هاالااو مي بيبي داموغ اسمحوووووولي علاباالي طولت والله غير الكونيكسيون الكلبة دارتها بيا قلتلكم مازال غير بارت واحد بالصح كون نديرو غير واحد يجو في 100000 كلمة ونحطم الرقم القياسي فتاريخ الواتباد ألوغ قسمتو لزوج ليبارت واحد تاع العرس وواحد تاع الحياة الزوجية لي وعدتكم بيها بناء على طلب البعض ألوغ اتفاعلوو نحبكم تتفاعلو باش نحطلكم البارت الاخييير ونكملوهاا
ヾ(˙❥˙)ﾉヾ(˙❥˙)ﾉヾ(˙❥˙)ﾉヾ(˙❥˙)ﾉ
يوم العرس:
خارجة من دار باباها بالحايك الدموع على شفارها صوت قرقابو (فرقة موسيقية)والزغاريت داير حالة راح تفارق الدار لي عاشت فيها الحلوة والمرة وتفارق عايلتها وتخلي كشي وراها زاد صوت الزغاريت ولكلاكصون عرفتو جا كذبت بلي وصل هاذ النهار شوية ووصل قرب ليها وطلعلها الحايك وحكم راسها بين يديه وباسها من جبهتها وحضنها قدام ربي وعبادو😳 ماسامع بحتى واحد 😂وهمس فوذنها
رامي:اونفان لحق هاذ النهار شبت وانا نستنى فيه الحمد لله كتبني ربي ليك
تبسمت بحشومة من انظار الناس ليهم وهو فاق لروحو وجبد عليها وخلا الدالة لسمية هو راهي معاه منا لفوق بالصح هوما لالا
شافت فيماها فتحتلها يديها حضنتها وتمسحلها فدموعها ودموعها ويدان
سمية:لحق النهار لي شفت بنتي حبيبتي خارجة عروسة ماتبكييش راكي رايحة عند رامي من لي بديتي تعقلي على روحك ونتي تعرفيه رايحة عند راجلك لي يحبك ويصونك ومستعد يهد الدنيا على جالك الحمد لله حياني ربي وشفت هاذ النهار بغيت نقولك كوني مرأة فحلة معاه وسمعي لكلمتو وحطيهم فوق راسك هو وعايلتو وانا متأكدة راح يديرك في عينيه كوني فحلة كيما ربيتك روحي ربي يهنيك ويرزقك بالذرية الصالحة
تهدر والدموع غسلو وجهها ماريا ماعينت تمسح دموعها ماعينت تمسح دموع يماها مسحتلها سمية دموعها وماريا كيف كيف وباستها من راسها
ماريا:المهم رضايتك الميمة رضايتك ودعاءك
سمية:راني راضية عليك وديما راح ندعيلك كوني هانية
ماريا:ربي يخليك الغالية
محمد:وانا ماتخلوليش الدالة؟!
