صباح كي نضت لميت قشي و دموعي على خدي ..خرجت من دار و شديت طاكسي ديراكت دارنا
ماما غير شافتني تخلعت :
- واشبيك امينة دابزتي مع لحسن
- ماما تعيشي مورالي راه فزيرو خليني نريح و نهدرو
بدلت قشي و درت دوش بارد
دخل بابا للدار رحت عندو سلمت عليه
كنت حشمانة كيفاش راح نهدر .. مالا فليل جمعتهم و حكيتلهم كلشي
- بابا : وعلاه رجعت للدار .. مافيها والو اذا تزوج باش يجيب ولاد
- قالي مانقدرش للمسؤولية تع زوج نسا
مالقاو مايهدرو بسكو هذا حقو و واحد ما يقدر يلومو عليه
رحنا المحكمة باش نطلقو .. كنت كيما لجثة نتمشى و ماما شادتني من يدي
وجهي اصفر من سهر و لبكا .. عينيا متورمين و حمرين
بعد العشرة و الحب و الوعود رجعت مطلقة ..
حسيتو ماكانش فرحان بصح فنفس الوقت ماكانش زعفان و حاجة ما غاضتو
فاتو 20 يوم و انا من دارنا مانخرج غير بكا .. حتى لماكلة و قطعتها
وحد النهار عيطت لمرت خالو نسقسي عليها بسكو كانت مريضة شوية
سمعت لغنا و لحس كي سقسيتها قعدت ساكتة و من بعد هدرت :
- امينة بنتي والله تستاهلي كل خير و ربي يلاقيك بالراجل لي يعوضك و يرزقك بالذرية .. لحسن ماكانش من مكتوبك
ضحكت ضحكة تع قهرة و الدمعة سخونة هابطة على خدي :
- ع..عرس لحسن
- يا بنتي كل واحد ربي عطاه نصيبو .. ما تتقلقيش ضرك حتى نتي يجي نصيبك
- سلمي عليهم و ربي يهنيه
رميت تيليفون دخلت راسي بين رجليا و قعدت نبكي و شادة شعري :
- يااا ربي ليوم عرسو ليييوووم .. ليوووم راح يكون مع مراة وحدوخرا ... راح يمسها و يولي يحبها .. يا ربي صبرني يااا رب .. راح ترقد على فراشي و تحط حوايجها في خزانتي و تدي بلاصتي
سمعتني يما جات عندي هي و خاوتي الصغار
بسيف باش تكالميت و رقدت ..
نضت صباح نتقلب في بلاصتي .. حليت عينيا عادي شهدت و ستغفرت
كي وقفت لقيت روحي في شمبرتي .. عرفت بلي كلشي صرا لبارح مشي منام كان حقيقة .. طرطقت بالبكا فرغت قلبي مليح و رحت صليت و دعيت ربي يكون معايا و يصبرني
أنت تقرأ
سلام
Actionلا تنحني لتلقط ما سقط من حياتك...🖤 لأنك إذا انحنيت يسقط الأكثر ... 🥀 أكمل طريقك وستقابل الأفضل...✨🦋 𝒹ℯ𝓂ℴ𝒾𝓈ℯ𝓁𝓁ℯ 𝓏𝒾𝓀𝒶
