سلام

الجزء الاول

بدينا نحققو فشي لي بنيناه كي كنا مع بعض قبل الزواج .. سافرنا و داني لاكثر بلاصة نحبها
مرات كي نتناشعو كل واحد يروح يرقد في جيهة بصح كي نوضو صباح ننساو كلشي و نرجعو نورمال .. واحد فينا ماكان يصبر على لاخر ..
يماه كانت مرات تقزيني بصح بشوية بدات تتقبلني و بدينا نوالفو بعض .. و انا كبرت عقلي لي تقولو نديرولها
كنا كيما عصافير الحب عايشين حياتنا و متفاهمين فالحلو و فالمر
عام يجيب عام بدا الهم يتسلل بشوية لحياتنا ..
عجوزتي كانت حابة نجيبو ولاد من عامنا اللول و بسيييف باش قنعها لحسن بلي رانا حابين نستمتعو بحياتنا قبل ما يجيو لولاد .. بعدها بعام وحدوخر بدا لحسن يجبدلي على هاذ السوجي و حتى انا كنت حابة نعمرو دارنا و نطبعو قصة حبنا بطرف مني و منو
بدا يدخلني الخوف كيفاش عامين كاملين ماهزيتش و شي لي زاد عليا عجوزتي كانت مهبلتني كل يوم .. فلانة ولدت و فلانة جابت طفل يوقف مع باباه و فلانة ولات جدة
و هنا ديسيديت نروح لطبيبة و نشوف واش هي سبة التاخر هذا .. لقيت عندي مشكل فالمبايض بصح بدواء يروح
فرحت انا و لحسن كي عرفنا بلي حاجة تداوى.. كي رجعت لدار رحت حكيت لعجوزتي باش نطمنها :
- يما ليوم كي رحت لطبيبة قاتلي عندك بروبلام خفيف و يتعالج
- و هاذ لبروبلام كان عندك من قبل زواج ؟
- مانيش عارفة
- حاجة باينة ماتعرفيش .. تهبلو باش تتزوجو و ديرو لعرس و فيزيت ماقدرتيش تروحي لطبيب تفيريفي روحك قبل زواج .. تجيو لديار ناس و تجيبو معاكم المرض و الهم
بقيت مخلوعة من ردة فعلها .. وجعتني بزااف هدرتها حتى خلاتني نبكي بيني و بين روحي ..
كانت تجي عندنا مرت خالو لكبير .. مراة حنينة بزاف و متدينة .. كي نحكيلها تبقى تصبر و تقوي فيا و تنصحني بالاعشاب
بعد ماكملت تراتمون تاعي زدت ربع شهر و حاجة ماتبدلت
و هنا لحسن بدا يتقلق كثر سيرتو كي ولات عجوزتي تخليه غير يجي من لخدمة تعبان و مقلق تبدا تعمرلو فراسو و يجي عندي يخرج زعافو فيا و يعيط