وقعت اسير صاحبة العيون الزرقاء

23

ارتدى كرم ملابسه، كان وسيمًا بها للغاية.

كرم: "رد بقى يا عم، أنت فين؟"
عائشة: "ربنا معاك ويوفقك."
عمار: "خلي بالك من نفسك."
كرم: "إن شاء الله."

دلف حازم وهو يحمل عليا على كتفه، وبيده أكياس كثيرة وألعاب كثيرة.

كرم: "كنتم فين كل ده؟ كنت قلقان عليكم. إيه مش بترد على الفون ليه؟"
حازم: "أنت أهبل يا لا؟! أنت مش شايف الأكياس دي كلها؟ هرد إزاي يا أذكى إخواتك؟"
كرم: "طيب يا عم، متزقش. هات عليا عنك وحملها عنه."

عليا: "كان يوم حلو أوي! حازم جاب لي آيس كريم وشوكولاتة كتير ولعب كتير وهدوم كمان."
كرم: "ليه كل ده؟ على فكرة أنا موجود وبشتغل!"
حازم: "اخرس يا لا، أنت مالك؟! عليا أختي زي ما هي أختك، أنت مالكش دعوة! أنا ليا في إخواتك أكتر منك، ولا أنت عندك كلام تاني؟"
كرم: "عيب عليك يا معلم، ده أنت أخويا الكبير برده."
حازم: "غصب عنك! جهزت؟"
كرم: "إيه رأيك؟حلو  مش صح؟"
حازم: "هههههه صح، إلا بقلك... هي المزّة جاية؟ 😉 صح؟"
كرم: "حااازم! إيه مزّة دي؟ يرضيك أقول على ندى مزّة؟"
حازم: "لا، دي مرات أخوك."
كرم: "طيب ما ملك كمان هتكون مراتي!"
حازم: "أنا خايف من ردة فعل هنا!"
كرم: "أنا اللي خايف! صح، هي أختي، بس أنت عارف إنى  بعتبرها أمي."
حازم: "هتعمل إيه لو رفضت العلاقة دي؟"
كرم: "هبعد عن ملك، وهنساها كمان! صح هيكون صعب بس هحاول."
حازم: "هتستسلم بالسهولة دي؟"
كرم: "مش حكاية استسلام، بس هنا أغلى عندي من أي حاجة، حتى لو كانت ملك. مش هضحي بأختي اللي ضحت كتير علشاني أنا وإخوتنا علشان حب كام شهر."
حازم: "أنا فخور بجد بيك، تربية هنا نجحت بجد، تعبها مراحش على الفاضي."
كرم: "صدقني هنا حياتي! كلمتها سيف على رقبتي، دي لو قالت لي أرمي نفسي في البحر، مش هتردد أبدًا إني أعمل كده!"
حازم: "ربنا يخليكم لبعض، ويخليكم ليا." (ضمة)
كرم: "حبيبي يا زومي، أنت كمان مقصرتش معانا، وبجد ونِعم الأخ اللي زيك."
حازم: "يالا عيب عليك، داحنا إخوات، متقلش كده عليا. يلا بينا، أنا عاوز أشوف هنا."
عمار: "ياريت متتأخرش، أنت معاك بنات."
كرم: "والله البنات معاهم بدل الراجل اتنين، يعني ريح نفسك. أنت بس ." (حازم حمل عليا على كتفه)
كرم: "إيه ده… ده دوري أنا!"
حازم: "بس يالا، امشي قدامي!"

---

عند هنا

جهزت نفسها وخرجت من الفيلا مسرعة، متجهة إلى حيث المباراة. كان رعد دالفًا إلى المنزل بسيارته.

رعد: "هنا، رايحة على فين؟"
هنا: "حاجة متخصش حضرتك."
رعد: "لا، تخصني! باقي لسه ساعة ويخلص دوام الشغل."
هنا: "آه، ماشي. أنا رايحة عند كرم، عنده مباراة النهارده."
رعد: "فين؟"
هنا: "اسأل دكتور سيف، هو رايح النهارده. بعد إذنك، هتأخر."
رعد: "اركبي!"
هنا: "شكرًا، بعرف أروح لوحدي!"
رعد: "قلت اركبي!"
هنا: "لا، مش راكبة!"
رعد: "خصم يومين كاملين!"