𝙈𝙮 𝙇𝙤𝙫𝙚𝙧 𝙞𝙨 𝙖 𝙣𝙖𝙪𝙜𝙝𝙩𝙮 𝙗𝙤𝙮​ [ᴄʜᴀɴʙᴀᴇᴋ]​

Another Tom&Jerry Couple

Unicode

"ဘယ်အချိန်ထိငါ့နောက်ကဆက်လိုက်နေမှာလဲမသိဘူးကွာ"

Luhan အနောက်ကို မသိမသာ ခိုးခိုးကြည့်ရင်း တစ်ယောက်တည်း ခပ်တိုးတိုးရေရွတ်လိုက်သည်။ Luhan မှတ်မိသလောက်ဆို ကျောင်းထဲ​ကို ပထမဆုံးခြေလှမ်းစလှမ်းလိုက်ကတည်းကစလို့ အခုကျောင်းဆင်းတော့မည့်အချိန်ထိ Luhan ဘယ်နေရာကိုပဲသွားသွား သူက Luhan အနောက်မှာအရိပ်လိုလို တောက်တဲ့လိုလို တွယ်ကပ်နေတာ။

Luhan တစ်နေရာရာမှာ ရပ်လိုက်ပြီဆို သူကလည်း ခြေလှမ်းတွေကိုရပ်ပစ်လိုက်သေးတာ။ Luhan က သူ့ကိုသူခိုးဖမ်းတော့မလိုအကြည့်နဲ့ လှမ်းကြည့်ပစ်လိုက်ရင်လည်း သူကသူဘာမှမသိသလိုရုပ်လေးနဲ့ ဟိုငေးဒီငေးလုပ်နေသေးတာ။  

သူ့ကြည့်ရတာတော့ Luhan ကိုအန္တရာယ်ပေးမည့်ပုံမပေါ်သော်လည်း ဒီအတိုင်းကြီး "အနောက်ကနေလိုက်စေ" ဆိုပြီး​ေတာ့ လွှတ်ထားလိုက်လို့လည်း မဖြစ်ပြန်ဘူးလေ။

"အင်္ဂလိပ်လိုပြောရင် Privacy လားဘာလား အဲ့တာလဲရှိသေးတယ်လေ"

Luhan ကိုယ့်အတွေးနဲ့ကိုယ် ခေါင်းတငြိမ့်ငြိမ့်လုပ်နေသည်။ အနားမှာ Baekhyun တို့ Heeyoung တို့တစ်ယောက်ယောက်သာရှိနေမယ်ဆို ဒီတောက်တဲ့လိုကောင်တော့ သူငယ်ချင်းတွေလက်ချက်နှင့် အမှုန့်ချေပြီးသားဖြစ်နေလောက်ပြီ။

အခုတော့ တိုက်ပွဲဝင်နေရသူက Luhan တစ်ယောက်တည်းရယ်မို့ စိတ်လိုက်မာန်ပါမလုပ်ရဲ။ တော်ကြာ တစ်ယောက်တည်းမို့ လူကိုသတ်ပြီး အလောင်းဖျောက်သွားရင် ဘယ်နှယ့်လုပ်ကြမလဲ။ Luhan ဖြင့် ဘယ်သူမှမသိလို်က်ဘဲ ဘဝတစ်ပါးကူးပြောင်းသွားတဲ့အဖြစ်တော့ မလုိချင်ပါဘူး။

ဒါပေမယ့်လည်း မကြိုးစားသေးဘဲနဲ့ လက်လျှော့လိုက်ဖို့ကလည်း စောလွန်းနေတယ်မဟုတ်လား။ ပြောရရင် Luhan က အဲ့လို သူရဲဘောကြောင်မယ့်သူလည်း မဟုတ်ဘူးလေ။

"သူလည်းတစ်ယောက်တည်း ငါလည်းတစ်ယောက်တည်း ဘာကိုကြောက်ရမှာလဲ ပြီးတော့ လူတွေလဲဖြတ်သွားဖြတ်လာလုပ်နေတာကို သူဘာမှမလုပ်ရဲလောက်ပါဘူး"

Luhanရဲ့စကားတွေက ယုံကြည်မှုလွန်ကဲနေသလောက် လက်တွေကတော့ဆန့်ကျင်စွာတုန်ရီနေသည်။