بلار جا للخيمة جلس حدا باه الشيخ..
الشيخ: اش واقع مالك تتعرق و تنشف
بلار مسح لعرق: لقيت لبنت لي بغات ليا خاطري ا با و الا متزوجتهاش غانرجع لبرا مبقيتش نرجع
الشيخ شاف فيه: كيفاش؟ ولدي انا يبغي بنت و متكونش ليه.. هيا بغيتيني نقربلها على اهل هاد الدوار
بلار بتاسم بخبث: راها بنت قدور و زنوبة
الشيخ: وااااايلي.. ياك كنتي تتقلب على مرا ترضع قبيلة اوا هاديك عندهم راها حسنات ليها مها فالزاوية هنا واالو ماعندها
بلار: الله يجيب على خير راها فااااضت لبنت كبرات و تطرطرات
الشيخ: وايلي بصااح.. اوا هادي مفباليش متكون غا عطاتها ديك زنوبة شي عشوب
بلار: انا منها نخلاق ا لواليد و قبل متفرتك الجوقة بغيتك تجبد لهضرة مع باها
الشيخ شرشر اتاي: اوا الله يسخر
فبلكون بالليل كان علاء جالس معمر الطبلة بالديسيرو ليباط و زوج همبرغرات و جالس هاك بالاك حتا شاف ضو منباعث من لتحت.. وقف معمر فمو تيطل.. الطوموبيل بيضة تتشعل وقفات فالساحة د المنتجع السياحي لي فيه شقق راقية هبط منها شاب ريحتو وصلات علاء شمنك يا عضلات شمنك يا بيوضة شمنك يا شعر و واشم ذراعو حل لباب لبنت لابسة كسيوة د شبكة فلبيض ملاصقة معاها شعرها شهب تلفتات و علاء طيح الهمبرغر فلرض و الكيتشوب مدلي من فمو.. اه هاديك نرمين لي عاش معاها اربع سنوات تيصرف عليها حتا مرض و نكراتو و دابا راها جات مع رجل اخر للشقة ديالو.. هيا لي كانت تتبعد منو حفاظا على شرفها و هيا لي ماعندها شرف.. ماحسش براسو دموعو هبطو مسح فمو طيح الطبلة مشا جيهة البيت لي تيحط فيها الادوات تاعو د الهندسة و بانت ليه مسطرة حديدية كبيرة هزها بصعوبة و خرج مخلي لباب محلول هبط و دخل للعمارة لي دخلو ليها تيسمع ضحكاتها..
علاء تيلهث: ليوم غانقتلكم بزوج عاهرة
علاء تبع الصوت د ضحكها و بدا تيفرع لباب بالدقان..
فالبيت د كريم ولد رجل اعمال معروف عندو جنسية امريكية.. كان طايح بجسمو عليها تيبوس و يشم و يقيس حتا سمع الدقان و الباب غايتقلع من بلاصتو تقلب و فمو عامر بلعكر..
نرمين تتقاد كسوتها : واش داير مع شي حد
كريم ناض و قميجتو محلولة: لا مادرت مع حد و هاد الدقان ماشي تاع الرانديفويات
كريم مشا للمجر ديالو جبد بواطة هز منها فردي و تحت منو ورقة الترخيص..
نرمين تخلعات: اويلي اش ناوي تدير خرجني بعدا
كريم : ماغاتخرجي حتا نقضيو داكشي علاش جينا
كريم خرج و حل لباب قبل ما يطلع علاء المسطرة يضربو نيش عليه كريم ب بونية للجبهة حتا دوخو و طاح..
نرمين جات تتجري و بزولها تينقز: اويلي اش درتي ليه
كريم: شكون هادا؟ واش تتعرفيه؟
نرمين: هاه؟ لا لا منين غانعرفو ولكن راه غاتدير مشكلة لراسك الا مات
كريم خدا تلفونو تاصل بالعساس لي جا تيجري..
العساس: اواه سي علاء سي علاء هادا ا سي كريم راه ساكن فالعمارة H
كريم: اوا بشوية عليه حتا توصلو للشقة تاعو غيكون غا سكران و تلف
كريم سد باب الشقة فوجههم و هز نرمين تيهرها غادي بيها للبيت..
