سلام

الجزء التاسع عشر

#الجزء_التاسع_عشر

بدلت قشي و رحت للخدمة .. غير وصلت للدار طرطقت بالبكا ..دخلت لقيت هدى و رحمة يستناو فيا عند لباب كانو متوحشيني .. غير شافوني بداو يعيطو :
- ماما ماما
زاد قلبي تعصر .. عنقتهم و بكيت ددددم .. هذا اخر نهار ليا معاهم .. راح نودع بناتي .. صح ماجابتهمش كرشي بصح حاسة راح نخلي طرف من كبدتي هنا
من صباح حتال للعشية و انا هازتهم عندي كل دقيقة نشم ريحتهم .. كيفاش راح نصبر عليهم و كيفاش راح يصبرو عليا
ستنيت فارس يجي باش نقلو راح نحبس .. غير تخمام مش راح نزيد نشوفو هو تاني يخليني نموت و نحيا
كي سمعتو جا .. طلعت لبنات لشمبرتهم و هبطت عندو .. غير شافني حسيت عينيه ضحكو من الفرحة .. بصح انا وجهي كان ذابل و باين عليه الهم
قرب لعندي :
- كشما صرا امينة ؟
رحت لصالون و قعدت .. لحقني و قعد مقابلني
- راح نحبس خدمة
كي سمع هاذ الهدرة ملامح وجهو تقلبو :
- علاش ؟ صرات حاجة فدار ؟ الخلصة ما ساعداتكش ؟
كنت حابة نتقوى و نهدر معاه نورمال و نخرج .. بصح دموعي غلبوني .. بداو يطيحو وحدهم :
- لازم نحبس بسكو رايحة نتخطب
- هكذا بين ليلة و نهار رايحة تتخطبي ؟ و زيد لي تتخطب تفرح مشي تبكي !! اذا كاينة حاجة حكيهالي امينة
- الظروف هما لي وصلوني جيت نخدم لهنا و نفسهم هما لي وصلوني باش نتزوج
- اذا رايحة تتزوجي علاجال دراهم قوليلي نعاونك مابيناتناش
- مشي غير افار تع دراهم .. افار تع دار كاملة و صرا فيها تزوير
- بروبلام فاميليال ؟
- ايه عمي حاب يخرجنا من دار جدي لي هي حقنا و حقهم نص بنص .. بصح الكلب تع ولدو (طرطقت بالبكا ) كان حاب يديني و انا مقبلتش .. تزوجت و طلقت و بقا مورايا .. انسان خامج يضال مع لبنات ..نكرهو فالددم .. بسكو ما يحبنيش بيه غير مراة عاقلة يدير بيها رجلة قدام صحابو يخليها فدار كي لخدامة و يخرج مع صحاباتو
- و راح تقبلي ديراكت بلا ماتشوفي حل ؟ كن على الاقل شكيتي
- نشكي و ندبر محامي و.و.و فيها بزاف جريات ما نقدرلهمش
- وقتاش راح يجيو ؟
- بلاك سبت
- وقفت باش نروح : تهلالي بزاااف في بناتي
خرجت نجري قبل مانعاود نطرطق بالبكا