You are my star (ကြယ်မှုန်မြားတစ်စင်း) [Complete]

Ending

[Unicode]

ကျောင်းသင်္ခမ်းရိပ်သည် ခါတိုင်းလိုပင် ရောက်လာသူအပေါင်းကို ငြိမ်းချမ်းတိတ်ဆိတ်စွာ ဆီးကြိုလေသည်။

သူ ခိုနားသော ကျောင်းဆောင်သည်
ကျောင်းပရ၀ဏ်၏ အနောက်ဘက်ကျကျတွင် ရှိသည်။

အရိပ်ကောင်းလှသော ကုက္ကိုပင်ကြီးများ ယှက်ဖြာကာ သစ်ရွက်များကြားမှ နေရောင် တပြောက်နှစ်ပြောက်ကျတတ်သော သည်ကျောင်းရိပ်မှာ သူရှိနေတာ တစ်ပတ်ကျော်လှပြီ။

အချစ်ရေး အပူမို့ ရဟန်းဝတ်၊ ယောဂီဝတ်ဖို့ သူ နောက်ဆုတ်မိပြီး ကျောင်းကပ္ပိယ အနေနဲ့သာ ကျောင်းဝေယျာဝစ္စများ ကူညီလုပ်ကိုင်ပေးကာ အားလပ်ချိန်များတွင် စာဖတ်ရင်း၊ ကျောင်းအနောက်ဘက်ခြမ်းက စမ်းချောင်းလေးမှာ တစ်ကိုယ်တည်း သွားထိုင်ရင်း၊ တခါတရံ အမေ့ဆီ သွားကာ ခြေဆုပ်လက်နယ် ပြုစုရင်း သူ့ အချိန်တွေကို ငြိမ်းချမ်းစွာ ကုန်ဆုံးစေမိသည်။

သည်နေ့လည်း ကျောင်းအနောက်ဖက်က ရွက်ကြွေတို့ ညိုးညံသော သည်တောလမ်းလေးအတိုင်း ဖြတ်လျှောက်လာရင်း လောကမှာ တစ်ကိုယ်တည်း အထီးတည်းနိုင်သော ခံစားမှုတစ်မျိုး ဝင်လာသည်။

သို့သော် အေးစက်အခံရခက်သော အထီးကျန်မှုမျိုး မဟုတ်ဘဲ ညံ့သက်ညင်သာသော ဝေဒနာမျိုးသာ ဖြစ်သည်။

ထုံးစံအတိုင်း စမ်းချောင်းလေးနားမှာ စိတ်အေးလက်အေး ထိုင်မိသည်။

တာရာ့ပုံရိပ်က ရေပြင်ပေါ်မှာ ပေါ်လာလေသည်။

သည်ပုံရိပ်သည် များစွာသော လူတို့နှစ်သက်သော ကျော်ကြားသော အဆိုတော် တာရာ၏ ပုံရိပ်လားတစ်သက်မှာ တစ်ကြိမ်သာ ပေါ်ပေါက်သော အချစ်တစ်ခုကို အပြီးအပိုင် လျှို့ဝှက်သိမ်းဆည်းထားကာ အိပ်မက်ဆန်းတစ်ခုမှ လန့်နိုး‌လာသူ တစ်ဦး၏ ပုံရိပ်လား ဝေခွဲမရပေ။

သေချာသည် တစ်ခုကတော့ ဖေဖေ လင်းစက်၏ သားအရင်းဖြစ်‌သော တာရာ၏ ပုံရိပ်သာ ဖြစ်သည်ဟု တစ်ကိုယ်တည်း အကြိမ်ကြိမ် ပြောနေမိသည်။

သည်အရာ အတွက်နှင့် အရာရာကို စွန့်လွတ်ခဲ့သည် မဟုတ်လား။ တာရာ့မှာ နောက်ပြန်ဆုတ်ဖို့ အကြောင်းမရှိတော့ပေ။