[Unicode]
"သောင်ယံ သောင်ယံဦး"
မိမိနာမည်အား ကျယ်လောင်စွာ အော်ခေါ်နေသောကြောင့် သောင်ယံ ပြတင်းပေါက်၀နား လျှောက်သွားကာ ခြံရှေ့သို့ မျှော်ကြည့်လိုက်သည်။ ၀ဏ္ဏနှင့်ကျော်ထင်တို့ ညီအစ်ကိုဖြစ်ပြီး အ၀တ်အစားများကလည်း တွန့်ကြေနေကြ၏။ သူ့ကို မြင်သွားလျှင် အပြင်ထွက်လာရန် လက်ဟန်ခြေဟန်နှင့် အချက်လှမ်းပြသည်။
"ဘာလဲ။ မင်းတို့ပုံတွေက ဘာဖြစ်လာကြတာလဲကွ"
"လာ ! ဒီနား တိုးစမ်းပါ"
ခြံ၀၌တင် ရပ်နေသော သူ့အား အားမလို အားမရဟန်ဖြင့် ကျော်ထင်က စက်ဘီးပေါ်မှ ခုန်ချကာ အနားကပ်လာသည်။ တောင်ကြည့်၊ မြောက်ကြည့် ကြည့်လိုက်ပြီးနောက် ပါးစပ်နားကို လက်ကာကာ တိုးတိုးလေး ဆို၏။
"ကိုလတ်တို့ ရန်ဖြစ်ကြလို့"
"ဘယ်လို ?"
ကြားရတဲ့ သတင်းက ထူးဆန်းနေသည့်အပြင် ကိုလတ်ဆိုတော့ အံ့ဩသွားရသည်။ ကိုလတ်က ပြောင်ချော်ချော် နေတတ်သော်လည်း ရန်ဖြစ်ခြင်း ကိစ္စဟူသည် မရှိသလောက် ရှား၏။ ကျောင်းရှိ လူတော်တော်များများက ကိုလတ်ကို ဝိုင်းချစ်ကြသည်မို့ သူတောင် အားကျနေရသည်ပင်။
"ကိုလတ် ! ဘယ်သူနဲ့လဲ"
"သူ ကြိုက်နေတဲ့ အစ်မကြီး ရည်းစားနဲ့။ ငါတို့တော့ ဖျန်ဖြေပြီး လူခွဲခဲ့တာပဲ။ နည်းနည်း ထိသွားတာမို့ မင်း ဆေးလေးဝါးလေး ယူပြီး သွားလိုက်ဦး ဟေ့ရောင်"
သောင်ယံ မျက်မှောင်ကြုတ်ကာ မေးခွန်း ပြန်ထုတ်လိုက်သည်။
"မင်းတို့က တစ်ခါတည်း ခေါ်မလာဘဲနဲ့။ သူ တစ်ယောက်တည်း ထားခဲ့ရလား"
၀ဏ္ဏက သူ့စကားကြောင့် ကျစ်ခနဲ စုတ်သပ်သည်။
"ဒီကို တန်းခေါ်လာလို့ ဘယ်ဖြစ်မလဲကွ။ ပြီးတော့ ဖေကြီး အပြင်သွားနေတုန်း ငါတို့က ခိုးထွက်လာရတာ။ ကြာနေရင် အိမ်ပြန်ရောက်တော့ အဆူခံရဦးမယ်"
သူတို့အဖေအကြောင်း သိသည်မို့ သောင်ယံ ခေါင်းညိတ်လိုက်သည်။
"အေးအေး ငါ သွားလိုက်မယ်။ မင်းတို့ မြန်မြန်ပြန်"
သုတ်ခြေတင်ကာ နင်းသွားသောစက်ဘီးကို ရပ်ကြည့်မနေနိုင်ဘဲ အိမ်ထဲသို့ ပြန်ပြေး၀င်လာခဲ့သည်။ ဧည့်ခန်းထဲရှိ စာအုပ်စင် အပေါ်ထပ်က ဆေးအိတ်ထဲသို့ လက်နှိုက်လိုက်ပြီးနောက်တွင် ကျောင်းလွယ်အိတ်ထဲသို့ ထိုအရာများကို ခိုးထည့်လိုက်၏။
YOU ARE READING
အစိမ်းရင့်ရောင် စာမျက်နှာ { Completed }
Teen Fictionဆုံဆည်းခဲ့ကြချိန်ဟာ ဒုက္ခတို့မြစ်ဖျားခံခဲ့ရာ မူလအစဖြစ်ခဲ့လျှင် ခွဲခွာခဲ့ရချိန်သည်ကား ချစ်ခြင်းတရားတို့ ထက်သန်ခိုင်မာရာဖြစ်သည်။ 📖 15/12/2020 - 13/3/2021 ✍️ 16/07/2020 - 24/10/2020