تبسمو وماريا قربت ليه شافت فيه تقول آخر مرة تشوفو فتحلها يديه دخلت فحضنو تستحلا فيه وتاخد فالقدر الكافي من الشجاعة والأمان منو وتستمد فالقوة منو
محمد:بنتي كبرت وتزوجت الحمد لله شفت هاذ النهار كنتي ديما الشمعة تاع هاذ الدار نتي لي منورتيها راح تخلينا فراغ كبييير بزااف بالصح هذي سنة الحياة واش تحبي راكي خارجة من دار باباك ورايحة لدار راجلك نحبك تكوني فحلة ومراة وقد المسؤولية وصوني راجلك وعايلتو وحفضي اسرارهم وديريهم عايلتك التانية هاكدا نرضا عليك
هي:(بالشهقة)نشاء الله بابا اتهلا فروحك ورضى عليا
محمد:راني راضي عليك دنيا وآخرة ربي يهنيك
هي:نشاء الله ربي يخليك تاج فوق الراس👑
بعدت من حضنو لي ماكانتش باغية تفارقو ودورت لجداها باستها من راسها
فاطمة:راجلك وعايلتك ديريهم فوق راسك مفتاح نجاح الزواج بيدك
ماريا:كوني هانية جدة زغرتيلي وحدة من الحنجرة الذهبية المرة اللخرة
فاطمة:مازال تجيبي وليدات ومازالو الفراح ونزغرت ماشي اللخرة يوويوويوووو
تبسمت ودورت لخوها لي حاط يديه على عينيه يخبي فدموعو لي خانوه كانو ديما يتناقرو بالصح الاخوة لي بيناتهم كبييرة بزاااف قرب ليها وهي تشوف فيه بالتبسيمة والدموع وحكملها يديها
انيس:عندنا عوينة وحدة وراح تروح علينا دوك تسماط الدار بلا بيك ومايعودش يجي النمل 😢للدار
خليك ماتتزوجيش اخطيك من هاذاك الهايشة راح يهبلك اقعدي هنا نهبلك انا ولا يهبلك هو (😧أنا يقولي خويا هاكا نحي الحايك ونرجع للدار نقولو هنا يموت قاسي 😂)
هي:هههههههه
رامي:احححمم بلع ماتوسوسلها
هو:هههه عندي ماريا وحدة ماشي عشرة ختيوتيو ومومو العين دموعك يحرقوني مانحبش حتى واحد يبكيك ولي يبكيك نشرب من دمو اتفكري بلي عندك خوك جبل في ظهرك وماتخافي حتى من حاجة وانا فظهرك ادا حتجتي اي حاجة عيطيلي ثلفون نكون عندك ماتتردديش ويلا كان زعفك هاذ الجحش قوليلي نديرو شطيطحة اتهلاي فروحك وماتنسايناش
ماريا:علاه نقدر ننساكم يالجحش ارواح
عنقو بعضهم بالدموع فعينيهم شحااال صعييب الفراااق 💔 زاد باسها من راسها وهبطلها الحايك على وجهها وحكملها يدها وحطها فيد رامي حست برعشة فجسمها بمجرد حطت يدها فيدو
انيس:هاذي مومو العين كون تخمم برك تأديها الراس يطيير اتهلا فيها وديرها في عينك الريح مالازمش يقيسها معاك ولا نعلقك كي السانثر😂
أماني:ماتخافش ما يأذيش روحو
انيس:😒😒
رامي:بلا ماتوصيني على كبدتي ❤️
انيس:أيا احكم قدرك عندك دصرت
رامي:مرررتيي وندييير ليي نححب😛
انيس:😑😑
(رامي كذب يوصل هاذ النهار باش يغزل انيس😂)
زاد قدم محمد وحط يدو على كتف رامي
محمد:راهي خلات باباها ويماها وخوها وجات باش تكون ليك وحدك مالة كون ليها هاذو ڨاع 💪
رامي:بنتك بين يدين آمنة اتهنى عليها نحميها ونحطها فعيني والنسمة ماتقيسهاش
محمد:وعلى هاذي مديتهالك نتا وماشي غيرك 😉كون قد الثقة
رامي:راني قدها بإذن الله
سمية:اتهلا فيها كيما تتهلا فروحك ولدي
رامي:بلا ماتوصي
زير على يدها ودارو وبداو يمشيو ويخطو اول خطوة فحياتهم باش يكونو عائلة لونبيونص كان داير حالة ولاد الحومة روبلووها قرقابو ولي فيميجان تقول سثاااد طلعو للطوموبيل والناس تفرقو وكل واحد حكم طوموبيل ودارو كورثاج قد الدنيا بليموطو والطوموبيبات وقلبووهاا كورثاج على حقو وطريقو حبسو قدام لاصال هبطو العرسان كان قرقابو والزغاريت دايرين حالة شطحو شوية ولا نقولو بزااف رامي قطع روحو بالشطييح 😂 ولي يضحك عليه يقولو نتزوج مرة فالعمر استقبلوهم بالحليب والتمر ودخلو لداخل قعدو فالبلاصة تاعهم فرحتتم ماكانتش تتوصف بالكلام كل واحد يحمد فربي فقلبو لي وصل هاذ النهار
بعد ماقعدو شوية داو ماريا لوحد لاشومبر منين تبدل وعشاو الناس لي جاو وتعشاو هوما تانيك وبداو السهرة قلبو الحالة برا والغاشي ڨاع خرج يشوف لي فيميجان والزغاريت رامي كان راكب على حصان وفوق كتاغو برنوس ولي موطو دايرين بيه وصحابو ولا نقولو ولاد الحومة قاع عرضهم دايرين بيه يشطحو ومزهيين الحالة لحق وقت يرمي البرنوس
رامي:1..2...
