سلام

الجزء الخامس عشر

#الجزء_الخامس_عشر

كي لبسهالهم جاو يجريو عندي عنقوني
دخلتهم عندي و قعدت نسلم عليهم :
- شكون عجبتكم سنسلة ولا لبوبيات
دارولي بصبعهم على لبوبيات
ضحكت و طلعت راسي عندو :
- شفت مايهمهمش الغالي المهم الشكل ههه
ماجاوبنيش قعد غير يشوف فينا متبسم و فرحان .. كان واقف و حاط يديه في جيبو .. عينيه كانو يبعثو الراحة و الامان لي كانو داخلو ..غير شاف فيا هبطت عينيا و لعبتها نهدر معاهم و كل كلمة نخرجها بسيف .. كي يبدا يشوف فيا نحشم و تتلفلي
بديت نحس فروحي نرجع كيما كنت من قبل و خرجت من الاكتئاب تاعي .. دخلو لحياتي و دخلولي الفرحة معاهم
كي يوصل الويكاند نكره و نتوحشهم بزااف .
نهار لخميس كملت خدمة و رجعت للدار .. درت ميناج و طيبت لعشا و رحت عند بابا درتلو ماساج بزيت زيتون .. حسيتو حاب يشكرني بعينيه مسكين كي راني هازة الدار في بلاصتو
- ماتخاف بابا حاجة ماراح تصرا مادامني هنا
رحت نغسل يديا حتان سمعت تيليفوني يصوني .. هزيتو نلقاه نيميرو تع فارس :
- علاه راه يعيطلي فهاذ الوقت ! و زيد غدوة ويكاند
- هزيت :الو وي موسيو فارس
- امينة قبيل ديت لبنات عند جداتهم كانو يلعبو و هدى طاحت من دروج تكسرت
- حطيت يدي على فمي مشوووكية : ياا يماا واش صرالها راها مليحة ؟ ديتها لطبيب ؟
- ايه الحمدلله مشي حاجة قراف .. بصح راها من قبيل تبكي و ماحبتش تسكت قلت بلاك تقدريلها و تنقصي عليها .. رانا فالكلينيك تع 1 نوفمبر
بلا ما نجاوبو لبست قشي نجري ..طليت على ماما فالكوزينة :
- ماما ليوم عندي بامانونص فسبيطار ايا باي
- امينة ستناي فاش راح تروحي .. اميينة
- خرجت برا : من بعد من بعد نعيطلك
ما خممت لا فليل لا فيسرقني مول طاكسي كيما كنت نخاف من قبل .. عقلي كامل كان عند هدى ..
قعدت نحوس عليهم حتان شفت فارس واقف ملهيه .. رحت نجري عندو
- وين ويين راها ؟
- هنا فوتي معايا
دخلت عندها انا و فارس .. غير شافتني هزت يدها لي نورمال و قعدت تبكي و تعيطلي :
- ماما امينة
رحت نجري ليها عنقتها و قعدت نسلم عليها فكامل لبلايص :
- يا روحي واش صرا فيك
- تحت من دلوج ..وزعتني يدي
- مسحتلها دموعها : خلاص بنتي ضرك كي تشربي دواء و ترقدي يروحلك لوجع
جات ملهيه رحمة طلعت فوق سرير و حلت يديها :
- انا تاني ماما
عنقتهم و انا خايفة عليهم في زوج .. تمنيتها فيا و مشي فيها
تفكرت فارس بلي راه معانا .. طلعت راسي عندو لقيتو مصدوم من شي لي صرا ضرك تخلطولو الاحاسيس .. فهذيك دقيقة تفكر مرتو الله يرحمها و تفكر شحال عااانا باش يخلي بناتو فرحانين و مايحسوش بالفرق . كانو غايضينو كي تحرمو من حنان الام و عمرلهم لا ينطقو كلمة ماما.