DIFFA DIADAT MITOHA
Mitoha Si diffa kacida keuheuleunana ku sabab Si diffa nu sok ngalamun baé. Digawé ngalamun, dahar ngalamun, mandi ogé bari ngalamun. Komo deui lamun di pacilingan mah mani beuki anteng ngalamunna téh
Hiji mangsa Si Diffa manggih endog meri, ngagolér dina jarami di sawah mitohana. Si Diffa atoheun kacida. Gancang endog meri téh dibawa ka imahna rék ditémbongkeun ka pamajikanana si ica.
Si Diffa manggih endog meri
“Sukur atuh diffa, mana ka dieukeun urang kulub keur Si ade” ceuk pamajikan Si diffa.”
“Montong! rék dipegarkeun waé, dipilukeun kana hayam abah nu ayeuna keur nyileungleum,” tembal Si diffa.
Tuluy ti dinya, endog téh diteundeun bari ditaksir.
“Kumaha akang waé atuh, ngan ayeuna mihapé budak, uing rék ngisikan dipancuran heula,” ceuk si Ica bari ngajingjing boboko.
Si diffa cingogo diharudum sarung bari nyanghareupan endog méri. Ari budakna mah diantep sina kokorondangan dina palupuh, sedengkeun manéhna anteng ngalamun deui. Kieu ngalamunna téh.
“Endog téh pasti megar, heug bikang, engké pasti ngendog deui. Upamana baé ngendogna sapuluh terus dipegarkeun deui, megar deui jadi boga sabelas méri tah, pék kabéh ngendog deui.”
Mun endogna sapuluh, jadi boga 110 endog, beuki lila méri téh beuki loba. Endogna ogé pasti beuki loba. Aing rék jadi bandar endog. Endog dijualan, aing jadi loba duit. Duitna di beulikeun kana domba bikang.”
“Domba baranahan nepi ka aing loba domba. Dombana dijual ka pasar, terus dibeulikeun munding sarakit, munding ogé baranahan, aing bakal loba munding. Adeuh.. huhuy.. munding aing mani rendang di sawah.”
Keur anteng kitu, geprak baé endog Si diffa téh dibaledog ku si Ica neupi ka peupeus. Sihoréng endog téh kacingcalang.
“diffa, cing atuh kana ngalamun téh mani kamalinaan. Tuh ténjo Si ade mani buncunur sirahna tidagor kana tihang, da diantep baé!”
Si Diffa kalakah molotot ka pamajikannana..
“Kunaon munding aing diruksak ku manéh? Rasakeun ieu paneunggeul!” ceuk Si Diffa bari ngamang-ngamang sapu.
Pamajikan Si Diffa sieuneun, tuluy lumpat ka imah kolotna bari ngais budak. Si Diffa ngudag bari angger ngamang-ngmang sapu. Mitohana norojol ti imah, tuluy nanya ka Si daffa.
Kunaon manéh téh Diffa kawas nu teu éling?
“Bongan munding uing diruksak ku Si Ica abah.”
“a timana manéh boga munding?”
“Pan tina ngajual ladang endog asalna mah,” tembal Si Diffa.
“Bohong ketang, ngalamun wungkul, barina gé endogna kacingcalang,” nembalan.
“Euh kitu? Paingan atuh kebon aing mani ledug diranjah munding, ari manéh boga munding mah. Hayoh gantian! Mun teu di gantian dilaporkeun ka pulisi!” ceuk mitoha Si diffa
“Ampun, ampun abah…!” ceuk Si diffa. “Abdi mah teu gaduh bulu-buluna acan munding téh, éta mah lalamunan. Hayu Ica urang balik!”
Si diffa tuluy ngajak balik ka pamajikanana, mitohana ngan ukur bisa gogodeg..
Isukana si Diffa dititah ngala kalapa ku mitohana. Tina sapuluh kalapa, Si Diffa bakal diburuhan kalapa sahulu. Si difaa atoheun pisan, térékél baé naék kana tangkal kalapa rék ngala kalapa nu kolot.
si Diffa dititah ngala kalapa ku mitohana
Barang nepi ka luhur si Diffa diuk sidengdang dina sela-sela dahan kalapa. Tenggg! baé ngalamun deui..
“Buruh ngala kalapa dijual, ladangna dibeulikeun kana endog hayam, tuluy di pegarkeun, pék di ingu. Hayamna beuki loba, endogna gé réa deuih. Endog dijual ka pasar, aing jadi bandar endog. Tina ladang endog aing rék meuli domba, domba ogé ngaréan, aing jadi bandar domba.
Tina bati domba aing rék meuli munding, éh ketang moal, moal meuli munding bisi ngaruksak sawah mitoha. Ah rék meuli kuda baé, kudana kuda balap, kuda Ustrali nu jangkung téa, aing jokina.
Plok.. plok.. Kudana dilumpatkeun. Bari ngalamun kitu téh Si Diffa reurendeukan dina palupuh kalapa. Kuda téh beuki tarik lumpatna. Horeseeehhh kotoplak.. kotoplak..”
Si Diffa beuki motah bad diukna dina palapah kalapa, nepi ka palapah téh pepelenoyan. Kulantaran motah teuing, palapah téh potong. Si diffa ngoleang kabawa ku palapah kalapa, gebrus baé ka balong.
Untungna tangkal kalapa téh di sisi balong. Si Diffa pipina baréd kena ku regang awi. Sukuna tipalitek. Untung manéhna teu maot ogé. Ti harita Si Diffa kapokeun deui ngalamun dina tangkal kalapa.
