مرات نسمع فلان يحب فلانة وقافل عليها نگول الله هذا شگد عاشق لعد وأكيد كلنا سامعين بقيس وليلي بحيث صار ينضرب بيهم المثل ...
بس تعالوا وياي شوية ، راح احجيلكم على ناس
عاشقة بصدق و أصلا شنو قيس وليلى مقارنة بيهم !!
العاشق المعلم اللي انطانا اعظم درس وبعدين صاروا عنده طلاب هواي ويتعلمون منه .. هو سيدي الحسين بن علي عليهم افضل و أطيب وأزكى السلام .. .
الحسين اللي ضرب للكون كله أجمل صور الحب لم ولن يسبقه في ذلك أحد
وطبعا بابا أعتبره أحد تلامذة الامام الحسين روحي فداه من جان زمن صدام اللعين چان بالسر يزوره .. شاف أشكال وأنواع العذاب وما عافه !
چنا مرات نگعد بليل من تطفى الكهرباء وما عدنا اشتراك مولدة (لأن ما عنده فلوس يجدد الاشتراك) .. يگعد يسولف النة عن مغامراته بزمن صدام .. أي مغامرات وتاريخ شرف عظيم هم ...
أبوية بس استشهد صارت الناس تجي تعزي افواج اكو ناس حتى ما نعرفهم .. من نسألهم يگولون چان يساعدنا !
اني عقلي يوگف من اسمع .. لعد شگد عظيم ؟ هیچ انسان قليل بحقه كلمه "عاشق" ..
فهم انه هاي الدنيا يفوز بيها اللي يطلقها بالثلاث فقط وانها مجرد طريق للعبور مو مكان للبقاء !
في يوم من الايام جنت يم اهلي .. وبالذات بيوم أربعين والدي قاعدة بالحديقة اقرا كتاب .. چان تجي فراشة بيضة يمي شكلها يجنن ، حسيت بوقتها بس لو اكدر احضنها ..
عبالك بيها شي جذبني ، شي مو طبيعي ..
فجاة اجت ببالي فكرة اروح لغرفة بابا ، اشتم ريحة ملابسة اشوف صوره و اغراضه .
اي شي يذكرني بي .. فراق الأبو مو هين ولا سهل لو شما احچي وحتى لو العقل اقتنع وآمن ، الگلب شيقنعه؟
سلام الله على رقية بنت الحسين .
هاي الجملة جانت كلش تواسيني ، آني هم احاول اكون قوية علمود اخواني الصغار .. و علمود امام زماني ، اي لأن جنود الامام المهدي ما يحزنهم بس ذنوبهم وبعدهم عن الله ..
الحمدلله الله ارحم الرحمين ولا يعرف عبده أبد .. المهم راحت الفراشة .. وآني دخلت للبيت لغرفة بابا تحديدا ظليت ادور بغراضه ، عبالك شلون الالهام إجاني چان اکو کارتون بي دفاتر هواي ..
صاير ليجوة كلش بحيث الا واحد يركز بلة يلگاه طلعت واحد من هاي الدفاتر مكتوب عليه مفكرة أيام 2014 !
يعني والدي چان يكتب كل شي يصير وياه .. حسيت كلماته مثل الوقود لروحي .. يحرق بس يخليها تستمر !
يعني من صدگ ورة ما قريت ربع الدفتر ، آمنت أن الله يجعل سره في أفقر خلقه و أن الفقراء أحباب الله .. و ان ابوي من هؤلاء الأولياء اللي نقرا عنهم بالكتب ..
أبوي چان يحب الله من صدگ و صابر على كل شي يصير وياه ، شنو من إيمان هذا ؟
شنو من عزيمة؟
ماكر تفسير الها غير كلمة وحدة كلمة تختصر كل الصبر على المعاناة التي عاشها والدي "العشق"
أحد الفصول اللي جان كاتبها والدي الشهيد جان اسمه الذوبان والإنصهار ..
چان يشرح شلون واحد يذوب في الصبر لأجل رضا الله تعالى ويزور أهل البيت من بعيد لأن ماكو بجيبه فلوس الكروه مال الزيارة ..
ويوضح شلون الروح اقوى من الماديات .. وشلون يگدر الواحد يتصل بالله و اولياءه روحيا بأرتباط قوي كلش ..
كلماته بوكتها چانت .. خلتني اسأل نفسي .. ليش أحزن مو هو هذا اللي يريده؟
مو لازم اجتهد حتى اوصل لمرتبته ؟
طبعا من كملت قراءة اغلب الدفاتر صارت عندي خطوات اذا واحد يطبقها ممكن يوصل للي وصل الله والدي ..
إجت أمي لگتني گاعدة بنص الدفاتر وبس أبچي .. هي عبالها لأن مشتاقة لأبوية .
حاولت تسكتني مگدرت ، اجتني نوبة بكاء بيومها يمكن اكثر يوم بي بچیت بعد استشهاد بابا هي هم گامت تبچي وياي .. هنا آني انجبرت اسكت و اوضح إلها
فهمتها دموعي مو مال واحد مشتاگ ..
لان بعدني ما واصلة لهاي المرحلة لأن بعدني متأخرة كلششش دموعي مال واحد هسة يلة لكة الطريق دموع حسرة وندامة .. مال واحد هسة يلة صحي ويريد يتلاحگ اللي باقي من عمره..
من حجيتلها باستني من راسي وراحت كملت شغلها ..
الخطوة الأولى ، الغسل .. يعني تغسل روحك قبل بدنك من كل صفة سيئة ومذمومة يعني تنوب عن كل ذنب حتى لو جان أثره حلو عندك .. المفروض نكره كل ما لا يحبه الحبيب ..
الخطوة الثانية ، التجرد من كل شي دنيوي يعني أن يعيش الواحد مع أهل الأرض لكن قلبه و روحه من اهل السماء...
الخطوة الثالثة ، ها ؟
بس لا تنتظرون خطوة ثالثة !
الكل يعرف وين الخلل بنفسه لازم فورا يصلحه كل شخص أعرف بالعلة مالته ..
خلونا نصلح أنفسنا هم علمود نصير من تلاميذ الحسين ونتعلم منه شوية مثل أبطال الحشد الشعبي ويصير عشقنا سرمدي و هم بلكي الله يتلطف بينا ويكتبنا من جنود الحجة عجل الله تعالی فرجه ..
إنتهی .
تمت بحمد الله تعالى .
بقلم : براء فالح .
