[Unicode]
၁၀ ထဲက ၉ ကို အရင်နုတ်ပြီးမှ ၇ နဲ့ပေါင်းရမှာလား။ ဒါမှမဟုတ် ၁၇ ထဲက ၉ ကို တန်းနုတ်ရမှာလား။ ခေါင်းကုတ်လိုက်၊ လက်ချောင်းတွေ ထောင်လိုက် လုပ်နေသော သောင်ယံ့ပုခုံးကို စည်သူက ပေတံနှင့် တဖျတ်ဖျတ် လာရိုက်နေသည်။ စကားပြောချင်၍ ခေါ်နေမှန်း သိသော်လည်း ရှေ့က စာက အရေးကြီးသဖြင့် လှည့်မကြည့်ဘဲ ခေါင်းကိုသာ ငုံ့ထားလိုက်၏။
"သောင်ယံ သောင်ယံ"
"ဘာလဲကွာ"
"အဲ့တစ်ယောက်က သင်္ချာ အရမ်းတော်တယ်လို့ ပြောတယ်ကွ။ သူ့အစ်ကိုအတန်းက သင်္ချာတွေတောင် သူက ရနေပြီတဲ့။"
"ဘယ်တစ်ယောက်လဲ"
"ဟိုခုံမှာလေ။ အသစ်ပြောင်းလာတဲ့ တစ်ယောက်။"
မျက်နှာခြင်းဆိုင်ခုံသို့ လှမ်းကြည့်လိုက်တော့ ခပ်ထောင်ထောင် ဆံပင်နှင့် ကောင်လေးက ရယ်ကာမောကာဖြင့် တစ်ခုခုကို ပြောနေသည်။ ဘေးနားက လူတွေကလည်း သူပြောတာကို သဘောကျဟန်နှင့် တဟီးဟီး၊ တဟားဟား လိုက်ရယ်နေကြသည်။
"ဒီနေ့ကျတော့ ရုပ်က တစ်မျိုးပါလား"
အော်တိုမှတ်ချက်ပေးမိလျှင် စည်သူက အံ့ဩသွားသော မျက်လုံးများဖြင့်။
"ဟမ်။ မင်းက သူနဲ့ သိလို့လား။"
"မသိပါဘူး။ စကား မများနဲ့ကွာ စည်သူ။ ဒီမှာ တွက်မရတဲ့ အထဲ။"
"မင်းသာ တွက်မရနေ။ သူက သွားပြပြီးသွားပြီကွ။"
"အဲ့ဒါဘာဖြစ်လဲ။ သူ့ဘာသူ ပြပြ၊ မပြပြ။"
စိတ်တိုတိုနှင့် မျက်မှောင်ကြုတ်ကာ လှမ်းကြည့်လိုက်တော့ ထိုကောင်လေးကလည်း သူတို့ဘက်သို့ ကြည့်နေသည်။ သူခိုး လူမိသွားသဖြင့် ခေါင်းကို ပြန်ငုံ့ထားလိုက်ပြီး လက်ချောင်းတွေကိုသာ ချိုးနေလိုက်မိ၏။
•
ပိန်နေသော ဘီးလေးကို လက်နှင့် ထပ်ညှစ်လိုက်တော့ ပိုမိုကာ ချိုင့်၀င်သွားသဖြင့် နှုတ်ခမ်း ထော်သွားမိသည်။ မနက်က စီးလာတုန်းကတောင် အကောင်း၊ အခု ကျောင်းဆင်းတော့ ပေါက်နေသည်။
YOU ARE READING
အစိမ်းရင့်ရောင် စာမျက်နှာ { Completed }
Teen Fictionဆုံဆည်းခဲ့ကြချိန်ဟာ ဒုက္ခတို့မြစ်ဖျားခံခဲ့ရာ မူလအစဖြစ်ခဲ့လျှင် ခွဲခွာခဲ့ရချိန်သည်ကား ချစ်ခြင်းတရားတို့ ထက်သန်ခိုင်မာရာဖြစ်သည်။ 📖 15/12/2020 - 13/3/2021 ✍️ 16/07/2020 - 24/10/2020
