خرجو مجموعة نرمين من الامتحان و كل وحدة هازة ورقة دلوسخ تتبقشش فيها..
نرمين كمشات لورقة رماتها: مبانش ليكم كريم ا لبنات؟
فدوى: كل واحد و همو واش حنا واحلين مع هاد لموديلات ونتي ف كريم هههه
هند: واييه راها طاحت لمسخوطة
نرمين رمات مسكة ف فمها: ياختي را كريم هاداك الا تزوجنا غايصاوب ليا لوراق بعدا غا نتهنا من كمامركم و كمارة علاء فقسني
هند: غاتسناي بزاااف ا ختي خصو يكمل الماستر عاد يسافر عند باه
نرمين: المهم لوريقات مضمونين احمم.. اجيو بعدا واحد وئام واش مجاتش للامتحان؟
فدوى: علاه مفراسكش تاصلات بيا الصباح قالتليك عندهم شي عرس و امها مخلاتهاش تجي للامتحان
هند: اوييليييي و اش غاتدير
نرمين: يا لبنات هيا ضريفة و نية ولكن راسها قاسح تنقوليها تشوف اش تدير لراسها حالتها معجبانيش
فدوى تتهبط ف نرمين: زعما على قبل لبزول؟ هههههاي
نرمين تتخنزر : اييه هادا شفتيه هوا لي غايكون سبابي حتا نمشي لبرا..
مشات نرمين ولبنات تيسطاو بالضحك..
وئام تتدير لكحل و تحك السواك لسنانها بزز: تهنيتي دابا ها الامتحان مشا خصني دابا نقاد شهادة طبية باش ندوز الراطراباج
زنوبة تتحدد لقفطان فلمراح مقابلة معاها: واش تافقنا انا وباك نزوجوك باش تستري فدار زمانك قالك ناباج
وئام تتشوفها بنص عين: من الصباح و حنا تنحلقو واش السطافيت اح الترونزيت مزال مغتجي
زنوبة: راه مشا باك يجيب مسعود واقيلة دازو عند لحجام
وئام سالات قادات لبونج فصدرها مع داكشي لي كان خاص.. لالة زينة و زادها نور لبونج.. غادة تتمختر بجلايلها مضوية لمراح شافت لمراية..
وئام: لي قاليك باقي نحيد هاد لبونج راه كذب عليك
زنوبة سمعات كلاكصون حدا لباب : صبري نحل هاد تكشيطة غانديوها معانا متعرفي..
قادات زنوبة زيفها و هزات صاكها و خرجات و وئام تابعاها من اللور عينيها فلبزول ديالها الجديد..
علاء فلاصال تيتريني و حاط حداه قريعة د لبروتين محلولة حتا جا صاحبو غالي جلس حداه..
غالي: ايهاي هاي وااا شفتك ناوي شحال من حبة خديتي
علاء حبس التدريب: خديت زوج لي قلتيليا غانتريني و نمشي نضرب شي ربعة د طاكوسات
غالي: هاكا نبغيك شفتي راه وجهك بان فيه شوية الضو ليوم كنتي صفررر
علاء: اوا هانا تابعك حتا نشوف..
علاء جبد كريطينة من صاك تاعو و شرب حبة..
غالي: اشهاداكشي؟
علاء: هادا دوايا مغنكملو حتا يدوزو زوج سيمانات
غالي تيقراه: ااه فيه بروتينات حتا هوا لكن مخففين المهم نتا كمل داكشي لي قلتليك و غاتشوف النتيجة
فقبيلة ولاد سعيد.. الخيمة كبيرة منصوبة و الشمس قريبة تغرب ملي هبطات زنوبة و زمانها من الطرانزيت و تبعاتهم وئام مسبقة صدرها تتمختر.. دخلات للخيمة لي مصففين فيها عيالات الدوار و صداعهم خارج لبرا و حداها خيمة بيضة تاع الرجال و صوت اتاي لي تيتكب واصل للدوار.. زنوبة تتلفت ملقاتش بنتها..
قدور: خليها تدبر على راسها واش غاتبقاي رابطاها حداك
الشيخ جاي فبغلتو من بعيد مركب معاه ولدو و وقفو حدا قدور..
هبط الشيخ تيسلم و يعاود: نهار كبير هادا ملي زرتونا الدوار ضوا بيكم.. بلار هبط هبط تسلم عرفتي شكون هادا راه قدور لحجام لي ختنليك
قدور: والله اسيد الشيخ غا الدنيا داتنا و صافي تبارك الله لعزري كبر
بلار حشمان لابس جابادور بيض و بليغة بيضة محزمين ليه.. حزموليا رزموليا و الا طفرتو ها وجهي..
بلار: مرحبا عمي قدور مرحبااا
زنوبة جات حداه:ولدي بلار سير عيط ليا على وئام راها غاتكون غا فهاد جوايه راها خفتها تتجلا..
قدور تيغمزها و هيا تتغمزو..
بلار مشا يقلب..
زنوبة تخشات فزمانها: تا سكت خلينا نلصقوهاليه ياك قلتيليا نهار طهرتي ليه كان داكشي وافي.. اوا منلقاوش بحالو لبنتنا نيت دودتها تبرد و تنسا ديك لافاك
قدور بتاسم حتا بانت لعمارة د الضرسة..
