سلام

الجزء الثالث والعشرون والاخير

#الجزء_الثالث_والعشرين الاخيييرررر 😍😍😍😍😍😍😍

داني فارس للجينيكولوق بسكو ماكنتش قادرة نروح وحدي .. دخل معايا
انا قلت سير يكون فيا كاش فيبروم فالرحم ولا حاجة بعيد الشر
بدات تشوف فلي و انا و فارس مقلقين
- دكتور اذا فيا حاجة مشي مليحة تعيشي قوليلي
- تبسمت معايا : حاجة مليحة و بزاااف
شفت انا و فارس فبعضانا
- واش هي دكتور ؟
- راكي بالحمل مادام و هاذ الاعراض مشي تع لي سطوما غير تع الوحم
تالمون ما امنتش قلت بلاك راها تهدر على مراة وحدوخرا ولا
- انا ؟
- ايه نتي و مالا شكون هه ؟
من الفرحة وقفت من بلاصتي :
-وين راه وويين وريهلي
- ههه ماراهش فتيليفيزيون راه فكرشك كيفاش نوريهلك و نتي واقفة
درت عند فارس مخلوعة و نهدر كي لمهابل :
- سمعت واش قاتلي فارس ياك مشي وحدي لي سمعت
- شدني من وجهي و قعد يهد فيا : ايه عمري سمعت هه اتكسلي ضرك تزيد تشوفلك
وراتولي فالايكو و زادت سمعتلي ضربات تع قلبو ..
شحال بكيت هذاك النهار بالفرحة و خرجت صداقة .. هذا لي كانو يقولو عليا عاقر اليوم الرحم تاعي راه معمر بولدي من احشائي
بعد شهورة عرفت بلي بنت تاني .. كنت نوجدلها و طايرة بالفرحة و حتى هدى و رحمة فرحو كي عرفو راح تولي عندهم اخت
فارس مسكين كان خايف لوكان يتعاود نفس الكابوس كي راحت مرتو تولد .. مرات فليل نلقاه نايض يخمم .. و كي يشوفني نتقيا حشاكم يدخل معايا يشدني
نهار لي حبيت نولد عيط لكامل لي يعرفهم يخدمو فالكلينيك باش يوفرولي كلشي
كي ولدت و شافني حية و لبيبي بين يديا عااد باش رجع فيه الروح و قدر يفرح بيها
بعد ربع شهر من ولادتي و بلا ماندير حتى حساب زدت لقيت روحي بالحمل .. سبحان الله ربي كي يعطي للانسان و يفرج عليه يمدلو بلا حسااب 😍
فارس كي سمع :
- هه غير بشوي عليك حابة ترجعي قنينة
- ايه واقيل راني نشري فيهم من واد كنيس هه

نهار لي عرضتني مرت خال طليقي لعرس بنتها كانت تاني اسعد فرحة ليا فهاد الدنيا .. حبيتو يندم و يشوف بعينيه .. بسيف باش قنعت فارس كان غاير و خايف كن نتلاقاه
ضربت الحطة هذاك نهار لبست بناتي في ثلاثة و انا لبست غوب مزيرة باش كرشي تبان
غير دخلت نسا كامل عرفوني .. ااايه هذوك كامل هدرو فيا و قالو عليا مقطوعة الذرية
كانت عجوزتي و كنتها قاعدين بين نسا ..غير شافتني تصمرت في بلاصتها
رحت سلمت عليها و قعدت نعيط لبناتي :
- هدى ماتخليش منى تبعد
- صحا ماما
هدى و رحمة باينين مشي بنات بسكو عندهم 4 سنين بصح كرشي تسكت كامل الناس
- وشراكي خالتي لاباس
- (جاوبتني و وجها كحل ماقدرتش تقابلني ) لاباس لاباس
- فرحيني خالتي و وريلي حفادك .. حابة نشوف ولاد لحسن لمن يتشبهو
- لحفيد لول طاح من كرشها
- اااه معليش ربي يعوضهم
كي جا فارس باش يديني و جيت خارجة .. تلاقيت لحسن لي كان مصدوم و مقهور فنفس الوقت .. كان حاب يجي يهدر معايا .. دورت وجهي و طلعت فطوموبيل مع فارس :
- خلاص حبيبي ليوم باش قلبي ريح و تهنيت .. دير قران دير نحي العين على كبيداتي
- لازمهم راقي مشي CD هه

جامي تقنطوا من رحمة ربي .. مرات ياخرنا لحاجة لمليحة باش نفرحو بيها فرحة اكبر ❤
النهاية