طوموبيلة ديكابوطابل كحلة بلا ضالة واقفة حدا عيادة كبيرة فحي راقي.. حداها بلاكة حديدية مكتوب عليها: الدكتور بدر الدين باقلاو.. اختصاصي الغدد الصماء و الاختلالات الهرمونية
شاب صحيح عاطي ظهرو و العضلات كبار غاينفاجرو من جسمو و عروقو خارجين.. الدكتور فلبيرو هبط نظاظرو..
دكتور: قلتيليا ا سي علاء بلي تناولتي هاد البروتين و فقط لمدة زوج سيمانات؟
علاء لي باانو عضلاتو و حتا من لبزول خرج ليه ولا كبر من تاع ناريمان..
علاء: اه ا دكتور ترددت باش نجي ولكن هادشي تيزيد فلول قاليا صاحبي الا قطعتو لبزول غايتلاشا و يمشي و قطعتو دابا شي ربعيام و هادشي تيزيد دابا تتشوف راه الريوس كاع لي كبرو
دكتور معوج ملامحو: اياياياي وا بزاف هادشي على لبروتين ا سي علاء عندك زيادة فالهرمونات الانثوية و من هاد التحاليل لي جبتي ليا الا بقيتي هكا غايتدلاو ليك كثر و غايخصوك سوتيانات ههه (الدكتور جمع الضحكة)
علاء: داكشي علاش جيت عندك و جبت ليك هاد الدوا حتاهوا لي كنت كاناخد معاه.. تاع بومزوي حيت قادو ليا كنت تنعاني من القولون العصبي
الدكتور هز لكارتونة و بتاسم: اوا شفتي راك زدتي لاضوز د لبروتين و نشطو ليك الغدد الصماء ولاو غا تيفرزو
علاء: قبل منجي عندك دوزت التحاليل و حيت نتا صاحب الواليد قررت نجي عندك نتمنا تعاوني
دكتور: من امتا ونتا هاكا؟
علاء : سيمانة ا دكتور وانا تنعاني معاهم مبقيتش قادر نمشي للبحر ولا نعري الصدر خصني نلبس داك لكبوط لغليض حتا فالصهد و دابا راك عارف الصيف دخل و قبل منرجع للخدمة خصني نصيف اصلا داكشي لاش خديت لبروتين و ضروري تلقا ليا لحل هاد لبزول غايعقدني
دكتور تيحك نيفو: رحلة العلاج طوييلة ا سي علاء.. باش تشرب البروتين و تصحاح ساهلة ولكن باش تعالج المشاكل راها صعيبة بزاف
علاء وقف منيرفي طالع ليه الدم و لاح ليه كاع لوراق لي فوق لبيرو: دابا نتا طبيب نتا طبيب والله كون ماحشمت حتا نمرمقها
معاك
الدكتور تخلع مع علاء ولا مكلضم و صحيح..
علاء مخنزر فيه هز تيشورتو لبسو و لبس عليه لكبوط و خرج ضارب بالباب.. دخل طوموبيلتو تيسب و يعاير..
علاء: دابا اش هاد الزهر عندي ااااش و اش غاندير بهاد لبزول تابع نرمين حتا وليت بحالها تفووو
علاء مبقاش تيبان ليه الديمارور ب بزازلو بصعوبة ديمارا و هوما تينقزو.. داز على لافتة كبيرة فيها امرأة تتدير الاشهار تاع الملابس الداخلية و بزولها كبير وقف الطوموبيل حتا هبط ليها و هرسها و عفط عليها.. راجل دايز حداه مستاغرب..
علاء: شتاتشوف هاه واحد بنادم معقد معقد مسطي متنحملش لبزول ا عباد الله اححح وا متنحملش لبزوووول
لي داز تيشوف فيه احسابليهم مسطي..
ركب علاء طوموبيلتو و الضبابة قدام عينيه مسند مع الفولون...
زنوبة مخلية الشيخ تيشرب اتاي و لحلوة و مشات جيهة الكوزينة تتغمز قدور..
قدور: مرحبا بيكم ا سيد الشيخ خودو راحتكم
ناض قدور جا عند زمانو: مالك اش كاين
زنوبة تتهضر و تشوف جيهة الدروج: واهاديك لخطية لي ولدنا اش غانديرو معاها الا عرفات هادشي لي ناويين غاتدير لينا الشوهة
قدور تيحك وجهو: اه عندك لحق واش بغيتي واش نربطوها؟؟ راك عارفة هادشي من لول
زنوبة تتعوج فمها: الحل لي عندنا هوا نكتبو ليها لعقد بلا متحضر
قدور: واش هبلتي؟؟ العدول جاي فالطريق راه ميمكنش يقبل ليك يزوجهم بلا لعروسة
زنوبة: ياك نتا باها ونتا والي عليها.. العدول من الدوار و الشيخ سيد الدوار مغيقدرش يقول لا
قدور تيخمم: و لبنت راها غا لفوق تقدر تفضحنا
زنوبة: غير تهنا انا غانسخرها للسويقة باش تتعطل ملي ترجع يكون كلشي مقاد
قدور هاز يديه: لي بانليك انا غانمشي عند الناس راج جالسين بحدهم
زنوبة تتحك يديها بتوثر و طلعات مع الدروج..
