علاء غادي بطوموبيلتو ماعارفش فين غايقصد ثلاثة د الاطباء كلهم مجموعين على ان رحلة العلاج طويلة...
علاء: الا مشيت لبرا غانصدق مضيع البلان د لفيلا د مسيو المدني لي جيت مسافر على قبلها.. باينة غايشدوني تما بففف (ضرب بالكلاكصون)
واحد مول لكروصة كان دايز تخلع بدا تيسب و يعاير..
علاء تيشوف فبزولو واحد اللحظة طلع راسو بانت ليه كروسة الراجل مكتوب عليها : لمعالجة القذف المبكر و البرودة..
الراجل لابس لبيض كولو بحال مول لبابوش و كروسطو عندها مظلة..
علاء قالت ليه طاااق ف راسو طلع عينو لقا راسو داخل منطقة شعبية فيها مالين لخضرة و ديسير و لجزارة و لعيالات كلشي بملحفتو ولا جلابتو تيتقدا..
علاء ركن الطوموبيل و هبط بان ليه مول لكروصة غادي و جرا لعندو : وااا الشريف واااااا الشريف
الراجل وقفو دار لعندو: هذا نتاياو طيحتي مني النص كاع العشوب لي خديت ضربتيهم ليا ف زيرو
علاء: سمحليا ا لواليد هادشي علاش بغيت نسولك
الراجل: تا دوي
علاء تيتلفت وحل صدايف التيشورت د لاكوسط لي لابس..
الراجل : اااه ا لبزول عرفتي هادا هوا سبابي حتا طجيت تابعو ولد لحرام هييه باش فكرتيني
علاء: حتانا بحالك كرهت باباه لكلب عاوني و نعطيك لي بغيتي راه مرضني
الراجل تيخمم: انا دابا هاز معايا غا تاع التحية و القذف المبكر لي تنقولو ليها لا زربة على صلاح فهمتيني و عندي تاع الزغب و لعشبة تاع ضرب و قيس..
علاء: هادشي كولو معندي بيه غاراض.. بغيت نحيد هاد لماراض
الراجل تيحك لحيتو: شوف غانسيفطك عند الشريفة تودة راها فالدخلة د السوق جيهة العمارات الدرب د لعشابة سول عليها راها دقة بطلة..
علاء خشا فيه واحد الزرقة و ضربها بجرية لعند تودة..
وئام بوحدها فالزنقة لي لابسة مانتكة و لبزول يطلع و يهبط زادتو حتا طرف من لحلفة ملي بغات تخرج.. تفكرات لورقة جبداتها..
وئام تتقرا بصعوبة خط امها : لبن الضرك.. شعر الحجلة.. صبع عوا.. اشاواهادا واش هادو عشوب ولا بخور ولا اش (قلبات لورقة) ايهايااا هادشي مزال طويل.. شوك الشرن.. كف لعفريت..
بقات وئام تتقراهم و هيا داخلة للسويقة..
زنوبة حطات لحلوة للعدول لي عاد دخل و اتاي..
زنوبة: مرحباااا ب سي بيهي وا زارتنا البركة و سمحلينا عذبناك معانا من لبلاد لهنا
بيهي معندوش السنان تيعض فالكيكس و يدوز ب اتاي: اوا ا لالة زنوبة مشفنا منكم غا لخير و نهار كبير ملي غاتناسبو زوج من كبار لعيلة فالدواور انا مزهار و بلفرحات عليا نكاتب ولد سيد الشيخ ب بنت لحجام قدور
قدور تحلات ليه تعرش: اوا نتا احسن و افضل ا سي بيهي لهلا يخطيك
بيهي سالا مع لحلوة تيمسح فيديه: اوا اسيادنا اتاي شربناه و عاودناه فين لعرسان تاعنا
الشيخ: ها ولدي بلار سمية على مسمى من نهار ماتت امو الحاجة يامنة و هو هاز الدار بالفلاحة و كلشي و دار الشاراكا تاعو فالبونتغان تيصر الدلاح ل.. اسميت هاديك؟
بلار: اوروبا ا لواليد (حشمان)
العدول: تبارك الله علاه سي بلار خافي علينا.. وفين لالة وئام زينة لبنات ولا شاداها لحشمة فبيتها هاهاهاها
زنوبة تجمعات: بحاال الا علمك الله ا سي بيهي و راه انا و باها تشاورنا معاها و هيا قاابلة و شكون ميقبلش (تتضحك بزز)
العدول: اوا هاد لخبار تتفرح ا لالة زنوبة.. اوا هبطيها نسمعها منها باش نكتبو ليهم و الله يكمل بلخير
قدور بغا يدوي حبساتو زنوبة: واا سي بيهي راه زعما حنا جيران فالدوار واش مكذبنا را قلتليك لبنت حشمانة و قاابلة باصمة كاع
العدول: حاشا (تيتلفت ليهم) حاشااا مكذبت حد ولكن ا لالة زنوبة ميمكنش نزوجهم الا مشفتش انا لبنت واش نزوج لولد للريح
الشيخ: نوضي ا لالة زنوبة هبطي عروسة ولدي را سي بيهي عندو لحق
زنوبة وحلات ليها لهضرة و ناضت طلعات للبيت..
