سلام

الجزء السابع عشر

#الجزء_السابع_عشر

بقيت نشوف فيه و بعينيا نسقسي فيه (علاجال من )
فطن على روحو :
- قصدي .. قصدي بلاك تحتاجي كاش حاجة .. قوليلي ماتحشميش
- كثر خيرك والله مانقصني والو
وقف و شاف فيا و عينيه ذابلين :
- كثر خيرك نتي .. والله لبنات والفوك بزااف و دخلتي قلبنا بلا مانحسو
يااا يما على دخلتي قلبنا .. زعمة راه يمعني ولا غير قالها بعفوية
فاتو ليام و بديت نحس بحوايج من جيهة فارس .. ولينا نتلاقو بزااف ..رجع يجي على 5 قبل مايكمل وقتي و يدير سبة باش يوصلني للدار .. الهدرة بيناتنا كانت غير بالعينين

قرب النهار لي نخلصو فيه عمي على لكرا .. جا وائل للدار بكل كونفيونص كان داير فراسو مش راح نوجدو لبري .. باباه مااكنش كامل عارف بواش راه يدير ولدو .. و بلي راح يحوس يخطبني و بالمقابل يكتبلي نص الدار .. والله يدفنو و هو حي .. عمي كلشي كلشي غير دراهم ..
كي لعادة دخل لصالون و قعد يهدر مع ماما .. جيت انا من برا غير شفتو دورت عينيا و رحت لشمبرتي جبدت دراهم .. رحت عندو رميتهملو :
- هاكم حقكم
تخلع شوية بسكو ماستناش هاذ شي .. جبدهم حسبهم لقاهم كاملين
- اهيه نستعرف بيك .. منين تسلفتيهم
- ماتسلفتش حق خدمتي
- واش راكي تخدمي
- واش دخل انت ادي دراهم و خرج
- نشعتني يما : ايا سكتي شوية .. راها تخدم فرملية فسبيطار
طلع حاجبو و ضحك بجيهة .. حسيتو ما امنش بسكو لفرملية يخلصو قل من هاك
- مالا فرملية ؟
ماحبيتش نجابو ..نبرة صوتو و شوفتو خوفوني ..رحت و خليتو

وحد المرة رحت نخدم كي العادة و جيت راجعة للدار .. انا غير دخلت لقيت يما وجهها كحل .. حسبت بابا كشما صرالو ..
-وشبيك يما ؟
- فوتي لصالون
دخلت لقيت لهم تع وائل
- بففف
- من لولة قولي راني نروح لديار رجال مشي تكذبي و تقولي فرملية
- اعرف واش تهدر و ديجا واش دخلك فيا لابغا نخدم رقاصة
- الحومة كاملة تعرفك و تعرف بلي بنت عمي حابة طيحي بوجهي
- هههه شكون لي راه يهدر على الوجه ؟ شي لي درتوه فيما و وصلتو بابا ليه ما خممتوش في وجهكم ؟ ايه حاجة باينة بسكو اصلا ماعندكمش وجه
بقا يشوف فيا شحال .. زير على سنيه و هدر :
- لوكان ماتوصليش نتي لي تجي عندي لدارنا و تقوليلي ايه قبلت ارواح تخطب مانتسماش وائل ..
خرج من دارنا و خلا الخوف ياكل فيا .. يقدرو يديرو كلشي مايخاف لا من العبد لا من ربي