အစိမ်းရင့်ရောင် စာမျက်နှာ { Completed }

Do I miss something? 3

[Unicode]

ရာသီဥတုက ပူလာသဖြင့် ရှပ်အင်္ကျီလက်ကို တံတောင်ဆစ်လောက်အထိ လွမ်းလတ်နောင် ပင့်ခေါက်လိုက်သည်။ ခြေသည်းညှပ်ထားသဖြင့် တိတိညီနေသော ကိုယ့်ခြေထောက် ကိုယ် ငုံ့ကြည့်ကာလည်း ကျေနပ်စွာ ပြုံးလိုက်မိ၏။ နာရီမှာ မနက်ရှစ်နာရီ ကွက်တိ။

ဒီလောက်ဆို မင်းဘယ်ပြေးမလဲ သောင်ယံ ဟားဟား။

အဆောင်ထဲမှ ထွက်လာသူကို ပြုံးပြနေစဉ်မှာပင် ပြန်လည်ရရှိလာသော အပြုံးတစ်ပွင့်ကြောင့် first impression ကောင်းသွားပြီဟု ထင်မိသည်မှာ လွမ်းလတ်နောင် တွက်ကိန်းမှားသွားခြင်းပင် ဖြစ်သည်။ တကယ်တမ်းတွင် နွားပွဲစားတွေလို သွားဖြီးပြနေသောသူ့အား ကျော်ပြီး သောင်ယံက အနောက်ဘက်ဆီသို့ ဆက်လက် လျှောက်သွားလေ၏။

မကျေမနပ်ဖြင့် ခေါင်းကို အလျင်အမြန် လိုက်ပါ လှည့်လိုက်လျှင် တွေ့လိုက်သည်က...

"ခန့်တည်နိုင် !!"

သောင်ယံနှင့် ရယ်ရယ်မောမော စကားပြောနေသူကို ကြည့်ကာ လွမ်းလတ်နောင် တောက်တစ်ချက် ခေါက်လိုက်မိ၏။ ဒီလူကို သူသိသည်။ ကွယ်ရာမှာ တခြားသူတို့က ထိုလူအား နှစ်လမ်းသွားဟု ခေါ်တတ်ကြ၏။

သို့သော် ဟိုအရင် ကိုဆက်တို့က ထိုလူဟာ မိန်းကလေး၊ ယောကျ်ားလေး နှစ်မျိုးစလုံး ရသည်ဟု ခဏခဏ ပြောကြစဉ်က သူကပင် ထိုလူ့ဘက်က နာလိုက်သေး၏။ လူတစ်ယောက်၏ သိက္ခာအား ဂဃနဏမသိဘဲ ရမ်းသန်းထင်ကြေးပေးတာမျိုးကို သူမကြိုက်။

အခု...အခု သူတို့ပြောတာက မှန်နေသလိုလို၊ လွမ်းလတ်နောင် စိတ်ထဲက ထင်လာသည်။ စာအုပ်တစ်အုပ် ပေးရာတွင် ဒီလောက်အထိ ပြောစရာ စကားများများ ရှိလေသလား။ ဘာကြောင့် ထိုလူ့လက်က သောင်ယံ့ပုခုံးပေါ် ရောက်လိုက်၊ လက်ပေါ် ရောက်လိုက် ဖြစ်နေရသလဲ။ သူ့ကို ရန်လိုနေသည့် သောင်ယံကရော ဒီကောင့်ကျတော့ ငြိမ်နေရသလား။

ဆယ့်ငါးမိနစ်ခန့် ကြာပြီးနောက်တွင်တော့ မကြည့်ချင်တော့သဖြင့် လွမ်းလတ်နောင် ဒီဘက် ပြန်လှည့်နေလိုက်သည်။ လူတစ်ယောက်ကို တော်ရုံတန်ရုံ ကြည့်မရ မဖြစ်တတ်သော်လည်း ဒီလူကျမှ တော်တော်‌လေး ကျက်သရေမရှိဟု ခံစားနေရ၏။