عِشقٌ سَرمدي

٥

#عشق_سرمدي

(5)

علي سأل حيدر : يعني هسة برأيك الامام ليش ما يظهر ؟

اني وزهراء وحدة باوعت للثانية !! وببالنا گلنا صدك ليش ما يظهر ؟

حيدر جاوبه : المفروض لان ما مكتمل العدد 313 مو؟

علي گال : اي هذا الجواب النموذجي اللي نضحك بي على روحنا !

زهراء ما تحملت من يمها سألته بأندفاع : لعد شنو الجواب بالله دكتور علي بدون زحمة ؟؟
اني حاولت اسكتها واخليها ما تتدخل بس ما گدرت..

طبعا علي وحيدر انتبهوا على وجودنا وثنينهم يراعون الحدود الشرعية فعلي استأذن من حيدر وراح بدون ما يعلق شي على رد زهراء بس ابتسم الها ..

رجعت زهراء گالت لحيدر : هسة شنو الجواب ما افتهمنا ؟

جاوبها وهو يضحك : ما يصير المراهقين يعرفون الجواب ..

طبعاً يتشاقة وياها وهم درس الها حتى تسأل بأدب ..

اني هم ضحكت عليها لان تضوج من واحد يگوللها مراهقة ..

وبقيت بس اني وياها بالحديقة ..
بيومها شگد حچينا عن الامام المهدي روحي فداه
الى أن حسيت باچر راح يظهر !

فكرت لو يومية هيچ نذكر الإمام فدوة لأسمه يمكن ما يتأخر علينا هلگد ..

نمنا وكعدنا الصبح واني عقلي يم سؤال علي تمنيت بيني وبين نفسي الگة جوابه بالاحتفال اللي راح نروحله ..

بدلنا وخالتي وزهراء لبسوا عبايات وآني لبست عباية اسلامية (صاية) .. حسّيت أكو خلل لأن مختلفة عنهن آني..

وشي بداخلي بلش ينجذب نحو العباءة.. وخاصة بعد المنام اللي شفته قبل كم يوم..

طبعاً ورة صلاة الفجر طلبت من الله بحق هذا اليوم العظيم يدليني على طريق الامام المهدي وأصير أعرف عنه مثل علي وحيدر وغيرهم من الناس اللي يحبونه وقريبين منه ، بس ما توقعت هيچ بهالسرعة تصير الإجابة لدعائي !

يتبع ..
_ براء فالح .