سلام

الجزء السابع

تقهويت لبست قشي و خرجت برا نتنفس شوية .. دخلت لوحد لجاردان و قعدت نتامل فالدنيا و نجرب نهرب فعقلي و مانخليهش يتخايل واش صرا بين لحسن و بين مرتو جديدة ..
جربت نرجع لحياتي لقديمة كلي ما صرا والو .. بصح الحاجة لي راح تتبدل انو نعيش لروحي برك .. خلاص ضرك مارانيش اي مطلقة و مانقدرش نعاود زواج
شكون لي راح يدي وحدة ماتجيبش ولاد
هاذ الفكرة برك كانت تقتلني و ترجعني للحياة ..
حوست على خدمة فقاع لبلاد مالقيتش .. وليت نقعد فدار نقري خاوتي و نقابل جدي لي حالتو كانت مخوفتنا
كل ليلة يخلعنا كي يبدا يسعل شغل نفس راح يحبسلو .. نعيطو للاسعافات و كي يوصلو يقولونا ماباقيلوش بزاف علابيها راه يدير هكذا
ولينا نتناوبو عليه كل ليلة انا و بابا و ماما
وائل ولد عمي جا عندنا مرة زعما باش يشوف جدي
خلا غير بابا خرج يصلي و ماما راحت تدوش و لحقني للكوزينة
حسيت ببنادم واقف عند لباب درت مخلوعة :
- واشبيك وائل
- والو حبيت نسقسي عليك برك .. و كيفاش راكي دايرة مع حياتك جديدة بعد طلاق
- راني مليحة
- قرب عندي : شفتي الراجل لي كنتي هابلة عليه بين ليلة و نهار خلاك
- و انت واش دخلك
- زاد لصق فيا : علابالكي ضرك كي راكي مطلقة كن ندير فيك حاجة واحد ماراح يفيق و كلي ما صرا والو
طبعتو هزيت لموس و بديت نعيط :
- واائل خرج منا تعرفني مليح بلي مهبولة و قادرة ندير فيك حاجة
جا باش يشدلي يديا سمع يما خرجت من دوش هرب يجري من الدار
وحد النهار كانت نوبة بابا باش يبات مع جدي .. كامل كنا راقدين و انا عقلي كان غير في حياتي كيفاش راح ندير و نبدا من جديد
حتان سمعت بابا يعيط :
- الله اكبر الله اكبر
قفزت من بلاصتي نجري و رجليا يرجفو
دخلت عندو نلقاه طايح على ركابيه و قاعد قدام جدي لي كانو عينيه مفتوحين و مايتحركش :
- ج..جدي جددددددي
رحت نجري نهزهز فيه جبدتني يما :
- لا اله الا الله لا اله الا الله .. انا لله و انا اليه راجعون
- ماما عيطو لومبيونص ماماتش جدي ماماااااتش

هبطلو بابا على عينيه و غطاه و هو يبكي كي طفل صغير
فوق الغبينة و الحزن لي كنت .. بعد ما خسرت حب حياتي و خسرت لولاد .. زدت خسرت جدي
كان مضويلنا الدار بحكاياتو و فرحتو لينا فصغيرة و لكبيرة
نهار سمع بيا طلقت كان راقد في بلاصتو ما يتحرك ما يهدر بصح الدمعة هبطت من عينو ..
رجعت كي لمبهولة ما نهدر مع حتى واحد ما ناكل .. غير نتحرك كيما روبو نعاون ماما فالجنازة