يا باتي انا برأيي نخففوا شوي راهم مش ضنا عمنا ضنا عمنا يعني ركز شوي عندك بنات راه!!
البنات وأمهن احلام يتابعن بصمت..
أحمد:إيااد؟مش اذا عطيتك تربي خواتك بجوك معناها انا معاش عندي كلمه! أنا نعتبر جواد خوي الوحيد وساد راه البنات كان يشوفن عَوّن من بعيد مش ح يعرفنه وهو ولد عمهن!!
إياد تنهد بقلة حيلة:يعني بتمشي انت وامي وتاخذ البنات؟
أحمد بإستغراب:وأنت مش ماشي؟
إياد ناض:عندي شغل..،كم بتقعدوا يوم في المزرعه؟
أحمد:أنا م كنتش نبيها اطول واجد لكن جواد عزمنا وأصرّ علينا اسبوع ،وانت بروحك حاول تلحقنا تمام؟
إياد وهو طالع:يصير خير
أحمد ألتفت ع بناته ومرته: هيا تجهزوا بنمشوا بكرا بدري

...
Klo0ver_Novels
..

✨في مكان ثاني✨

كان الكل جالس عدا عوّن يلي توا كيف خش
عوّن ينحي في كندرته :السلام عليكم
بوه وأمه:وعليكم السلام
أنوار(امه):نحطلك تتعشى وليدي؟
عَون باس راسها: صحيتي شابع (وأشر بحواجبه ل مُعين )وقال :راقد؟
أنوار:اي عاد يستنى في خيه الوحيد من بدري غلبه النوم
عون أبتسم وبانت غمازاته من اللحيه: عاد مُعيني حتى هو❤
جواد بجديه:بكرا عازم عمك أحمد واهله ع المزرعه بنقعدوا أسبوع نبي العيلتين يتعرفوا ع بعضهم
عون بدت الإبتسامه تختفي و خطرت ف باله إنتماء:تمام تغيروا جو.
جواد عقد حواجبه:مش ماشي انت؟
عون :مش ف خاطري واساساً عندي شغل خلي السواق يوصلكم
جواد: لا يا عون م تحرجنيش قدام خوي الله يفرجها عليك صفي نيتك وامشي والشغل م عليك فيه كلم فوزي وهو يديره كله فوزي موظف قديم في الشركه
عون ماشي ل داره:يصير خير.
..
Klo0ver_Novels
..

عون خش لداره و يفكر كيف نشوفها بعد كل هالسنين؟ اخر مره شفتها كانت صغيره! يوم يلي كانت تبكي لأن إياد خذا منها الشكلاطه.. يومها جبتلها بدل الشكلاطه شكلاطات❤ منعرفش ليش نضعف قدامها! زعما متغيرة ولا مزالت محتفظه بملامح الطفولة يلي مهبلاتني؟ مقدرتش حتى نشوف لغيرها رغم مرور كل هالسنين ، الله يسامحك يا إياد حرمتني شوفتها💔 مش عارف إذا كانت تتذكرني او لا!! البنت هذي غريبه تخليني نضعف بشكل ، قاطع حبل افكاره مُعين خيه يلي خش ويحك فعيونه وقال: نرقد معاك عادي؟؟
أبتسم عون: تعال بس م تتعودش عليها.
..
Klo0ver_Novels
..

في صباح يوم جديد ..الساعه 8:00
في المزرعه كان عون ومعين عند الخيول سمع عون صوت سيارة قلبه رجف شاف أحمد واحلام بس م كانش معاهم حد ثالث خاب ظنه بأنه يشوفها وقال في داخله : احسن ع الأقل نكون على طبيعتي .. هه دارها اياد فينا اخرى..
شير أحمد لِ عون من بعيد بمعنى تعال صبا هو ومعين سلموا عليه وهدرزوا شوي بعد م خشت احلام مع انوار .
أحمد كان جايب معاه اكياس واشياء : انا نبي نخشي هذينَ جوا
عون: م عليك فيهن تو نشيلهن
أحمد:بارك الله فيك (والتفت ع جواد) : مش كان في ملحق للرجاله؟
جواد: اي بس صايرله شوي من المطر والرطوبه يبيله صيانه
خش عون و في يديه الأكياس ضحكت احلام وقالت :احسن حاجه ديمه مشحورك عمك
ضحك عون:الله يسامحك ي عمتي متشمته نوعيتك؟
احلام: لا والله عمك هذا م ينجى منه الا يلي مدعيله ف الكعبه
عون: تو عارفه انا شن ندير؟ نمشي نوصل كلامك ل عمي مش عشان حاجه راه .. بس عشان متتسماش قرمه
احلام ضحكت : شفتي ولدك ي انوار طلع فتان
انوار ضحكت : اسأليني نا
عون:المهم توا وين نحطهن هذينا؟ وأشر ع الاكياس
انوار:في المطبخ خلينا نجهزوا الفطور
عون: (سيبتهم ومشيت للمطبخ وهنا شفتها..نفس النظره نفسس الملامح نفس كل شي.. بنتي كبرت قعدت اطول واحلى❤)
إنتماء:......يتبع✨
..
Klo0ver_Novels 💛
..