هوما:33333
رماه طاح فيد انيس لي قريب طار باش يحكمو 😂(بون هاذ العادة لي يحكمو هو يتزوج بعدو)
طاخو عليه بالضحك هاذا باغي يتزوج فورصي خلااص يا هو نتا ضمنت المرأة خلي الدالة الجماعة البايرة😂 هبط رامي وقلب الدنيا بالشطيح مع انيس ومحمد ومبعد تصورو ودخلو باش تتصدر ماريا تصدرت ودارت ڨاع واش جا في بالها واماني هي لي تصدرت معاها وانيس قريب ثقبها بعينيه جات تهبل بعد ماخلصت ماريا تصديرتها لبست لاغوب بلونش لي كانت عرييضة وطوييل لاريار تاعها وقاعدة فالبيت قدام المراية جات تقتتل بلاغوب بلونش حكمتها الرعشة وهي نستنا فيه يدخل رجليها يضربو فبعضهم بالخوف بعدت شوية على المراية باش ما يشوفش وجهها شوية ودخل عليها رامي حبس فالباب تاع البيت ماقدرش يدخل سقسوني علاه؟! باسكو الروبة كانت كيشغل زربية 😂شادة البيت ڨاع كانت عاطياتو بالظهر وهو مقلق غير وينتا يشوف وجهها بدا يقرب يعني ماشي على الروبة😂 ولاها طاپي قلبو راح يخرج من الفرحة بالسيف حاكم روحو ورايح يمشي نورمال لابس كوستوم كحل وشوميز بيضة وبابيون كحل ومركح شعرو بالجال ومطراسي اللحية يفففتتتق😍 مين قرب يوصلها ويدورها ليه راح على جنبها زادت دورت عطاتو بالظهر😂 وكلما يسيي يشوف وجهها تزيد تعطيه بالظهر يروح منا تدورلو منا يروح من الجهة الاخرى تزيد تدور العكس فيه😂حلفت تهبلو وهو قريب هبل مقلق غير وينتا تدور وهي ماحاباش
رامي:(بصوت مبحوح ورجولي) احححم مااريااا تدوري ولاتخلصيها غالية العشية
عند هاذ الجملة هرب منها الدم 😂وديسيدات تدور أخيرا دورت بالعقل شاف فيها وفمو قريب يوصل للأرض قاعد باهت فيها جات تهببل بالابيض حتى توسوستلو مين قعد يخزرلها بالسيف باش فاق على روحو ضربها بضحكة من الشط للشط ومسح على لحيتو وزاد حل فمو وهي حمرت ومالقات مادير حتى توسوست بالصح بعدت تخمامها مين لقاتو عيط بالصح وقال yeeeeeess ودار هاذاك الجاسث بيدو (فهمتو كيفاه؟!🙄 كيشغل زير على قبضة يدو وعيط ب يااااس😂 مهبول والله ) من الضحكة لي جاتها حطت يدها على فمها وكلاطات بالضحك عليه جامي شافتو فرحان هاكذك كان يشوف فيها كلشي كيشغل البروجي تاع حياتو والحلم تاعو كيشغل حاجة كبييييرة حاجة كان يتمناها وتحققت بفضل ربي سبحانو قرب منها بخطوات ثابتة وتبدلو خزراتو ولا يشوفلها كيما العاشق الولهان لي ذايب فيها حكملها راسها بين يديه وباسها من جبهتها وحضنها وزير عليها وحط راسو على كتفها رجع شريط حياتهم كامل فات على عينيه(ربي مايحرم حتى وحدة من هاذ اللحظة😍) ماحبش يبعد عليها غير محضنها يتأكذ بلي ولات حلالو والليلة تبات فدارو(يااو السجع ياجدكم كون غير قريت آداب وفلسفة😂) اما هي كانت حابة تبعدو وتتمعن ملييح مع وجهو لي