You are my star (ကြယ်မှုန်မြားတစ်စင်း) [Complete]

Part 1.1

[Unicode]
အခန်း (၁)

ကောင်းကင်တစ်ပြင်လုံး မိုးသားရိပ်များနှင့် ပြည့်နှက်နေသည်။ လေပြင်းမှာ ကြမ်းသည်ထက်ကြမ်းလာပြီးအိမ်ရှေ့က ကုက္ကိုပင်ကြီးပင် ယိမ်းထိုးနေသည်။
ဗာဒံပင်မှ ဗာဒံရွက်နီနီများ တဖြုတ်ဖြုတ် ကြွေကျနေသည်။ ဆိုက်ကားသမား တစ်ဦးသည် မိုးအရွာနှင့်ကြုံမည်စိုးသဖြင့် ခပ်သုတ်သုတ်နင်းသွားသည်ကို မြင်ရသည်။

တာရာသည် သူ့ရှေ့ချထားသော ခရီးဆောင်အိတ်က ကြိုးလေးကို အကြောင်းမဲ့ ရစ်ခွေကျစ်လိမ်ရင်း အမေ့ကိုကြည့်မိသည်။ အမေလည်း သူ့လိုပင် စိတ်လှုပ်ရှားနေဟန် ရှိသည်။ စိတ်လှုပ်ရှားလျှင် ဖြစ်တတ်သည့် လက်သည်းကိုက်တတ်သည့် အကျင့်ကို အမေ့မှာ ပြန်တွေ့ရသည်။

တာရာသည် အိမ်ခန်းထဲသို့ နောက်တစ်ကြိမ်ငေးမောနေမိပြန်သည်။ အခန်းထဲက ဗီရို၊ သေတ္တာ၊ မှန်တင်ခုံ၊ ရေအိုး၊ နောက် ဖေဖေ့ အိုးစည်၊ပတ်ဝိုင်း၊ စည်တော် စသည့်ဆိုင်းဝိုင်းသုံးပစ္စည်းများအားလုံးကို ပြီးခဲ့သည့် ရက်သတ္တပတ်အတွင်းကပင် လျှော့ဈေးဖြင့် ရောင်းချခဲ့သဖြင့် တစ်ခန်းလုံး ရှင်းပြောင်နေသည်။ ဘုရားဆင်းတုတစ်ဆူကို ဘုရားစင်ပေါ်တင်ထားသည်ကလွဲ၍ အတူ ရှိတတ်‌သောဘုရားပန်းအိုး၊ ဆွမ်းပန်းကန်များပင် ရောင်းပစ်လိုက်ကြသည်။

တာရာတို့ သည်အိမ်‌လေးကို အပြီးခွဲခွာရတော့မည်။ ကွယ်လွန်သူ ဖခင်ကြီး၏ အငွေ့အသက်များ ကြွင်းကျန်ရစ်သော သစ်သားအိမ် ‌ယိုင်နဲ့နဲ့လေးကို တာရာ ချန်ထားခဲ့ရမည်။

သွပ်မိုးပေါ်သို့ မိုးရေကျသံ တဖြောက်ဖြောက်ကို ကြားရသည်။

အမေသည် တိုင်နံရံကို မှီကာ စကားတစ်လုံးမှ မပြောဘဲ ငြိမ်သက်နေသည်။ နှုတ်ခမ်းကို ခပ်တင်းတင်း စေ့ထားသည်။ အနားမှာ တာရာရှိနေသည်ကိုပင် သတိရပုံမရ။ လေပါသော မိုးဖြစ်သဖြင့် အိမ်ရှေ့ကြမ်းခင်းတစ်ခုလုံး မိုးရေဖြင့်ရွှဲစို‌နေသည်ကိုလည်း မြင်ပုံမရ။

တာရာသည် ‌အကျင့်ဖြစ်နေကာ ရေသုတ်ဖို့ အဝတ်ရှာသည်။ အော် ဒါ တာရာတို့ အိမ်မှ မဟုတ်တော့ပဲ။ညအိပ်ရင်တောင် မိုးယိုလွတ်ရာ တစ်နေရာပြီး တစ်နေရာ ပြောင်းအိပ်ရသော အိမ်ကလေးသည် တာရာတို့ ဆက်နေရမည့် နေရာ မဟုတ်တော့ဘူးတဲ့။
အမေပြောသလို အရာအားလုံးဟာ ပိုကောင်းဖို့ ဖြစ်လာသည်ဟု ယုံကြည်ရမလိုပင်။
တာရာတို့သည် သည်အိမ်ထက် အဆမတန် ခမ်းနားသော တမြို့တရွာက စံအိမ်ကြီးကို ပြောင်းနေရ‌တော့
မည်တဲ့။