وقفات طاكسي صغيرة قدام وكالة وافاكاش هبطات منها نرمين و مول الطاكسي واقف تيتسنا فيها حتا خرجات تنسد فبزطامها و دخلات صاك بيها حتا وصلات بوتيك راقي تاع لحوايج و وقف تاني يتسناها.. خرجات محملة و مجملة بصيكان دلحوايج و ركبات متجهة لشقتها.. و بعد ساعة ونص هبطات ريحتها سابقاها لابسة بوندو سوتيان فلبيض و سروال دجين مقطع و سبيبطات.. ركبات طاكسي..
هزات نرمين تلفونها ركبات نمرة علاء و رجعات سدات: مغنعلموش غانديرهاليه مفاجأة.. سير ا شريف حدا لفيلا د الحاج المدني
الشيفور ديمارا جيهة منطقة سياحية قريبة للبحر فيها غير الاراضي و الفيلات الهاي.. تما ساكن الحاج المدني لي خدام ليه علاء فمشروع بناء مجموعة عمارات لشقق فخمة..
زنوبة بدا لحال تيضلام و لبنت مبانتش.. خرجات حدا لباب غادة جاية ماليها أثر بدات لخلعة تدوز ليها..
قدور خرج لعندها: ا الله يهديك اهاد لمراة غاتكون دازت تاتي عند ديك صاحبتها مولات (خنزرات فيه) صاحبتها لمعرية غايكونو تيبدلو تاتي فلحوايج
زنوبة: لالا خاطري ممهنيش غاتمشي دابا للسويقة و تقلب عليها و تجيبها و سير عند ديك صاحبتها راني مبرية منها من شحال هادي
قدور : واخا ا لالة هيا لي متعاود
دخل قدور جبد موطورو و ركبو و زاد..
وئام جالسة فوق لمخدة د الناموسية تتمنظر من الشرجم تيبانولها غا الشجر و لحجر..
وئام: واحد الزهر عندي مكوز واحد تكويزة تاع لمليح
تخلعات بالباب لي تحل.. دخل علاء هاز معاه بلاطو فيه تبصيل د ليباط و كاس د المونادة فيه الثلج و الماء..
علاء: هزي ما تعلفي صاافي هادشي لي زدت دابا
وئام: كيبقا بزولك؟ لالا ماقلت والو صافي غانعلف
علاء: اوا هكاك شدي اصلا مغتبقايش بزاف انا تناخد لعشوب و سيمانة و غانتداوا ونتي تمشي فحالك
وئام: سيمااناااا؟؟؟ راه غايقلبو عليا فالدار واقيلة متتعرفش امي زنوبة وا والله حتا تكويني الا رجعت
علاء بتاسم: الا كان غا لكوا راه غاتكواي غاتكواي لاهيلا
خرج علاء تيضحك وسد لباب..
وئام : كيفاش نتكوا؟
جرات البلاطو حداها و طاحت فليباط..
وقفات نرمين حدا الفيلا د لحاج المدني حتا تم هابط عندها شاب لقلدة و لكوستيم و النقا و جا قرب منها تيشوف فيها من لفوق لتحت و هي تتلوا و تشوف فيه الطوموييلات واقفين فالانواع حدا لفيلا..
نرمين تتمنظر فدوك الخيرات فين تبان الهندسة د علاء و قجقالتو..
الشاب وصل لعندها عاد فاقت و سلم عليها..
الشاب: مرحبا.. قالوليا تتقلبي على الاستاذ علاء
نرمين تالفة و تتعوج: ااه مشيت عندو للبيرو و الشقة تاعو و ملقيتوش هادشي جاني غريب
الشاب تيشوف فيها من لفوق لتحت : علاء عندو الزهر على هاد لحساب
نرمين تتعض فشفتها: ههه من ذوقك.. ممكن نعرف شكون معايا
الشاب: اه سمحيليا انا يسار ولد الحاج المدني اخر العنقود ههه ونتي
نرمين: انا سميتي نرمين تبارك الله واش هاديك الطوموبيل تاعكم
يسار تلفت: اه هادي جابها لواليد لبارح هيا طبعة قديمة بزاف هوا مهووس بالسيارات قولي ليا واش نتي من عيلة علاء
نرمين: تقريبا (تتدير لبرد لراسها) الجو مصهد ههه
يسار: تفضلي عيب تجي لعندنا و مانضايفوكش
نرمين: لا مجاتش و الحاج فالدار حتا نتلاقاو شي نهار ان شا الله
يسار: الحاج ناعس دابا عندو السكر و خدا الدوا و نزيدك هاداك جناحي بوحدي نقدرو نتعارفو كيما بغينا
نرمين تتشوف فالفيلا و الطوموبيلات داخت و مشات معاه..
