خرج علاء من لفيلا هاز معاه زوج مخططات و فاليزتو..
علاء: غانحط هادشي للكاتبة بفف نسيت الزمر (طلع راسو شافها تتطل من الزاج بحال شي عصفور ساد عليه فلقفص) ههه لي شافك يقول هنا تجمعات لبراءة ونتي خاشية طون دلحلفة فصدرك كخخخ
علاء حل الطوموبيل و بان ليه جوا فوق الزاجة هزو مافيه لا سمية لا والو.. حلو.. وهنا تبدلو ملامحو احس بغصة فقلبو ممكن ماشي حيت نرمين لي فالصورة ولكن حيت صاحبو فلخدمة لي كان تيعاود ليه تفاصيل حبهم و كيفاش كان ناوي يتزوج بيها و يكون عائلة..
علاء جبد سلسلة عنقها قطعها طراف و حكها مع لرض و ديمارا..
من مورا اشجار بالجردة كان يسار تيشوف فيه من بعيد حتا غبر و خرج تيتمشا و يتلفت حتا وصل مباشرة حدا لباب طلع راسو فالشرجم..
وئام هبطات راسها شافت نفس الشاب حدا لباب معرفاتش علاش قلبها مارتاحش ليه شدات فصدرها و تسندات مع لحيط..
يسار: عرفت بلي نتي هنا
يسار بدا تيصوني..
وئام توثراث معرفاتش واش تطلب النجدة منو ولا تتخبا.. يسار بقا يدق الباب بالجهد..
يسار: حليي حلييي
وئام تخبات مورا لخامية مرة مرة تتطل حتا بان ليها ركب و مشا.. عاد بقات تتطل عليه مرتاحتش لطريقتو فالنظرات و الدقان..
زنوبة واقفة حدا سبيطار د لمخزن و بان ليها قدور جاي تيخاصم..
زنوبة شداتو من لكول د الجلابة: فين بنتي ماتت ياك قتلوها
قدور: الله يهديك اهاد المراة وا صدقات ماشي هيا هبطوني للفريكو غا هكاك حتا واحد لفرملية ليزازيها بخير دوراتني فكاع الشامبرات
زنوبة سبقاتو: زيد تبعني
دخلات زنوبة تتحل لبيوت واحد تابع لاخر حتا تحطات عليها واحد لفرملية شمنك يا عرض شمنك يا مطرييل لابسة سروال بيض و داكشي مفلج و الصدورات..
قدور: هادي لي قلتليك ا زنوبة راه دوراتني السبيطار كامل عطيتها الرضا
زنوبة شافت فيه: الرضا؟ ااشمن رضا
الفرملية تتدوي برقة: لالة راه ماشي من النظام هادشي لي تتديري فيه
قبل ماتكمل طاحت عليها زنوبة بلعضان و لقميش حتا مبقاش سروالها بيض غا فكوها لفراملية..
علاء وصل مقاولة الحاج المدني و كلشي تيسلم عليه على غبورو و دخل عند الكاتبة..
علاء تيدور فراسو: مبانش ليك واحد يسار؟
الكاتبة: لا ا مسيو علاء حتا الحاج المدني عيان هاد ليامات مبقاش تيجي بزاف
علاء: خودي هاد لبلانات الا جا يسار ولا الحاج عطيهم ليه حيت مغنقدرش نحضر شي يامات
الكاتبة: ياك لاباس ا موسيو
علاء: غير شي حاجة شخصية تهلاي فراسك
علاء هبط مع الدروج حتا تتبان ليه طوموبيلة يسار عاد وقفات حدا الشركة.. خرج تيسد عينيه بالشمس مبتاسم ليه...
يسار هبط حال ذراعيه: مرحباااا ب خويا و حبيبي وا غبرتي على الشركة
علاء عنقو و هو مشمئز منو : لباس عليك قالوليا بلي دخلتي فعلاقة جديدة ياك هههه
يسار جمع الضحكة: اوا اسيدي الاخبار دغية تيوصلو ههه
علاء دار عليه ذراعو فوق كتافو وجبد التصاور من جيب التجاكيتة مدهوم ليه..
