أها عريس الغفلة وأهله طلعوا مننا وداك يا الكوراك القديت بي أضان جدي وحبوبة وأخبط في سعاد..حبوبة قالت لي :- بتسوي كدي مالك..أخترنالك زينة الرجال يا يمة..زغرطي ساي والعبي امحدارة (دور بي حبيبي دور بي)..قولته ليها :- حبوبة أني بدور اقرا جامعه واتخرج واشتغل في الخرتوم..قالت لي بحدرة :- والعريس ده جاي من ضنب الفيل..جدي يضحك و يستغفر ويسبح..بركتا في كرعينو يا جدي وقف الموضوع ده..بدور اقرا براي بدون مساعدة من زولاً غريب...جدي خت العكاز في نص راسي وقال :- كلمتي ما بتنزل واطة..بعد اسبوع العقد وحبوبتك تجهزك زي البنيات وتبقي مارقة مع ابو العيال..هييي يا جدي متين بقى ابو العيال...سعاد تضحك لمن سنيناتا يظهرن..ضهرها ورمتو ليها من اللبع..غسلت لينا العفش وقبل تفوت قالتلي :- الجمعه قربت..النكلم بنات الحلة يجن باكر يباركن ليكِ...بس النسألك..العريس ده شافك من اي اتجاه..يا ربي جبهتك دي كنتي مغطياها لمن جو..بري ما كنتي مغطياها..ما شاف نخرتك دي؟؟؟...والله اتي عارفة الضلااام ما خلاهو يشوفك زي الناس...خلي يجي الصباح يشوفك أحتمال يغير رايو منك..ملصت نعلاتي وسكيتاا لخشم بابهم وجيت راجعه...لقيت حبوبة بتتكلم بالتلفون (ربيكا) تلفونا ده أذنبت في حقه يوم القيامة بشتكيها...مدبساهو بلبانه وماسكه البطارية ببانده صغيره...قالتلي:- هاك هاك امسكي..دي حماتك...مسكت التلفون وبصوت عالي :- ألوو...والله جاني صوت عشعش جوا دواخلي...صوت رجولي ما سمعتو إلا في بوليود زمن ناس ارناڤ....قال لي:- معاك عبد السلام....قولته :- عبد السلام منوو؟؟..قال لي:- العريس...
هااا براك جنيت على روحك..هو انت كان نصيييح كدي بتجي تطلبني...!؟
#يتبع