مازال ماشبعتش منو تتمعن مع كل تفصيلة فيه وتعبي عينيها منو حطت يديها على كتافو تشوف وجهو وبعدتو شوية عليها لقاتو حط يديه على عينيه (كان يبكي😢 ياربي واحد يحبني هاكدا ويشوفني كلشي يشوفني حاجة مستحيلة وتحققت 😭😭تأثرت والله لحمي تشوك ) كان يخبي فدموعو دموع الفرحة الإنتظار لي كانت نهايتو سعيدة شافتو غمضت عينيها لي هبطو منهم دمعات ومدت يديها مسحتلو الدموع وحكمتلو راسو حطتو على كتفها وغمضت عينيها وفكل ثانية تحمد ربي الف مرة على لي رزقها برامي ماشي واحد غيرو يحبها ويعشق فيها يكره دموعها ويحب يشوفها ديما فرحانة يشوفها حياتو والماضي تاعو والحاضر والمستقبل وحلم حياتو وهدية حياتو وكلشي فحياتو بعد عليها يتبسم ومازال يمسح فدموعو ومدلها البوكي تاع الورد(هاذ اللحظة ماجاتش بالساهلة كان خاصها كفاح وصبر وربي مايضيعش الصابرين تاكدو بلي لي يصبر ينال ❤️) تبسمتلو وهو كيف كيف زادو حضنو بعضهم مرة خلاف يتاكدو بلي ماراهمش يحلمو ودموعهم على شفارهم
رامي:واخييرا الحمد لله ياااربي لي وصل هاذ النهار ووليتي حلالي وشفتك بالابيض ربي يخليك ليا ومايحرمنيش منك
ماريا:اميين ياربي ويخليك ليا ومايحرمنيش منك
رامي:جيتي تهببلي قدما نوصف مانوفيش لازم نكون شاعر ولاكاتب وعندي القدر الكافي من الكلمات وبالاك اللغة ڨاع وماتوفيش حقك
ماريا:ماتزيدش عليها راني نرمال
رامي:إيه راكي نرمال بالصح فعيون الناس وفالمراية ماشي فعيوني انا
(رااامييي خلاااص هللكتنا بالروومنسية تااعك راعي مشاااعرناا برك رانا سنااڨل بائسيين😭)
ماريا:(بحشومة)😊😊تعيش ربي يخليك
رامي:ههههه تبدلتي عليا من وقتاه تعرفي تهدري
هي:هههههه...
فوسط ضحكتها قطعها
رامي:نحبك ♥️
حمارو خدودها وتلفتلها كيفاش تضحك وهو شاخ عليها بالضحك
ماريا:(بعد استجماع الشجاعة الكافية)حتى انا
رامي:حتى نتي وشنو
هي:نحبك ♥️
هو:نعشق فييك
أماني:اووووووو تبااتوو هنااا الناس اي تستنى برااا
دورو ليها مفجوعين لقاو عينينا دامعين معنتها كانت فالبااب وتأثرت بالموقف
هوما:من وقتاه ونتي هنا
هي:من الأول تقريبا 😢😢اوو ياربي تأثرت
وغلبوها دموعها
ماريا:ربي مايحرمكمش من هاذ الفرحة مع خويا
انيس:اميين
هوما:ونتا وقتاه جيت!!؟
انيس:دوكا برك جيت نهبطكم وسمعت اسمي وشفت امونة قلت اميين😊
هوما:هههههههه
رامي:ربي يكمل
انيس:تعيش صاحبي حتى نتوما ربي يهنيكم
هوما:اميين
انيس:إيه ناوين تقعدو هناا ؟!الناس قريب يروحو ازربوو هبطو😡
ماريا:صاي جينا
دور ليها رامي تبسم وحكمها من يدها شافت فيه وتبسمتلو قال باسم الله وبداو يمشيو هابطين للساحة تاع لاصال وين كاين الناس حاسة روحها ترعش بالخوف والسثراس زير على يدها من شافها متوترة وهمس فوذنها
