سلام

كورنيك لم اجدك في ضعفي

اليوم الخطبة تاعي مع الانسان لي عشقتو و كنت نحلم بيه .. بعد عناء و صبر تع 6 سنين و اخيرااا يماه رضات و قبلت بيا
مارقدتش هذيك ليلة و انا نسقم فالحوايج و نتاكد بلي لي كوموند تع القاطو راح يوصلو فالوقت
هبلت دارنا معايا .. بابا ملي ناض صباح و هو داخل خارج يشري و جدي فرحان يقولو غير ساعفها ..
فصباح قبل ما يوصل الوقت عيطت لاكوافوز باش تجي عندي تشمطلي و تمشط لختي الصغيرة .. كان قاتلني توسويس خفت تخليني و ماتجيش هه
لبست قفطان ابيض سامبل بصح كلاس و درت مسياسة تع ذهب شراهالي حبيبي لحسن
شحال كنا فرحانين انا وياه سيرتو كي لبسلي الخاتم و حتى انا لبستلو واحد باش وحدة مادورلي بيه الله غالب نغير بزااف ههه
رجعنا كل مرة نخرجو مع بعض نشرو حوايج للدار
من بعد انسيستات يماه باش نعيشو معاها و انا قبلت .. المهم نكون مع الانسان لي نحبو الباقي ما يهمنيش .. حتى الخدمة و مادخلتش نخدم
بديت نجري و نوجد في حوايجي ماكنت حابة تنقص حتى حاجة.
بدلت قشي و انا مقلقة باش نخرج .. غير فتحت لباب وقف في وجهي وائل ولد عمي
تبسمت معاه و جيت رايحة حبسني :
- الخاتم راه يبان شباب على يدك
- (تنهدت و ماحبيتش نكثر معاه هدرة ) صحيت
- (عاود حبسني ) وريلي نشوفو (شدني من يدي قعد يشوف فيه و يهدر ) سبحان الله غير كيما لي جبتهولك .. اممم بلاك تاعي كان فيه الشوك علابيها ماقبلتيش
- (جبدت يدي منو ) وائل .. راني مخطوبة ضرك .. و انت قلتهالك اللللف مرة راك في مقام خويا لكبير
خليتو و رحت .. من عند ربي مانحملوش خامج و تع شراب بسكو باباه مقلشو كي هو الولد الوحيد لي عندو .. و زيد عمي عندو دراهم كان يدخل فاي مشروع سواء حلال ولا فيه الرشوة المهم يشوف الدراهم قدامو و خلاص
و بابا كان يخاف من هاذ لحوايج و مايحبش يتشارك معاه .. بقينا ناس قلاليل على قدنا و عايشين في دار جدي
نهار لعرس ماكنتش مامنة بلي لي حلمت بيه راه يتحقق .. كنت خايفة نفطن و يكون غير منام و يماه مازالها شادة فرايها .. حتان سمعت لكلاكسون تع طوموبيلات و شفت لحسن بالكوستيم شادلي يدي و مخرجني من دارنا تماك باش امنت
كنا طايرة فالسماء بالفرحة و هو كل دقيقة يسلم على يدي و يقولي خلاص وليتي حلالي ..
بقا مهبلني و قاعد على احر من الجمر باش يكمل لعرس و نروحو للوتال