You are my star (ကြယ်မှုန်မြားတစ်စင်း) [Complete]

Part 1.12

[Unicode]
တာရာ့ခေါင်းအုံး တစ်ခုလုံး မျက်ရည်တို့ဖြင့် ရွှဲနစ်စိုနေသည်။
အခန်းလေးကို အထဲမှ ချက်ထိုးချလိုက်သည်။
တာရာ့ ကမ္ဘာတစ်ခုလုံး ချာချာလည်နေသည်။

•••••••••••••••••••••••••••••••••••••••••••

အခန်း (၃၂)

သရဝဏ် စံအိမ်ကြီးသည် ခါတိုင်းနေ့များနှင့် မတူ ခြောက်ကပ်သွားသည်။

တာရာတို့ သားအမိနှစ်ယောက် ဘယ်လိုမျက်နှာဖြင့် သည်အိမ်ကြီးမှာ ဆက်နေရမလဲ။ အမေ့ကိုမူ တာရာ မျက်နှာချင်းဆိုင်ဖို့ပင် မဝံ့ရဲ။ ထို့ကြောင့် ခေတ္တအားဖြင့် ရန်နိုင့်အခန်းသို့ ပြောင်းရွှေ့နေလိုက်သည်။

ဒေါ်ခင်မမကတော့ သူ့ညီမ အိမ်သို့ ဆင်းသွားပြီ ပြောသည်။ သိပ်မကြာခင် ဦးလင်းမြတ်ထံသို့ ကွာရှင်းစာချုပ် ပို့လိုက်မည်ဟု ဆိုလေသည်။

တာရာသည် ရန်နိုင့်ကိုပင် ရင်ဆိုင်ရခက်လှသည်။ တာရာ့အမေကြောင့် သူ့မိဘနှစ်ပါး ပြဿနာ ဖြစ်ရသည် မဟုတ်လား။

သို့သော် ရန်နိုင်ကတော့ တာရာ့ကို အပြစ်မြူတစ်မှုန်မျှ မတင်ချေ။
တာရာ မျက်နှာမကောင်းသည်ကိုပင် အမျိုးမျိုး နှစ်သိမ့်ရှာသည်။

'ဒါ လူကြီးတွေ ကိစ္စပဲ' ရန်နိုင်က ဤသို့ဆိုသည်။

'ငါ့အမေ အစား တောင်းပန်ပါတယ် ရန်နိုင် ငါတို့ ဒီအိမ်ကို ရောက်မလာခဲ့သင့်ဘူး'

ရန်နိုင်က အခန်းမီးပိတ်လိုက်သည်။ သူက တာရာ့ကို သူ့ကုတင်မှာ အိပ်စေသည်။ သူက ဆိုဖာပေါ်မှာပဲ အိပ်မည်ဟု ဆိုသည်။

'ဒီအိမ်က မင်းအိမ်ပဲလေ ဘာတွေ အားငယ်နေတာလဲ ဒါ ငါ့အဖေရော မင်းအမေရော မှားတဲ့ ကိစ္စ ဘယ်သူကမှ ပိုမှန် မနေဘူး'

'ငါ အန်တီ့ကို ကျေနပ်အောင် တောင်းပန်ချင်တယ်'

'အမေက လက်ခံဦးမှာ မဟုတ်ဘူး တစ်ခုပဲ မင်းအမေနဲ့ ငါ့အဖေကရော ခုချိန်မှာ ရှင်းရှင်းပြတ်ပြတ် နေဖို့ သူတို့ ကိုယ်တိုင်ရော စိတ်ကူးရှိရဲ့လား'

တာရာ့ ရင်ထဲနွမ်းသွားသည်။
အမေနဲ့တော့ တာရာ ခုထိ မျက်နှာချင်း မဆိုင်ရသေးပါ။ ရန်နိုင့်အခန်း ပြောင်းနေရန် တာရာ ပစ္စည်းတွေသိမ်းတော့ အမေက တာရာ့ကို တားသည်။ အိမ်တံခါးဝမှာ ပင် ကားဆီးရပ်သည်။ အမေ့ ပုခုံးကိုဖယ်ကာ အမေနဲ့ ဝေးရာသို့ ရှောင်ထွက်လာခဲ့သည်။