سلام

الجزء الثالث

نضت صباح لميت قشي و رحت للكوزينة طيبت القهوة و كبيتلو .. جبدت لكرسي قعدت معاه :
- لحسن حابة نروح لدارنا نقعد شوية و نرجع
- وقتاش ؟ ليوم !
- ايه .. اذا تقدر وصلني معاك
- روحي وجدي روحك
طلعت بدلت قشي و غايضتني عمري .. كيفاش كنا و كيفاش ولينا
كنت نضال نحلل فيه باش يديني لدارنا يقعد يقلي نحب كي ندخل لدار نشوف مرتي قدامي و مانرقدش وحدي
وصلني و مامبا ماسقسانيش شحال نقعد في دارنا
دخلت لشمبرتي حطيت حوايجي .. قعدت نتفرج فالحيوط .. كل حاجة فهاذ شومبرة شهدت على حكايتي معاه
بدلت قشي و رحت عند جدي كان مريض فراااش .. صحتو كامل طاحت رجع جلد على لعظم .. لقيتو راقد تكسلت قدامو و عنقتو..

قدام دارنا ماحبيتش نبين واش راني نعاني في حياتي .. بصح وحدهم يعرفو بسكو صعيبة بزااف و اي راجل و مراة يتمناو يشوفو ولادهم قدامهم
فوت هذوك ليامات كل يوم عند طبة و لعجايز لي يدلكو ..كل واحد واش يقول و انا لي يمدوهالي نديرها
ستنيت لحسن يفهم روحو و يجي يديني مابانش كامل .. كي بدا بابا يتوسوس كشما كاين بيناتنا هزيت قشي و رجعت لداري
رجعت ديراكت لشغل دار .. كنت نخدم كلشي قد قد باش كامل ماتهدرش معايا عجوزتي .. بسكو اذا بدات راح غير تجرحني و تزيد عليا
فليل كي رجع لحسن من الخدمة حطيتلو يتعشا من بعد لميت لماعين غسلتهم و رحت عندو لشومبرا تكسلت قدامو كان يتفرج
قعدت نخمم شوية و ناكل في شواربي من بعد هدرت :
- ماكلاكش قلبك عليا ؟
- علاه ياكلني قلبي ياك راكي في داركم
- وشبيك لحسن تبدلت لهاذ درجة ماكنتش كامل هكذا
- امينة علابالكي راني لاهي مع الخدمة
- راك تخدم من بكري يعني مشي حاجة جديدة
- راني حاس بيك .. انا و كن صبت بلاصة نروحلها و نبعد شوية على روتين تع دار كن راني رحت
قد ما يبرر ماعندو حتى عذر باش مايعيطش يسقسي عليا
قبل ما يرقد دار عندي :
- حقا تفكرت .. ليوم جبت لي زاناليز تاوعي و ديتهم لطبيب
- ايه واش قالك
- قالي مابيك والو راك صحيح 100%
هبطت عينيا فالارض .. كنت حشمانة بحالتي و مهزومة فنفس الوقت
- الحمدلله