سلام

الجزء الثامن

نكون واقفة و خطرة وحدة نرمي كلشي من يدي و نطيح فالارض تحكمني هيستيريا تع بكاا ..
فات شهر على وفات جدي .. بدات لحالة تتكالما في دارنا
بابا برك كلما يشوف تصويرة جدي معلقة يبدا يبكي قدامنا و حنا مانحكموش رواحنا
كي سقسيت ائمة قالونا لا يجوز وضع تعليق صورة الميت
كي نحيناها باش بدا بابا ينسى شوية

فاتو يامات حتان وحد الخطرة جا عندنا عمي و قعد هو و بابا فصالون
ماما طيبتلهم قهوة و انا كنت في شمبرتي
بديت نسمع فالعياط و الحس يزيد
هبطت نجري دخلت عندهم
كان بابا وجهو احمر و يعيط و عمي يهدر ببرود :
- هذي دار بابا نص ليا و نص ليك
- انت مررريض .. علابالك ماعندي وين نروح حتى وكن نبيعوها و نقسمو حقها مش راح تجيبلي باش نشري دار
- هذاك المشكل تاعك انا المهم حقي نديه
- يااااا موسى اتقي مولاك راني خووك خوووك و زيد بابا عندو شهر و نص ملي مات ماراكش مكوي عليه
- مالا تمدلي دارهم لكرية تع نص تاعي كل شهر
- منين نجيبهم منيييين !! خلصتي للماكلة و ماتكفيش
- خالد انا لي عندي قلتوهلك .. لباقي مشي مشكلتي
خرج عمي من دار و خلانا حالين فامنا فيه .. سبحان الله كيفاش الانسان يقدر يتقلب على خوه
بقا بابا قاعد فصالون رحت نجري جبتلو دواه تع لطونسيون
مديتولو باش يشربو ضربو بيديه و جا واقف
- بابا لاطومسيون راها طالعتلك بزاف و راك ترجف هاك شرب تعيش
هو وصل عند باب الصالون و طاح فالارض
رحنا نجريو عندو نهزهزو فيه
درت عند خويا الصغير :
- عثماااان اجري جيبلي تيليفون اجججررري
كان يبكي مسكين و خايف على بابا
عيطنا للومبيلونص هزوه لسبيطار .. مااما راحت معاه و انا لحقتهم في طاكسي
كي خرج طبيب قالنا جاتو افيسي من القلقة
قعدت ماما فالارض و بدات تبكي و انا ماكنتش خير منها
غاضني بابا بزاااف بين ليلة و نهار كلشي فيه حبس و يقدرش يتمشى ضرك
صح كاين امل باش يرجع كيما كان بصح لازمها ارادة و وقت
منين راح تجيه الارادة مسكين و حياة ولادو راها فريسك قادرين في رمشة عين نترماو برا
كي رجعنا لدار ديراكت طلعت لشمبرتي .. بديت نبكي بعياط و نندب في وجهي (ربي يسامحني )
- لوقتاش راح نبقى نخسر فالعباد يا ربي لوقتاااش راح لحسن و رااح جدي و راحت صحت بابا .. كيفاش راح نعيشو ضرك .. يا ربي خلاص طاقتي كملت .. ياربي فرج علينا و شفي بابا ياااا رب

كي سمع عمي جا عندو باش يشوفو .. حنا قلنا ضرك يدور في رايو مي هو لا حياة لمن تنادي
يعني تقبل ياكل دراهم لحرام نورمال .. ماغاضتوش عمرو راح يغيضو خوه
بعد ما شد بابا لبلاصة حبست خدمتو و خلصتو ..