سلام

الجزء التاني و العشرون

#الجزء_الثاني_والعشرين

بعد ربع ايام جا خطبني وجاب معاه هدى و رحمة .. غير دخلت ناضو جاو عندي :
- ماما امينة
جمدت انا و فارس في بلاصتنا .. من بعد ماحبنيش نبقى مخبية عليهم و صارحهم هو .. قدامو يما قعدت غير تقول ماعليش و تضحك .. غير خطبني و خرج طاحت فيا بالبليغة ههه مخطوبة و نتضرب
في زوج ما حبيناش نديرو عرس كبير .. درنا حفلة شابة و كلاس بيناتنا حنا صحاب و لافامي لقراب ..
كنت حاسباتو ماعندوش لافامي .. صار عندو باباه و يماه برك عايش وحدو و فالويكاند يدي لبنات و يروحلهم .. عرفني بيهم فالخطبة ناس ما شاء الله عليهم .. فرحو كي حفادهم لقاو لمراة لي تحافظ عليهم من قلبها
لبست روبة بيضة سامبل و هو لبس كوستيم نورمال .. و بناتي لبستلهم غوب بلانش 😍
امنوني صح عشقت و تزوجت .. بصح دايما ربي يخليلك الانسان المناسب للوقت المناسب .. كلشي كان بسيط و خفيف بصح فات شباااب بزااف و اثر فياا
حتى كي فارس قرب ليا فهذيك ليلة .. حسيت اول مرة نتزوج
هو كملي النقص لي كان فيا و انا كملتلو النقص تاعو
كنا فرحانين بعايلتنا صغيرة
وحد لمرة زعفني و خرج .. ايا فالعشية حب يراضيني .. خرجنا نتعشاو
كان فخاطري بيتزا كاتغ سيزون و شاوارما بالمايوناز .. كليت كليت حتان ماقدرتش نتنفس
- امنية هه غير بشوية عليك
- اسكت انت بذات ماتهدرش معايا .. كنت مشنفة على لماكلة بسبتك
و زادت رحمة كل دورة تدخلي فص بطاطا في فمي
فوت هذيك ليلة حشاكم غير فتوالات نتقيا
- شفت واش درتي في روحك هلكتي ليسطوما
- ماكنتش حاسبة راح يصرالي هكذا
سمانة كاملة و انا فنفس الحالة غير نتقيا
رحت لطبيب دارلي راديو مالقا والو ..من بعد بعثني عند لجينيكولوق