قمر الليالي

28

مشو البيت الكبير جو داخلين احلى كابل 👫 بعد السلام مالك قال لامه جعااان شديد مع اللخمه ما اكلنا وما عايز اكل جاهز امكن يتعبني في معدتي ما صدقت اني اتحسنت من الكنت بحس بيه لازم شي خالي دهون وبهارات قليله .. قمر امشي ساعديها

مشى مع ابوه للصالون وحكى ليه بالحاصل كله وقال ليه ما حراميه لانه كل شي مكانه انا متخيل دي رساله تهديد من الشيخ يعني انا قادر اوصل لبيتك 😡 ولغرفة نومك بالتحديد

: لا لا يكون حراميه الشيخ ده خلاص اتفضح ما بدخل نفسه في مهاترات زي دي معانا
: انا شكيت انه عارف عني كل شي حتى توقيت رجوعي عارفه و توقيت قمر مشت الشقه 😑.
: قلت ليك صدفه بس كل الحصل ده الشيخ ما دخله زي ما قلت ليك .. ما تخت في بالك كلام زي ده وتبقى لو عضتك باعوضه تقول ده الشيخ .. هو خلاص عمل عملته ولبد وهسه منتظر ردنا شنو ..
بعدين يا مالك انا عايزك جمبي انت عارف انا كلمت امك ينضفو الشقه الفي السطوح و اسكن فيها انت بتشيلك مع البت دي نفس خرطة شقتك التحت ما اقل منها في شي بس اللهم معاها السطوح ممكن تفصل  منه جزء
طلع و ابوه ماشي معاه و لسه بناقشه وقال ليه عشان تطمن علي دي (قمر) بدل ما تكون براها لمن انت تكون هنا مع مي ..

قمر ما فاهمه بتناقشو في شنو بس قلبها اتقبض 😪 من جات سيرة مالك يكون مع مي . .
مالك لاحظ توترها وانها شبه ما راضيه .. قال لابوه هسه الموضوع ده بدري عليه عايز نقاش حتى اقرر يحصل شنو ..
قاسم حكى لصفيه بقصة الشقه وقال ليها برضو داير يمشي يسكن فيها براه اتكلمي معاه ولدك ده راسه ناشف الا يتجادل ما بسهل لاي زول ايي شي انت بتصعب الامور وتعقدها يا مالك و ده رأيي انا عايز اريحك نفسيا وتكون متطمن علي اولادك انهم معانا وفي ايي لحظه سواء هنا مع مي او مع البت دي ..
: يا ابوي اسمها قمر ما البت دي 😕
: انت لف و دور و حور المواضيع انا قلت ليكم رأيي وانت اعمل ما بدا لك لكن غير انك حتتعبنا معاك ما شايف شي ☹.
امه برضو قالت ليه خايفين عليك يا ولدي هنا جمبنا عيني تغمض مرتاحه كل يوم والشقه منضفه وجاهزه جيب بس عفشك ..
: بشوف يا امي .. ويا ابوي انت الما تصعب الامور خليك ايزي وخلوني علي راحتي 😕اشوف البناسبني .

قمر تاكل بصمت بس بتعاين ..
بعد العشاء قعدو شويه اتونسو مع اخواته ولاء و وفاء وخالد نزل مع مها كانت سهره ظريفه .
يخططو لكرامه مالك يعزمو منو ويعملو شنو ..
مالك قال ليهم ماف داعي للجوطه دي كلها نجيب خروف نضبحه جمعه نحن ناس البيت و خلاص ..
خالد و ابوه قعد يضحكو 😅😅
خالد :مالك قاسم الجعلي كرامته خروف يوم جمعه ما بكفي حتى ناس البيت لو حسبت الشغالين 🤣
انت خسران شنو يا زول انت بس سجل حضورك الباقي علي انا وابوي 🤩
مالك يضحك في كلام خالد وقال ليهم تمام اعزموني بس ما تنسو ههههه ..

ولاء كانت بتتونس مع قمر بالجمبه براحه ونصحتها تقنع مالك بفكرة السكنه معاهم في البيت الكبير بتكون مطمنه وآمنه حتى لو امها جاتها عادي وابوي لو لاحظتي بقى متقبل فكرة زواجكم وحتى مي شويه رخت من حصلت مشكله مالك دي اتغيرت .. يعني كل الفرص متاحه ليك تتأقلمي وتدخلي في العايله المعقده دي .. دي فرصتك صراحه وكويس جات منهم ..
قمر شبه مقتنعه بالفكره هي عاشت معاهم تحت هنا وبراها ومالك كان مسافر ما اتضايقت ولا حست بشي لا من ناس تحت لا من مي زاتها ما كانت بتشوفها خلي تسكن في شقه براها فوق ..