فالباب د الكلية واقف علاء تيديه لبرد حتا بانت ليه نرمين خارجة و تابعينها زوج و هيا مفرعنة عليهم حتا وصلات حدا الشانطي تتلفت معرفات حتا حسات شي حد موراها تلفتات لقات علاء هبطات فيه..
نرمين: هذا نتااا
علاء: اه متوحشتينيش انا توحشتك علاش تتعامليني هاكا
نرمين: راه هضرت معاك زعما (تتلفت هنا و لهيه) الطريق بيناتنا سالات واش انا نتمشا مع واحد خاوي بحالك
علاء: واش متيهمكش اني تنبغيك تيهمك غا لفورمة اش هاد التفكير
نرمين: واش بغيتي يقولو عليا نرميين لمبزلة واقفة مع كارضبو خاوي بحالك سير فحالك حسن ليك
علاء بغا يحفض لي بقا من كرامتو و مشا جيهة طوموبيلتو..
نرمين تبعاتو بتخنزيرة: اوا مزيان نخلي لفريز و على اخر ايامي الا جا لعجاج نبقا نقلب عليه
وئام دخلات للدار ضروها عينيها مع تكاشط لي مها مفرشاهم فلمراح شمنك يا لوان يا موزون يا عقيق الدار ضوات..
وئام: شهادشي ا لواليدة عينيا دمعو
زنوبة: مضاربة تنستي ليك يا لحلوفة بغيت ليك شي قفطان لي فيه موزون جيهة الصدر باش تنيشي على لبروجيكتور تضربيهم على الشعة
وئام جلسات حداها تتبقشش فداكشي: هادو ا ممي راه نبان ليهم فالدوار لاخر هادشي معيق بزاف غانلبس جوهرة تاعي
زنوبة قرصاتها : جلسي جلسي من ليوم غاتولي تسمعي هضرتي
وئام جلسات تتحك لقرصة: صافي هانا نتبعك (شافت طروفة دلبونج) ليزيبول هادو واش نعمر كتافي
زنوبة: هادو بزازلك من ليوم غاتبقاي حاطاهم حتا تتزوجيو فليلة الدخلة ديك الساعة لفاس طااااح فالراس
وئام: هاه؟
زنوبة: نوضي حيدي هاد شراوطو اجي نلبسك هادا
وئام مشات و تتلفت لمها لي تتقاد فتكشيطة واقفة..
علاء جالس فلبار تيشرب كاس مخلط بربعة د انواع الخمر و جا صاحبو حداه..
غالي جلس: خلعتيني عليك اودي تاصلتي بيا فهاد الليل و الشراب كاع هادا غايدير لك لكرش غاتولي لفورمة مزفتة كثر
علاء: مبقيت بغيت والو بغيت نشرب باش ننسا
غالي: شوف اصاحبي كون كانت بنت الناس كون وقفات معاك فالمرض تاعك هيا باغتك صحيح و صافي
علاء: عرفت ا غالي عرفت انا دابا بغيت ننتاقم منها ضرني خاطري بهادشيو كرامتي هزيتها و حطيتها تحت رجليها
غالي: شوف ا صاحبي خود هاد لقريعة تاع البروتين بداها من غدا حيت دابا راك شارب.. و بعد اسبوع غاتصحاح و تدي لالاها نتا كاع..
علاء بتاسم: غانجربو اخويا لي ليها ليها
فنفس الوقت وئام تتقيس لقفطان قدام المراية : وااو ا مي وا لبزول صدق مستيلي
زنوبة تتطوي: راه قلتهاليك البزول هوا لي غايهز ليك القوفاية
وئام مبتاسمة حتال لوذنين: اويلي ا ممي علاش مدرتها من شحال هادي واناري اخوتي الطايح كثر من النايض
زنوبة: اوا هيا الا بقيتي تديريه و غاتزوجي بسيد الرجال
وئام تتجري و تتمختر فلمراح..
