[Unicode]
နေက ကောင်းကင်၏ အလယ်တည့်တည့်သို့ ရောက်ရှိလာသည့် အချိန်တွင် လေကလည်း ပြောင်းလဲကာ လာသည်။ ရန်ကုန်လေသည် ပူသည်၊ သို့သော်လည်း အညာလေလို မဟုတ်။
အညာလေသည် သဲမှုန်လေးတွေပေါ်မှ ဖြတ်တိုက်လာသော လေဖြစ်၍ အပူလွန်ကဲသည်။ ပတ်၀န်းကျင်ကလည်း ခြောက်သွေ့သည်။ အိပ်ရာနိုးကာစက မပီမပြင်သာ ရှိသေးသော အညာသည် တရွေ့ရွေ့ ဖြတ်ကျော်ပြီးနောက်တွင် တဖြည်းဖြည်းနှင့် ရုပ်လုံးပေါ်လာ၏။
မြို့ပြရန်ကုန်၏ တိုက်တာများနှင့် ကွဲလွဲသော ခြေတံရှည်၊ ခြေတံတိုအိမ်များက လမ်းတစ်လျှောက်၌ ရှိသည်။ ထနောင်းပင်အို၊ ပင်ပျိုတို့နှင့်အတူ တမာရနံ့တွေက ကားတွင်းသို့ ဝေ့ဝဲကာလာနေသည်။ အခက်အလက် ဝေဖြာသော ထန်းပင်ပေါ်မှ ခါး၌ ထန်းရည်အိုးများ ချိတ်ထားသည့် ဦးကြီးတစ်ဦး ဆင်းလာသည် မြင်သောအခါ-
နွေဦးကာလ၊ မြူထသောအခါ
ရင်းထောင်ရင်းဆွဲ၊ ဆောင်မြဲအိုး လွယ်ကာ
ဓားနှီးထက်စွာ၊ ခါးမှာချပ်လျှက်
ထန်းပွင့်ထန်းခိုင်၊ ရွှန်းမြိုင်မြိုင်
ကလိုင်သာလွယ်လို့ တက်သည်နှင့်လေး။
ဟူသော ၀န်ကြီးပဒေသရာဇာ၏ 'နွေဦးကာလ မြူထသောအခါကို' သတိရမိ၏။
"ဘယ်နှစ်နာရီ ထိုးပြီလဲ"
"ဆယ့်တစ်နာရီ ခွဲပြီ။ ဆယ့်နှစ်ကျရင် ပုပ္ပားမှာ ထမင်း၀င်စားကြမယ်"
"အေးအေး မောင်းပါကွာ။ ပုဂံကို ညနေရောက် ပြီးတာပါပဲ"
Schedule ညှိနှိုင်းနေသည့် အထဲတွင် ပုပ္ပားဟူသော အမည်ပါလာသဖြင့် လွမ်းလတ်နောင် ရင်မှာ လှုပ်လှုပ်ရှားရှား ဖြစ်လာပြန်သည်။
စိတ်ထဲက အမေးစကားတွေကို ဖြေရှင်းပြီးမှ သူလည်း နေလို့ထိုင်လို့ ကောင်းသွားမှာ အမှန်။ အခုတော့ သို့လောသို့လောနှင့်။ အဘွားကတော့ ညာမည် မဟုတ်၊ သို့သော်လည်း သူပုပ္ပားမှာ နေခဲ့ရိုးမှန်လျှင် အဘယ့်ကြောင့် မမှတ်မိရသနည်း။ ထိုကိစ္စကို စိတ်တိုင်းမကျ ဖြစ်မိသည်။
"ဆင်းကြတော့ ငါ့ကောင်တွေ။ ရောက်ပြီ။ ဒါ ငါတို့လာတိုင်း စားနေကျ ထမင်းဆိုင်"
YOU ARE READING
အစိမ်းရင့်ရောင် စာမျက်နှာ { Completed }
Teen Fictionဆုံဆည်းခဲ့ကြချိန်ဟာ ဒုက္ခတို့မြစ်ဖျားခံခဲ့ရာ မူလအစဖြစ်ခဲ့လျှင် ခွဲခွာခဲ့ရချိန်သည်ကား ချစ်ခြင်းတရားတို့ ထက်သန်ခိုင်မာရာဖြစ်သည်။ 📖 15/12/2020 - 13/3/2021 ✍️ 16/07/2020 - 24/10/2020