علاء : خود هادو دير ليهم لكادر و لصقهم فبيتك ولا فلبيرو د الشركة
يسار بعد منو: اهاه منين جاوك (شدهم تيقلب فيهم)
علاء قرب منو مبتاسم و يديه فجيوبو: جابتهم ليا لحمامة ههه المهم انا و نرمين تفرقنا من شحال هادي خودها حلال عليك
يسار قرب منو: بلا شك حتا نتا لقيتيها محلولة ههه
علاء: لا للاسف ههه انا منلتش الشرف لي نلتي (بابتسامة)
يسار: اش بغيتي تقصد؟؟
علاء: ههه انا موسختش بيها راسي
يسار احس بالاهانة دفل فلرض: بغيتي تقنعني بلي حبك ليها صافي تبخر تتبرد على راسك ا صاحبي نتا مستحيل نرمين تديها فيك حيت..
علاء قجو زداه مع لحيط: يسار نتا تجي معاك.. انا متجيش معايا وحدة بحالها
يسار تيضحك بهستيرية: متقولش ليا بدلتيها بهاديك لي عندك فالدار ذوق عندك اصاحبي كيدااير
علاء طلقو بتخنزيرة: شكون.. علامن تتدوي؟ واقيلة الصدمة اثرات فيك كنتي عوال نبكي ونتخنن على وحدة عاهرة بحال نرمين
يسار: البنت لي عندك فالفيلا.. انا متاكد بلي نتا داير شي موصيبة و مخبيها شكون ديك لبنت؟؟؟
علاء قجو ثاني : غاتبعد من طريقي ولا غانخلي باك الحاج يعرف بكاع داكشي لي تتدير فالشركة من موراه و الا كان حارمك من البلانات فدابا غايحرمك من الورث حتاهوا (دفعو بالجهد)
يسار تيحرك فالفك تاعو: واخا ا علاء.. تنواعدك بلي غانكشف سر البنت لي معاك هيا عشيقتك ياك انا غانفضحك
علاء قرب منو و يسار مشا ركب و ديمارا..
علاء شاد جنابو: منين طاح عليا ثاني هاد لويل
تفكر وئام لي خلا فلفيلا و ركب طوموبيلتو و مشا..
وئام مضاربة مع لباب لي كان مسدود بالساقتة من برا و رجعات للشرجم..
وئام: معرفتش انا كيدار حتا بلوكا هاد الشرجم اول مرة نشوف شي شرجم متيتحلش اووف
تتدوو فعينيها بان ليها لبلاطو د لفطور لحسات كلشي بقا غا كاس لقهوة خاوي و بواطة د لكونفيتير ملحوسة فيها موس د الذهن.. جرات هزاتو بقات تتحل فالشرجم هاك بالاك حتا دورات القفل و تحل.. ضرباتها بغوتة تفيق لميتين..
وئام تتطل بان ليها داكشي عالي بقات تتلفت بان ليها سلم الانقاذ ولكن مجموع وقفات على الشرجم تتدفع فيه عندو فقرات حتا تحل وتم هابط حتال لتحت.. دارت رجليها لي حفيانين فوق درجة وشدات و دارت الرجل لخرا..
وئام: ويييييو شفتي كون عندي لبزول كون ثقل عليا سكت افمي اصلا هوا سبابي فهاد لمصايب
بدات تتهبط حتا وصلات لتحت تتدور فراسها و ضرباتها بجرية حتا تلاقات بالباب الحديدي لكبير..
وئام تتدور عينيها بان ليها السور معاليش بزاف يالاه خممات تمشي تنقز و هو يتحل الباب الاوتوماتيكي و بانت ليها طوموبيلة علاء ضرباتها بجرية و هو هبط تيجري موراها قربات السور معرفات تجري معرفات تنقز هزات حجرة كبييرة..
وئام: والله و تقرب مني ا بلمبزل لاخر حتا نفلقك
علاء: افف خلعتيني كيفاش قدرتي تخرجي اراي ديك لحجرة وزيدي
وئام: وا غانفلقك غانفلقك مفراسكش شحال من واحد فلقت
علاء تيقرب منها : واتي اراي النم واجي (مد ليها يدو)
وئام تيسالي معاها ملي تيشوف فيها هكاك مدات ليه يدها ليسرية و هزات لحجرة الله مصلي عليييك و ضرباتو للراس..
علاء طاح على ركابيه شاد فراسو: اجييي
وئام نقزات مع السور و تتجري حتا وصلات الشانطي ماكاينين لا طوموبيلات لا والو و هيا تتنقز بالفقسة ولخلعة معرفات حتا جا موراها شدها من خصرها و هزها غادي بيها..
علاء: هاد الجرحة د راسي غاتخلصيها لمك غاتبقاي النهار كامل بلا ماكلة و الشرجم لخشب لي غاندير ليه..
وئام تتضرب برجيلاتها تطلب و تزاوك..
