يسار صاك بابتسامتو الخبيثة: غانوريك ا سي علاء شحال انا راجل عليك و بلي المجد تيصنعوه لفلوس
نرمين وقفاتها الطاكسي حدا دار وئام و هبطات تتعرج بطالونها مع الطريق محفرة.. بدات تتدق حتا حل ليها قدور مطلع رجلين السروال.. غا شافها طلع لعلام..
نرمين: الحاج قدور لاباس عليكم جيت علا قبل نرمين غبرات و حتا لبنات ماشافوهاش و متتجاوبش فتلفونها
خرجات زنوبة دافعة قدور حتا تلفاتو : اش بغيتي عندنا ياك تبريت منك اهاد السكوليطة
قدور تيكمكم: كاينة شي مونتيفة قدك شو الزين تبارك الله
زنوبة: دخل طفي للكاميلة الله يطفي ليك لحس
نرمين تتهضر بالاشارات: راه ا خالتي غا..
زنوبة: اخوي ليك الجناب (تتشوف فيها) يااربي السلامة
دخلات زنوبة و سدات عليها لباب
نرمين مربعة يديها: تي هادي مالها يالطيف فين غايكونو دارو ديك الصكعة وا انا مفهمت والو كاع لي قلبت عليه ليوم تنلقاه غابر.. علاء مخليت فين قلبت عليه و هادي حتاهيا غابرة وليني حريرة
مشات نرمين تاني جيهة الشانطي تتشير للطاكسيات..
يسار وصل قدام لفيلا د والدين علاء..
يسار: مخصش لواحد يقول كلشي خصو يخلي دايما اسرار لنفسو.. هانا لقيتك ا علاء
هبط يسار و ضرب لبنو د طوموبيلة علاء برجلو.. هز الجوا و دارو فلداخل د سويكلاص...
رجع حل الطوموبيل و طلع راسو مع هبطو عاود طلعو بانت ليه شي بنت تتطل من الشرجم لفوق.. وقف تيشوف فيها تتقيس الجالوق..
يسار: شكون هادي؟ زعما تكون خدامة عندو.. منضنش.. هادشي مفخباريش
يسار لصق عينيه بيها حتا ركب و ديمارا..
وئام تتعوج قدام لمراية حتا شدها علاء من ذراعها..
علاء: معامن تشاورتي؟
وئام: اربي لاما سمحليا راه غا تنقيسهم
علاء بدا تيجمع الجالوق: هادو تاع امي
وئام تتحك عنقها: ااه قوليا شفتك معندك خدمة مقابل غا الدار
علاء: منقدرش نمشي للخدمة بهاد لحالة خصني حتا نحس براسي مزيان.. اجي بعدا واش هادشي سوقك
وئام مربعة يديها:ا لا اشبغيتك (تلفتات للشرجم)
علاء قرب: علامن تتطلي؟
وئام: لا والو غا شي حد كان موقف طوموبيلتو هنا و ت تت كنت زعما تنشير ليه والو عور
علاء نفاجر بالضحك: واش تتحلمي.. حتاواحد ماعارف بلي انا هنا داكشي علاش غير رتاحي..
علاء خرج و خلا وئام تتطل: بففف واقيلة مشافتيش ولكن بقا تيشوف فيا زعما يكون مشا يعيط على لبوليس اوا ع الله..
وئام رجعات مكمشة فوق النموسية..
