فاقت وئام الصباح لبسات تيشورتها و صايتها لقصيرة و هزات صاكها و هبطات..
زنوبة عيطات ليها: فين غادة بهاد لحالة
وئام: شمن حالة ا ممي راه تعطلت
زنوبة: هزي طرف د لبونج لي قلتليك واش بغيتي تبوري ليا هنا
وئام: احسابلي غاتقولي ليا نفطر بففف
وئام خرجات خبطات بلباب..
زنوبة: اويلي وعدي بنت وحدة لينكساب معندها عقل
قدور خرج بكيلوطو هاز عرمة د لكلينيكس: قلتهاااليك و مولدنا حتا شي بنت مسكدة لي تكبر ليا الطاسيلة
زنوبة جلسات تتندب..
فلاصال جالس علاء على المكينة تيتجبد و كولو عرقان حتا جا حداه صاحبو غالي..
غالي جلس: اوا اخويا تكرفصتي هادي سيمانة ونتا مع لانطرينمون و حتا ضلعة مانوضتيها
علاء تقاد: اوا شفتي قولها لهاد الصحاب لعوجين راه الا بقيت هاكا نرمين غاتدير لحفاد وانا مزال مسلوت
غالي تيتلفت: شوف ا صاحبي وااحد الحل لي لقيت ليك
علاء : عتقني اصاحبي غانتسطا
غالي: غاتاخد دوا تاع تكبير العضلات.. البروتين
علاء: واش نتا مسطي واقيلة بغيتي ترجعني للسبيطار نتا
غالي : وا لااا راه البروتين هوا لي غايكبر لك لاماص اما هادشي لي تتدير راه مزال طويل ونتا قلتيليا بلي صحيبتك منيشة على شي واحد فلافاك
علاء: كريم لي قالهاليا راه معاها فالشعبة قاليا بلي كلشي تابعها و هيا تتعوج فمشيتها.. مؤخرا ولات منيشة على واحد عندو شي ماستر تما الا شديتو نفرسو
غالي: بهاد لعضيمات نيت.. فراسك هاداك تيلعب التيكواندو و عندو السماطي اما نتا اخويا علاء عندك الجلدة قارقة ع العظم
علاء: اوا اخويا تكرفصت فالسبيطارات مغنشرب حتا بروتين هاد الساعة انا قررت نتسناها حدا لافاك ليوم و ندوي معاها
غالي تسند: اوا شحفتيني (شرشف العصير)
نرمين خرجات من المدرج بانت ليها وئام جالسة فوق كرسي د السيما فالساحة ساهية و مشات جلسات حداها..
نرمين: هيييه وئام ياك لاباس
وئام تلفتات ليها: واش دابا الا مشيت لشي دولة ف برا مغيكونوش تيبغيو لبزول هادو قهروني
نرمين نفاجرات بالضحك: وا شفتي واخا تمشي ل لاندوشين لبزول راه عالمي فين ما تمشي يطلبوه ليك بحال كارط ناسيونال
وئام: اوا هادشي مشكل ليا عقدة نفسية حتا بنات الفاميلة كلهم مبزلات غا انا لي خرجت هك
نرمين: راني قلتليك اش تديري (هزات كرطونة من صاكها) هادي حبة وحدة بعد لعشا و ف سيمانة يوليو عندك بحال المخاد
وئام هزات لكرطونة و رجعاتها ليها: لا اختي هادشي تيخلع انا غانصبر و نتسنا فارس احلامي
نرمين: اوا ياختي باز ليك..
مشات نرمين و خلات وئام هازة راسها بين ذراعيها..
فالدار عند زنوبة لي كانت جالسة تتعجن و صدرها مدلي حدا لكصرية حتا سمعات الدقان..
قدور خرج من الطواليت مطلع رجلين السروال و هاز مقراج: صبري نحل
حل قدور لباب : اهلاااا لالة حبيبة لاباس بيهير لاباس دراري لاباس كلشي هاني واغبرتو دخلي دخلي..
زنوبة تتطلع فراسها..
قدور: هاهيا ختك حبيبة جات
زنوبة تتمسح لعجينة: اهلااااان نهار كبييير هادا..
حبيبة مرا عريييضة تنقز عليها و متدورش عليها.. البزول فايض: واختي توحشناك مابقيتي لا تسولي لا والو
زنوبة: اوا ياختي مع الجرا ياك لاباس ياكما لواليدة عيانة
حبيبة: لا ا ختي غير بنتي صفية غاتدير لعرس غدا شي عادة د لبلاد وصافي راك عارفة و جيت نقوليك ضروري تجي
زنوبة: اش هاد الزربة ياختي ياك قلتو الشهر الجاي
حبيبة: اوا تتعرفي ولاد ليوم الراجل قالك باغي مرتو اوا نفرحو بيهم
زنوبة: ولكن السوق باقي بعيد فين غانلقاو اختي الطرانزيت
حبيبة: وايلي شدو لخطاف المهم غدا ان شا الله تكوني عندنا
حبيبة جمعات جلايلها و وقفات..
زنوبة تتضحك بزز: اوا ياختي لهلا يحاشمنا الله يجعل كلشي بارك و مسعود
قدور خرج من الطواليت: فين غادة اويلي جلسي تشربي اتاي
حبيبة: جلس لخيير
حبيبة خرجات و زنوبة شدات راسها عمراتو بالدقيق..
قدور : مالك تاني
زنوبة: تنهز لهم لهاد لعراسات و هاد بنتنا تيجيها لقفطان بحال غشا د الكيكس بحال معلقاه فعلاقة..
قدور: صافي هادا وكان.. اجي اش درتي لينا فداك لعدس؟؟
زنوبة: علاه مالك شفتك مخشي فالطواليت.. والو غا قعقلة و حبة حلاوة زوينين للتكعاد
قدور دخل ثاني للطواليت: حكلو مبغا يركد..
زنوبة هزات تلفونها عمرات لبوطونات بالعجينة...
وئام تتسنا الطوبيس و عينيها فالصدر د كل وحدة جاية و غادية حتا صونا تلفونها: الو مي.. شنو.. ياك غا داك النهار زوجات جميعة.. واصافي ا مي نفس الديسك.. صافي غانديرو.. وا صافي بففف
جا الطوبيس و ركبات فيه..
