سلام

الجزء التاسع

بعت الذهب تاعي هذاك واش كان عندنا .. ماما ما بقالها والو كلشي مداتولي
خلصنا بيه عمي فنصو تاع الدار حق شهرين برك .. شرينا بيهم قضيان لدار و دواء
خبينا منهم للماكلة و لطبيب تع بابا

وحد المرة فصباح جوايه ل 11 طبطب الباب راحت ماما تفتح لقاتو وائل
غير شافتو فرحت قالت بلاك نخليه يقتانع و يهدر مع باباه
- اهلا ولدي اهلا جوز جووز
- صحيتي
دخل باش يشوف بابا دور وجهو عليه .. فهم وائل بلي ماراهش حاب يشوفو
داتو ماما لصالون :
- كشما سحقيت ولدي
- والله يا خالتي انا خممت عليكم و حبيت نعاونكم
فرحت كي سمعت هدرتو قلت بلاك ربي هداه و قنع باباه
- علابالي الحالة راها صعيبة عليكم باش تخلصو .. مالا انا قلت لوكان تقبل بيا امينة نكتبلها النص هذا على اسمها
حلت ماما عينيها فرحانة و دارت عندي
شفت فيه و ضحكت معاه و انا متقززة منو :
- ههه حتى انا قلت واحد كيما انت يكون هداه ربي .. ساعة كيفك كيما باباك لازمك تنحيو حاجة من لبنادم باش تعطوه حقو
- طارت فيا ماما : اعرفي واش تهدري.. لقيتي راجل يخمم عليك و يزيد يكتبلك دار على اسمك
- يزيدها في روحو و يقعد غير هو فوق الارض ما نديهش
رحت لشمبرتي و خليت ماما تاكل في روحها من بعد دارت عندو تتبسم :
- وائل ولدي تعرف راسها خشين شوية ضرك حبة حبة نقنعها دير روحك ماسمعت والو
- ماعليش خالتي ماعليش
هو خرج من و هي جات عندي :
- نتي هبلتي ولا واش ؟ هو يخمم على صلاحنا و نتي تتكبري عليه
- يخمم على صلاحنا ؟ بااابااا راه فالفراش بسبتهم هذو يخممو غير في رواحهم
- لي صرا صراا و ضرك لازمنا حل لي نلقاوها نديروها و نسكتو ماتنايش راه عندك خاوتك صغار
- ماما يقعد غير وائل لي مانديهش
- واش راكي حاسبة روحك ااه ؟ ماتنسايش بلي راه فيك بروبلام و مااكانش لي يقبل بيك
علابالي نيتها كانت باش تقنعني بيه بصح هدرتها توجع بزززاف .. فتحتلي جرح قديم كنت قريب ننساه
تعمرو عينيا بدموع :
- صحيتي ماما مزية فكرتيني .. و انا هدرتي مش راح ندور فيها .. و دراهم نجيبهم من سما ولا من تحت لارض هكذا باش تبقاو هانيين
بدلت قشي و خرجت
نتمشى برا و نبكي خليت ناس كامل مخلوعين في حالتي
درت كامل سبيطارات لي حطيت فيهم دوسي من قبل ماكان وااالو (قارية باراميديكال )
كي طاحت الظلمة شريت شوية ماكلة و رجعت لدار
ماتعشيتش دخلت لشمبرتي صليت و دعيت ربي يقويني باش نواجه هاذ العالم و نريح من وجاعي ..
تكسلت باش نرقد طار عليا نعاس قلت ندخل للفايسبوك شوية