رامي:مادامني معاك عمرك ماتخافي
تبسمت بحشومة وحست بروحها خير هبطو وصلو للساحة لي كانت معمرة بالدخاان والناس دايرين بيها دخلو على اغنية" wasila dj kays jour j" غير دخلو شطحو شوية وراحو قدام الديكور لبسو الخواتم لي كانو فوق وحد لاطابل وقطعو لابياس مونتي وشربو لبعضهم الجو وتصورو حتى عياو فاللخر قالو للديدجي تحطلهم الأغنية تاع اليسا" حالة حب "هبطو للساحة الدخان داير برجليهم والضوء طافي غير ضوء مسلط عليهم حكمها من يدها وحط يدو على خصرها ويرقصو بالعقل مع الغنية وعايشينها بتفاصيلها والكل يشوف فيهم شحال مواتيين بعضهم كانو منسجمين عاللخر مع الاغنية
كانت طايرة لسابع سماء بالفرحة تشوف فعينيه لي يلمعو بالفرحة وحاطة جبهتها على جبهتو وتتخيل فحياتها معاه وهو ضائع فعينيها لي بحال الليل كحولة ويبرقو ضايع فيهم وناسي الدنيا و مافيها
بعد ما رقصو وخلصو صفقلهم الحضور وهوما تبسمو لبعضهم ورجعو تصورو شوية باش يخلدو الذكرى وصل وقت المرواح خرجو قاصدين الطوموبيل حاكمين فيدين بعضهم فرحانين عاللخر راح فتحلها الباب طلعت اول حاجة راحت ديرها تنحي الطالون لي قتلها بالصح لاروب جيناتها تبسملها ونحالها صباطها ورماه للور(اتزوجي واحد يعاملك كي الملكة👑 كيما رامي😍😭)
رامي:نعرفك خاطيك الطالون
هي:ايي كنت باغية نلبس باسكاث بالصح سمية سمعتني واش قسملي ربي من الهدرة
رامي:هههههه
ريغلالها لاغوب وغلق الباب وطلع على جيهتو نوض الطوموبيل ومشى وهي غير ساكتة وتلعب بالخاتم فيدها
رامي:هههه سمعيني صوتك العمر باش نامن بلي وليتي حلالي
ماريا:هههههه راني مكذبة
رامي:والله ماتقدريش تتخايلي شحال راني فرحان
ماريا:لالا راني نشوف بعينيا ماكالاه نتخايل فمك راح يتقطع بالضحك
رامي:😂😂😂 وعلاه مانفرحش
ماريا:افرح ياعمري أضحك ديما يليقلك الضحك 😍
رامي:😍😍🤤 على العين والراس
ماريا:😊😊
رامي:فرحت مين ربي كتبني ليك عرفت النساء بالصح نتي unique ..اmon réve تكوني معايا أنا نصلي ونتيا مورايا نعيش معااك قصة غراام c'est-à-dire...ma famme 🎶
فرحت مين ربي كتبني ليك عرفت النساء بالصح نتيunique ..اmon réve تكوني معايا🎶 impossible نسمح فيك انايا نعيش معاك قصة غرااام c'est-à-dire ma famme تستاهلي ندير معاك ليفري د فامي كل صباح نشوفك قدامي لي لي لي 🎶(هاذا رامي راه يغنييلها😭نندب بالقردااااش😓)
كانت حاطة يدها على خدها وتتستمتع برك بالحانو صوتو تعشق فيه وهو كان يغني ويسوق ومرة مرة يسرقلها خزرات مين خلص تبسملها
ماريا:والله تعرف انا اكثر انسانة محضوضة فهاذ الدنيا قااع مادام عندي واحد كيفك
(المزية عرفتي روحك وقلتيها باسكو الزهر تاع الدنيا قاع نتي ديتيه نتي ومرتو تاع كرستيانو😒😑وحنا نحوسو على زهرنا)
