𝙈𝙮 𝙇𝙤𝙫𝙚𝙧 𝙞𝙨 𝙖 𝙣𝙖𝙪𝙜𝙝𝙩𝙮 𝙗𝙤𝙮​ [ᴄʜᴀɴʙᴀᴇᴋ]​

We don't want each other but...

Unicode

Baekhyun တစ်ယောက်တည်း အားကစားကွင်းရဲ့ချောင်ကျကျနေရာတစ်ခုမှာ အားပျက်စွာထိုင်နေမိသည်။ Baekhyun ရဲ့မျက်စိတစ်ဆုံး စိမ်းစိုနေ​ေသာ မြက်ခွင်းပြင်ကြီးရှိနေပြီး ထိုနေရာမှာ အားကစားလာလုပ်နေသော ကျောင်းသားအချို့တော့ရှိသည်။

Baekhyun ငြိမ်သက်စွာနှင့် ပြာလွင်လွင်ကောင်းကင်ကြီးကို မော့ကြည့်မိသည်။ သူတစ်သက်လုံးစောင့်ထိန်းလာခဲ့တဲ့ မာနတရားတွေက ဒီလိုအူကြောင်ကြောင် Park Chanyeol ရဲ့ရှေ့မှာ တစ်စက္ကန့်လေးနဲ့ပြိုလဲသွားရတာ တန်လို့လားနော်။

Baekhyun ဖြစ်ပျက်ခဲ့တဲ့ကိစ္စတွေအားလုံးကို ပြန်တွေးရင်း စိတ်တိုဒေါသထွက်လာသည်။ ဘယ်နှယ့် Baekhyun ကသူ့ကိုကြိုက်နေရမှာတဲ့လဲ။ သူငယ်ချင်းအရင်းခေါက်ခေါက်ဖြစ်တဲ့ Heeyoung ကပါ Baekhyun ရဲ့စိတ်ကိုမသိဘဲ ဒီလိုစွပ်စွဲသွားတာကိုပါ ခံပြင်းမိသည်။

သို့သော်လည်း သွေးပူနေချိန်မှာ ပြဿနာဖြေရှင်းလိုက်ရင် ပိုပြီးအထင်လွဲစရာတွေဖြစ်သွားနိုင်တာမို့ Baekhyun အရင်ဆုံးစိတ်ငြိမ်အောင်လို့ တစ်ယောက်တည်း အေးဆေးငြိမ်သက်တဲ့နေရာမှာ ဆိတ်ငြိမ်နေတဲ့ လောကကြီးကိုသုံးသပ်နေခြင်းဖြစ်သည်။ 

"Byun Baekhyun"

Baekhyun ခြေထောက်အောက်မှာပြန့်ကျဲနေတဲ့ ကျောက်စရစ်ခဲလေးတွေကို ဒေါသပုံချရင်းကန်ကျောက်နေတုန်း တစ်စုံတစ်ယောက်က Baekhyun ရဲ့နာမည်ခေါ်လိုက်သလားလို့...Baekhyun သုန်မှုန်နေတဲ့မျက်နှာနှင့် မော့ကြည့်လိုက်တော့ သူက Baekhyun ရဲ့ကျောင်းအင်္ကျီပေါ်က နာမည်ကဒ်ပြားကို ​စိုက်ကြည့်နေသည်။

"ဘာကိစ္စရှိလို့လဲ"

Baekhyun မျက်စိရှေ့မှာ မြင်နေရသမျှက စိတ်ရှုပ်စရာကောင်းနေတယ်လို့ထင်မိ၍ ထိုမေးရိုးချွန်ချွန်နှင့်သူ့ကိုပါ မချေမတင်ပြန်ပြောလိုက်သည်။ သူစိတ်ဆိုးပြီးလှည့်ထွက်သွားရင်တော့ အကောင်းဆုံးပဲပေါ့။

သို့သော်လည်း သူကတော့ Baekhyunရဲ့စိတ်ထဲကဆန္ဒတွေနဲ့ ဆန့်ကျင်စွာ Baekhyun ဘေးကလွတ်နေသော ခုံတန်းရှည်မှာဝင်ထိုင်လိုက်သည်။ 

"တွေ့ရတာဝမ်းသာပါတယ်"

"ဝမ်းမသာဘူး"

Baekhyun သူ့ရဲ့အရည်မရအဖတ်မရ လောကွတ်ချောနေသည့်စကားကို ထိုကဲ့သို့တိုတိုတုတ်တုတ် တုံ့ပြန်မိသည်။ ဘာလို့လဲဆိုတော့ သူက Baekhyun လွန်ခဲ့တဲ့အချိန်လေးကမှ ပူပူနွေးနွေး မေတ္တာတွေပို့သနေခဲ့တဲ့ Park Chanyeol ရဲ့သူငယ်ချင်းဖြစ်နေတာမို့လို့ပေါ့။