#عشق_سرمدي
(4)
شهر شعبان اجة ومتعودين نحتفل احتفال بسيط بمواليد أهل البيت ببدايته وأمي تگول من تاكلون من الچوكليت وتشعلون شمعة اطلبوا مرادكم ..
آني على نياتي طلبت الله يوفقني بحياتي بالجامعة ويزيد من توفيق امي وابوي ويحفظلياهم همة واخواني ..
ما چنت أدري مفهوم التوفيق صعب ادراكه ..
مرات يسلب من عدنا نعمة وتكون هاي قمة التوفيق ومرات يرزقنا شي ويكون اختبار !
و لو ننجح بي لو لا ..
بيوم ال14 من شهر شعبان اندگت الباب وامي گالت روحي شوفي منو ، طلعت خالتي الچبيرة الله يحفظها هي چانت امي الثانية
چان مستوى عائلتها المادي اعلى من عدنا ..
سلمت وسولفنا وفجأة گالت :
ام زنوبة حبيبتي باچر اكو محفل بالمدرسة الحوزوية اللي قريب من بيتنا بمناسبة ولادة صاحب الزمان ..
ما تجون انت والجهال تشاركون وتغيرون جو وتحصلون ثواب هم؟
امي صفنت شوية وجاوبت: لا والله ام حيدر ما اكدر اني ، وحسوني هناك يشلع گلبي وهنا ابو زينب يجي تعبان خطية ..
بس اذا تريدين اخذي زينب وياج تبات يمكم وباچر ورة الاحتفال يجي ابوها ياخذها ..
بس خلي اخابر ابوها انطي خبر ..
-هاا، يلة خوش لعد هلا بزنوبة ..
رحت وي خالتي بعد موافقة والدي .. خالتي عدها ثنين ولد اكبر مني حيدر الچبير خاطب بنت عمه وثنينهم متخرجين كلية تربية انكليزي و علي اكبر مني ب3 سنوات يدرس صيدلة و زهراء بعدها اعدادية وهي اقرب صديقاتي ..
دخلنا للبيت فتح النا الباب علي ، سلم وهو مدنگ ودخل للبيت .. اتعجب شلون تغير هيچ بسرعة ! واحنة قبل كم سنة چنا نلعب سوة ..
چان يوم اكثر من رائع لان عطلة وما عندي دراسة ومتحررة من السادس وباجر اروح للاحتفال ..
بليل قبل لا ننام كالت زهراء خلي نكعد بالحديقة شوية .. صدگ طلعنا چان نلگة علي وحيدر گاعدين بيها يتناقشون .. اللي گدرت اسمعه هو انو الحديث چان حول دولة الامام المهدي وظهوره ..
يتبع ..
_ براء فالح .
