عِشقٌ سَرمدي

٢

#عشق_سرمدي

(2)

خلصتْ السادس علمي وجبت معدل يدخلني هندسة وطبعاً أبوي وأمي وكل أهلي چانوا مفتخرين بية ، لأن جبت معدل 93 بدون ما أدخل دروس خصوصية مثلي مثل باقي صديقاتي ..

أصلاً ما أعترضت ولا حچيت حرف على هذا الموضوع لأن أدري أبوي على گد حاله ..

وبيوم اللي چانوا صديقاتي بالمدرسة يسجلن الاسماء حتى ندخل سوة الدروس ..

و وصلن يمي أني انسحبت و رحت للحمامات .. بچيت هناك هواي
بچيت مو إعتراضاً على حكم الله ، لا ابداً ..

منو آني حتى أعترض ؟

بس يحز بنفسي خاف ما اگدر افرح أبوي واجيب معدل عالي وهو ما شاف سعادة بحياته
خاف آني اكون سبب بحزنه وما يهون علية أشوف عيونه ذبلانة !!

بس نسيت بيومها إن الله على كل شي قدير ، وبفضل الله و توفيقه و لطف مولاتي زينب الكبرى لأن چنت أنذر ألها هواي صلوات وچنت أشوفها قدوتي بالصبر .. گدرت افرح أبوي وطلعت معدل وراحت أيّام الاعدادية..

صرتْ طالبة جامعية وحالي حال غيري هم لازم ألبس احسن ملابس وأكشخ و هم لازم أشتري موبايل راقي ولازم عندي فلوس حتى ناكل اني وصديقاتي بالنادي ..

بس..الحمدلله آني مو هيچ ، إي الحمدلله صدگ مرات تحز بالنفس بس من أتذكر الأيتام والناس اللي ما عدهم امكانية حتى يكملون جامعة
أشوف هاي الامور صارت بنظري مو ضرورية ..

آني أمي ما كملت دراسة لأن چانت حالتهم ما تسمح وأبوي كمل معهد لأن ظروفه چانت صعبة ..

آني حالي أحسن منهم بهواي صحيح هم شفت صعوبات بس أگول الله يشوف وما ينسى عبده ويرزق من يشاء ..

بالنسبة للملابس والموبايل صدگ چانت قصة عجيبة من الله رزقني إياهن..

يتبع ..

_ براء فالح .