رامي:وانا اسعد انسان فهاذ الدنيا باسكو المرأة لي حبيتها وخبيتها هنا(يشير لقلبو) ولات حلالي وكل صباح نعود نشوفها قدامي وتولي مامات ولادي وغير هي تدخل لدااري🎶
(اجمااعة حبسو وعاودو قراوهة باللحن اقسم بالله غير أنا انسانة موهوبة وقادرة نألف أغنية نرماال😎 قولو للناس عليا راهم برك مايعرفونيش انا مانحبش نبان علاهادي واحد مايسمع بيا😭)
وهز يدها باسهالها ويسوق باليد الاخرى مين وصلو قدام دارهم حبس ودور شاف فيها
رامي:هنا نبنيو حياتنا وهاذي اول خطوة لينا نشالله ربي يخلينا لبعضنا ويرزقنا بالذرية الصالحة ويخلينا ديما مجموعين
ماريا:نشاء الله ياربي من فمك لربي ربي يدوم محبتنا
رامي:امين العمر آمين
فتح الباب وهبط فتحلها الباب تاعها وقبل ماتمد رجلها تهبط كانت بين يديه هازها
ماريا:ااخلاايا نزلني تبهدييلة يشوفونا الناس
رامي:راها ال 3تاع الصباح شكون مازال نايض؟!
ماريا:بالاك مازال نايض هاذاك احدهم لي قالولو كلام زعفو😂وماخلاهش يرقد
رامي:هههههههه ياربي اكبري شوية راكي تزوجتي بطلي التفاهة والجياحة
ماريا:نشالله بربي نهار تنور الملح ونسمعو نهيق الاسود وصهيل العصافير وزقزقة الفيلة
رامي:وزئير الفأران ومواء البعير ونباح القطط
ماريا:😂😂كيشغل نتا ماشي جايح وتافه قااع
رامي:ماكانش واحد سيريو قدي 🙄
ماريا:لمزية نعرفك كتر من روحي سينون كون آمنت
رامي:هههه هاكي المفتاح حلي الباب انا مانقدرش كيما علابالك راني هازك
ماريا:لمزية قلتلي
مدلها المفتاح فتحت باب الدار سماو باسم الله ودخل رامي برجلو اليمين
كانت الدار مزينة بالشمع الاحمر والورد الاحمر وحتى شومبرتهم تهببل مين شافتها ماريا تشوكاات
ماريا:شكون دارهم؟!
رامي:هي فالصراحة كريت واحد يديرهم أيا ابري وليت انا نعلملو كيفاه يدير انا بروفيسيونال عليه😎😂
ماريا:هههه راجلي دوقو شبااب
رامي:علابالي😎
ماريا:رموشي نحبك ♥️
هو:يخليلي لي تقولي رموشي حتا أنا نعشق فدين مك😘
(عادي نرمال ماشي حاجة يعني قاع نتزوجو 🙄 وڨاع نعيشو هاذ اللحظات نشالله بربي يلاكنا من الحيين ودينا واحد كيما رامي 😭علابالي خربشتلكوم لي سونتيمون اليوم مليييح بالصح ماتتقلقووش قااع وتاكدو بلي ماكانش لي تخربشو ليسونتيمون تاعو قدي😭 بالاك تحسبلكم بلي ماكانش حتى واحد يحبكم بالصح هي فالحقيقة صح ماكاين حتى واحد يحبكم😁 ماتحشمش علابالي هاتو الجديد😛 )
ヾ(˙❥˙)ﾉヾ(˙❥˙)ﾉヾ(˙❥˙)ﾉヾ(˙❥˙)ﾉ
هاني زوجتهم😂وانا ماعنديش لي يزوجني أعطوني رايكم قاااع لتحت ورامي درتلكم الفيد بين الفقرات باش تكومونطيو على كل حاجة وحدها
البارت
ضحككم
بكاكم
عجبكم
بزاف
شوية
أنت تقرأ
💞He Is My Boy💞باللهجة الجزائرية
Humorتحكي على صداقة بين طفلة وطفل تحولت لحب مع مرور الوقت♥️✨
