قمر الليالي

25

مالك : اولا  شكرا للاتكلمو  الادلو برايهم  ديل و مقدرين اهتمامكم   واهلا وسهلا بيكم شرفتونا  ورفعتو مقدارنا 

في حاجه  عندي اساسيه  وسط المشكله دي ثابته وما حتتغير وما فيها نقاش ..  انا ما عرست قبل ١٠  ايام عشان اجي اطلق الليله  .. يعني موضوع عرسي ده خارج النقاش ..
احمد : خارج النقاش كيف  ده اساس الموضوع اصلا ومقعدين ليك رجال  تسد عين الشمس ما تعمل ليهم اعتبار  وتكسر كلامهم .. كلنا متفقين انك تطلق الزوله دي  وده كلام كبار الجعلي يا ولد 😡

مالك : يا عمي حتجاوز  كلمة يا ولد دي 😑  هنا راسي براس الكبير الفيكم جوخلينا في موضوعنا الاساسي ..

  نحن قبال زواجي كنا كيف  كنت عايش في فندق يا ساده  يعني المشاكل موجوده   اصلا  
وكبار الجعلي علي عيني وراسي وما حكسر كلمه من البتقال لو على رقبتي  بس اطلق مرتي ده شي شخصي وماف مخلوق بقدر يجبرني عليه لو ما انا مقتنع بيه  وما اظن كبار العايله  عايزين يهدمو بيت بالحلال

احمد :عارفين  المشاكل في اصلا  لكن انت بعرسك ده كبرتها  زياده ..

مالك : يا جماعه عايز اتم كلامي انا ما قاطعت زول ..

اهم نقطه زي ما قلت موضوع عرسي غير قابل للنقاش مهما كان فل ستوب..

وبالنسبه لبت عمي برضو طلاق ده ما خيار ابدا ولا بأيي حال من الاحوال
انا عندي منها بت وتاني حامل يعني ما حرمي اولادي واطلقها لو كنت بطلقها كان طلقتها قبال اعرس .

فيما عدا كده ما عندي مشكله وشوفو البتقولو .

احمد هاااج وكورك اقسم بالله تطلقها غصبا عنك ولو بقت بالمحكمه  انت قايلها هامله تلطش فيها شمال ويمين ..
وقال المشاكل في قبال عرسك ده .. وخايف علي اولاك انت يا باشا طلعت من البيت وخليته ورميتهم ..
مرتك كانت حامل وفي اشد الحوجه ليك ولوقفتك جمبها و برضو بتك الصغيره بقت عندها نفسيات بابا وين بابا وين

الجماعه ديل كل زول يهرج بجمبه والاصوات علت الا جدهم الكبير عبد الرازق سكت الناس وقال لمالك يعني انت هسه الشرطين القالوهم ابوك وعمك رفضتهم طلاق من الجديده ما حتطلق
وكمان بت عمك برضو ما بتطلقها
انت ما خليت شي يتناقشو فيه يا ولدي

مي بره الصالون سااامعه كل شي وعندها راي برضو .. وفي الهيجه دي جات مي سلمت وقعدت جمب ابوها
كانت لابسه فستان حمل ابيض ساده اطرافه ملونه ولابسه طرحه ملونه رامياها بخفه شعرها كله بره زي الملاك فستان ابيض ولون ناااقع

الرجال شافوها سكتو وبقو يعاينو لاحمد
احمد قال ليهم بتي هي ست المشكله وبرضو من حقها تتكلم

مي : بشكر حضوركم يا جماعه وما قصرتو والله وصحي العز اهل وانا متطمنه على ايي قرار حتقولوه عارفاه حيكون صايب
اذا مالك ما عايز يطلقها انا ما عندي مشكله
الناس دي سكتت الا ابوها وعمها قاسم .. كيف ما عندك مشكله نحن عندنا مشكله موضوع الطلاق ده مفروغ منه ..
قالت ليهم يا جماعه انتو موش عايزين ترجعونا وبشروط واتفاقات انا مشاكلي كلها نقاط ما من فراغ وصحي قبال عرسه كانت في مشاكل انا عايزه حل للنقاط البسيطه دي عشان لو ما طلقني يحل لي مشاكلي اول