(6)
دخلنا للبيت اللي چان بي الاحتفال والعطر تارس المكان و چوكليت و حلويات ، حسيت كل شي فرحان حتى الجمادات سألت نفسي لعد اذا ظهر الإمام شلون ؟
شراح يسوون الناس اللي يحبونه؟
چانت اكو بنية صغيرة بالباب تسجل اسماء اللي يدخلون حتى تخليها بالقرعة و اكو هدايا للفائزين ، سجلنا أسمائنا ودخلنا .. الأجواء اكثر من رائعة جانت ..
اني طايرة من الفرحة بس أشوف بعض النسوان چانن يبچن مرة ومرة يفرحن يعني هيچ مشاعر مختلطة !
مالگيت تفسير لهذا الشي بيومها .. بس من عشقت مولاي صاحب الزمان بصدق..
عذرتهن .
چانت أكو بنية شابة بعمري تقريبا گاعدة على جهة ، أكثر وحدة متأثرة بالمجلس .. لابسة كوفية جوة العباية مثل اللي يحطونها المجاهدين على ركبتهم ، أشوفها كل شوية تمسح دموعها بهاي الكوفية ..
حفظت شكلها زين لان صايرة گبالي .. المهم خلصت تقريبا كل فقرات الاحتفال بس آخر شي بقت اسماء المسابقة ، گالوا الفائز الأول هديته ثواب دعاء الفرج ولازم هو يجي يقراه !
اني خفت بس لا يطلع اسمي .. لان بطبعي جدا خجولة .. الحمد لله مو آني ، گالت الملا بالسماعة : العلوية فاطمة محمد الموسوي وينها ؟
استقبلوها بالصلاة ع النبي وآله ..
شو أني شفت البنية ام الكوفية گامت من مكانها إي طلع هي نفسها یا الله عجيب شگد عدها هيبة و وقار .
معقولة هاي بسبب حُب إمام الزمان ؟
يعني مثل العباس لان عشق امام زمانه ، الله أعلى شانه ؟
بيني وبين نفسي گلت هیچ وصار عندي فضول أعرف شلون راح تقرا دعاء الفرج اذا هي كل دقيقتين چانت تبچي !
ما أبالغ اذا اگول أجمل دعاء سمعته بحياتي ، حسيتها تقرا بحُب وتدعي بصدق !
من تگول عجل تحچیها برجاء وحسرة ..
خلص الدعاء ، اجة وقت اعلان الفائز الثاني .. وهديته عباءة من إمام الزمان !
وچان اسمع اسمي تذيعه الملا .. تجمدت بمكاني ، بحلم لو بحقيقة أني ؟!
زهراء تگولي : گومي زينب ما تسمعين ؟؟
وخالتي هم گالتلي .
اني بوقتها بس أريد أستوعب اللي ديصير !!
تالي مگدرت أروح أجيبها ، راحت زهراء بمكاني ..
و من أخذت العباءة منها حضنتها وبچیت وخشعت، حسيتها أول الغيث مثل میگولون.. حسيت الحلم اللي شفته تحقق تماما ..
التفتت لگیت العلوية فاطمة تباوع عليه وتتبسم .. اني هم ابتسمت الها .. ومن طلعنا يم الباب صارت طلعتنا سوة سلمت عليه هي ، رديت السلام ودنگت .. هي بقت واگفة وگالت :
هنيئا إلچ حصلتي هدية من الإمام .. شتريدين بعد .. هاي نعمة چبيرة مو أي واحد
ما عرفت شأرد عليها بس
گتلها الحمدلله ..
مرات شخص نشوفه مرة وحدة نتمنى لو يبقى ويانا كل العمر .. اني هيج حسيت .. تمنيت نصير صديقات و نسولف يومية و أسألها عن كل شي ببالي .. قطع سلسلة افكاري صوت خالتي صاحتتي حتى نروح ودعت العلوية بحسرة ، چان عبالي هاي اول و آخر مرة نحچي بيها .. بس اللي صار مو هيج ...
