(13)
و اجت ایام محرم وصفر .. وخلالها طبعا أثبت شگد پراعي عدم الاختلاط وشكد محافظ على صلاته بوقتها ..
صارت عندي فكره عنه ، حتى بلش يغير هواي بشباب المرحلة .. چان رسالي بالفعل ، هنيئا اله.
وبس عدت أيام الحزن ، بيوم من الأيام صاحتني وحدة من الدكتورات تريد عنواني ومعلومات علي !
تعجبت اني على الرغم من انها دكتورة حبابة ومتدينة وجبيرة بالعمر وعلاقة الطلاب بيها طيبة .. بس ترددت انطيها اللي تريده فسألتها: دكتورة شتسوين بيهن؟ گالت: نريد نجي عليكم خطار هاليومين .. آني هم على نياتي انطيتهیاه وگتلها هلا بيكم و ما ادري شنو الفلم ..
ورة يومين اندكت الباب العصر ، الله ستر ما جان أبوية بالواجب .. دخلوا ورحب بيهم وآني هم چنت فرحانة لأن أستاذتي تزورنا | وأني دا اباوع من الشباك انقبض گلبي من شفته !! |
هذا رضا !! شيسوي وياهم ؟
"وعلى قدر صدق نواياكم ترزقون" خطبوني و طبعا وافقت وين ألگة مثل رضا ؟
جان متفق انه بالعطلة الجبيرة يصير الزواج .. لكن والدي .. أصر أن يصير قبلها .. عبالك ان يدري راح يصير شي ..
تزوجنا والكل جان فرحان .. ما مر غير كم أسبوع وچان نسمع خبر يعصر الگلب .. أصلا ياذي الروح ..
أرجع وأگول محد يحس بالم الفقد بس الفاقد ! گاعدين بأمان الله جان يجي اتصال من فاطمة سلمت وهي تلهث .. وبس تصبر بية واريد افتهم منها شي ما افتهمت وتسويلي "هنيالكم حبيبتي ، الله يحبكم " گتلها :ميخالف بس اريد افتهم شكو فاطمة ؟ ردت وياريتها ما ردت ! "أبوچ استشهد" جملة من كلمتين بس ألمها ما توصفه كل حروف اللغة !
صعبة صعبة .. من يسألك أخوك الصغير "بابا وين ؟ شوكت يرجع؟" شلون تفهمه أبوه راح .. راح وما يرجع بعد ! لو من يمسحون الناس على راسهم لان صاروا يتامی ! | لو من يجي العيد وانت بدون أبو .. تروح تعايده بوادي السلام ... والعيدية انت تنطيها اله ، ماي ورد و عود بخور .. .
هیچ صور ما تشوفها بس بعوائل الحشد الشعبي المقدس اللي دول الشر كلها وگفت ضده وظل واگف بحيله وما طاح ! من تجي تسولف عن قصص المجاهدين ، عقلك يعجز عن الادراك وتسال نفسك معقولة هذولة عايشين ويانة؟ احنة وين و همة وين !والحمدلله الله اصطفانا وصرنا من عوائل الشهداء أمي زوجة شهيد صارت وآني بنت شهيد بكل فخر ..
اللي عجبني طبعا القوة اللي عند أمي ! عجيب صبرها ، مو بس هي وانما اغلب امهات و زوجات الشهداء اني أقول يمكن الله ينزل على گلوبهن السكينة ، يعني هي قبل فترة تگول ما راح اتحمل .. شلون هسة تواجه الموقف بكل قوة وصلابة !
ورة ما خلصت الفاتحة أمي تستوحش تبقى وحدها صرنا نجي اني ورضا يمها .. رضا شما احجي عنه قليل .. صدگ الله عوضنا بي عن أبوية صح ما يسد فراغه بس ع الاقل صار رجال البيت .. و مرات افكر أگول ليش چان بابا مصر أن أتزوج بسرعة عبالك ان يدري أيامه قليله .. ويمكن يدري ؟ الله اعلم ..
يوم عن يوم الله يكشف النا شگد أبوية عظيم وشگد الشهادة تريد واحد يتهيا الها و مو أي واحد يحصلها !
