فاتو 3 شهر على نفس الحالة .. وحد النهار كانت فيا لاقريب و ماقدرتش نوض بكري كيما موالف .. زدت شوية و فورصيت على روحي .. كي رحت للكوزينة لقيت عجوزتي و لحسن قاعدين مع بعض يحكيو و غير شافوني سكتو
فهمت بلي سوجي كان عليا .. ناض لحسن شاف فيا وحد شوفة حسيت فيها بزااف حوايج حاب يقولهم و ما قدرش
خرج راح يخدم و انا تقهويت و نضت باش ندير لغدا
كنت واقفة فالبوطاجي نقي فالخضرة .. بدات عجوزتي بشوية تقرب مني ..من وجهها باين عليها متوترة و حابة تهدر
- امينة نسقسيك
- انعم يما
- يخي تحبي لحسن ؟
- (تبسمت مقهورة) نحبو يما نحبو
- مالا تحبي تشوفيه فرحان
- (فهمتها واش راح تقلي مالا بديت انا نهدر ) يما ملي رحت لدارنا و انا من طبيب لطبيب و راني نشرب فدواء و ندير
- و مابان والو
- الله غالب مشي بيدي انا هكذا تكتبتلنا
- بصح انا خلاص مارانيش حابة نشوف وليدي كاره حياتو و ذابل .. كي ماقدرتيش نتي تفرحيه ..
هزيت عينيا شفت فيها و قلبي يخبط كنت شاكة فوحد لهدرة راح تقولها بصح نعلت شيطان و قلت محاااال
- كي ماقدرتيش نتي تفرحيه خليه يعاود الزواج و يجيب لولاد
طاحت لبطاطا من يدي قعدت نشوف فيها بصح عقلي كان بعييييد
كلمة يعاود زواج دخلتلي موس حامي فقلبي .. كيفاش انا نزوج راجلي .. لالا كيفاش الراجل لي عشقتو و حبيتو نمدو لمراة وحدوخرااا
صح من حقو يعيش حياتو كيما تمنى بصح كيفاش انا راح ندير .. مانقدرش نتخايل الراجل لي نحبو راقد مع مراة وحدوخرة و يحبها
و هي تهز منو بولدو
تعمرو عينيا بدموع و ماعرفتش واش نجاوبها :
- ب..بصح لح..لحسن م..محال يخمم فهاذ الشي و راه صابر
- حتى انا كنت حاسباتو صابر بصح قبيل كي جبدتلو سوجي ماقالش لالا بقا ساكت و يخمم فيه
عضيت على شواربي نحيت طابلية و طلعت لشمبرتي نبكي ..
هذا هو لحسن لي كان يقولي نمووت و مانمسش مراة غيرك .. هذا هو نفسو لي كان يقولي نشرب المر معاك و مانسمحش فيك لوكان تتقلب الدنيا ..
و انا واش راح يصرا فيا !!انا اكثر مراة نغير فوق الارض .. كي يهز بنت خوه و يقعد يسلم عليها نغيييير مالا ضرك كي يولي مع مراة وحدوخرا قدامي واش ندييير
كي يتغلق عليهم لباب كيفاش راح نصبر و نطفي كيتي
أنت تقرأ
سلام
Actionلا تنحني لتلقط ما سقط من حياتك...🖤 لأنك إذا انحنيت يسقط الأكثر ... 🥀 أكمل طريقك وستقابل الأفضل...✨🦋 𝒹ℯ𝓂ℴ𝒾𝓈ℯ𝓁𝓁ℯ 𝓏𝒾𝓀𝒶
